Moyane dreig Cyril: Stel my weer aan!

Kommissie staan by bevindinge

08 November 2018 | Ekonomie
Marelise Van Der Merwe en Elvira Wood – Tom Moyane, afgedankte kommissaris van die Suid-Afrikaanse Inkomstediens (SAID), sê pres. Cyril Ramaphosa het tot Vrydag om 12:00 om hom weer in sy pos aan te stel.

Ramaphosa het Moyane op 1 November afgedank.

Dit volg nadat die Nugent-kommissie van ondersoek in sy tussentydse verslag wat aan die president gestuur is, aanbeveel die president moet onmiddellik van Moyane ontslae raak.

Moyane sê in ’n brief aan die president dat as hy hom nie weer aanstel nie sal sy regspan “’n dringende aansoek by die hof indien”.

Moyane was voor hy afgedank is geskors maar het steeds sy volle salaris verdien. Hy wil hê hy moet ten minste weer in dié pos wees tot ná die konstitusionele hof besluit het hoe regverdig die Nugent-kommissie van ondersoek is.

Moyane wil hê die hof moet bevind dat die president se optrede – om hom summier af te dank – irrasioneel, onwettig en ongeldig is.

Hy wil hê die hof moet ’n interdik uitreik om Ramaphosa te keer om enige aanbevelings deur die Nugent-kommissie deur te voer.

“Ons is aangesê om aan te dring dat jy jou brief gedateer 1 November 2018 waarin jy ons kliënt afdank moet terugtrek en die status quo wat betref ons kliënt in ere moet herstel (dat hy geskors is met volle betaling in afwagting van die uitslag van die dissiplinêre ondersoek) en dat jy vir die bevinding van die saak wat by die konstitusionele hof ingedien is en/of die tugverhoor moet wag,” lui die brief.

Nugent-kommissie

In die brief gedateer 5 November, sê Moyane se regspan dat die Nugent-kommissie sy mandaat oorskry het deur aan te beveel dat Moyane afgedank word, én dat Ramaphosa nie gehoor moes gee hieraan nie.

Die span val ook Ramaphosa se argument in hofstukke aan wat sê Moyane se versoek aan die konstitusionele hof is nou nie meer relevant nie aangesien hy Moyane nou afgedank het.

Moyane se prokureurs sê Ramaphosa se argument is “krities, onlogies en irrasioneel”.

Moyane se prokureurs sê ook Ramaphosa het sy beëdigde verklaring in antwoord op dié van Moyane in ’n “wonderbaarlike tien minute na ons [Moyane se prokureurs] die brief waarin hy afgedank word ontvang het”.

“Dit is dus duidelik dat die verklaring van 93 bladsye dus lank voor daar besluit is om Moyane op 1 November af te dank, voorberei is.”

Moyane se prokureurs sê Ramaphosa het dus lank reeds geweet hy gaan hul kliënt afdank en dat sy argument dat Moyane se saak by die konstitusionele hof nie meer water dra omdat hy afgedank is, sin maak nie.

Hulle argumenteer die regte proses is duidelik nie gevolg nie.

“Slegs ’n persoon wat opsetlik blind is kan sulke blatante verduistering miskyk,” skryf die prokureurs in die brief.

Die brief beweer dat Ramaphosa nie enige van Moyane se argumente wat hy in sy brief gedateer 26 Oktober noem in ag geneem het nie.

Moyane se prokureurs dring daarop aan dat die Nugent-kommissie se verwysingsraamwerk hom nie in staat stel om aanbevelings gedurende die proses te maak nie of “om aanbevelings te maak wat buite sy mandaat val nie”.

“Jy het nie die reg om sulke aanbevelings wat nie wettig bestaan te aanvaar soos wat jy beweer jy het nie,” skryf hulle aan Ramaphosa.

Hulle sê dat Moyane se aansoek by die konstitusionele hof slegs as onsinnig oorweeg kan word indien die SAID-kommissie wettig en behoorlik saamgestel is, dit wil sê nie bevooroordeeld of waar daar konflik van belange is nie; het binne sy opdragte opgetree; het ’n “behoorlike ondersoek; en het “dienooreenkomstig wetlik volhoubare aanbevelings op grond van sulke geldige bevindinge gemaak,” beweer die brief.

“Jy [Ramaphosa] het nietemin besluit om [Moyane se indiensneming] te beëindig terwyl jy ten volle daarvan bewus is dat die hof nog uitspraak oor hierdie kwessies moet gee.”

Hulle beweer Moyane is geregtig om steeds in sy pos aangestel te wees tot hy “volgens wet” verwyder word.

Die presidensie wou nie onmiddellik kommentaar lewer nie.

Nugent

Afgetrede regter Robert Nugent, voorsitter van die kommissie, het in die laaste openbare sittings van die kommissie in Pretoria gesê die kommissie staan by sy bevindinge.

“Wat ons betref, moet die huidige kommissaris so gou moontlik uit sy pos verwyder word en ’n nuwe kommissaris aangestel word sodat ons sekerheid kan kry en vorentoe kan begin beweeg.

“Dit is die president se voorreg om te besluit of hy dit gaan doen, al dan nie,” het Nugent toe gesê.

“Bespreek dit as jy wil, maar dit is ons siening en ons gaan daarby hou. Ons gaan dit nié in die finale verslag verander nie

– Fin24, verwerk/Netwerk24

Soortgelyk

 

Polisie konfiskeer kerk se luidsprekers in Oshakati

19 ure gelede | Plaaslik

Die polisie het luidsprekers wat aan die New Jerusalem Ministry in Oshakati se informele nedersetting Oneshila behoort, vandeesweek ná klagtes van rusverstoring gekonfiskeer.Volgens inspekteur Thomas...

Olifante beskadig optiese kabels naby Khorixas

19 ure gelede | Plaaslik

‘n Trop olifante het inwoners in die Noorde van die land sonder landlyn- en selfoonverbinding gelaat, nadat die optiese kabel tussen Omatjete en Khorixas Donderdagmiddag...

Skietklub lê weer aan

22 ure gelede | Howe

Denver Kisting - Mnr. Norman Tjombe, die regsverteenwoordiger van die Rehoboth-skietklub, het vanoggend (Vrydag) bevestig sake is terug na normaal.Dít kom nadat die Namibiese weermag...

'Boere se veglus verdwyn'

1 dag gelede | Landbou

Ronelle Rademeyer en Elvira Hattingh - Twee bekende boere van die Suide sê die droogte het boere op hul knieë.“Ek was gister by ’n veiling...

Egpaar herontdek skaars plantjie

1 dag gelede | Omgewing

Denver Kisting – ’n Dekaan by die Namibië Universiteit van Wetenskap en Tegnologie (Nust), dr. Rolf Becker, en sy vrou, me. Alma Moller, het verlede...

Kalender 18 Januarie

1 dag gelede | Kuns en vermaak

Nou aan die gang» Die Nasionale Kunsgalery van Namibië (NAGN) bied met trots Unam se beeldende kunste-uitstalling vir 2018 aan. Dié uitstalling is tans...

'DRK maak staat op ons'

1 dag gelede | Politiek

Inwoners van die Demokratiese Republiek van die Kongo (DRK) maak staat op lande deel van die Suider-Afrikaanse Ontwikkelingsgemeenskap (SADC) om die land weer op die...

Operasie Hornkranz: Meer misdaad aangemeld

1 dag gelede | Misdaad

Augetto Graig Die Namibiese polisie het Woensdag by die Israel Patrick Iyambo-polisiekollege in Olympia terugvoering gegee aan die visepresident, mnr. Nangolo Mbumba, en die...

Weer vir 18 Januarie

1 dag gelede | Weer

BINNELAND: Sonnig en warm tot baie warm in die //Kharasstreek, andersins gedeeltelik bewolk en baie tot bloedig warm met 'n paar tot geïsoleerde donderbuie in...