Moenie diere lewend uitvoer, pleit Namibiërs

Nadele ook ekonomies van aard

10 September 2020 | Landbou
Jana-Mari Smith



Bykans 'n duisend mense het sover 'n klagskrif ­onderteken wat 'n sakevoorstel teenstaan dat duisende lewen­de plaasdiere van Namibiese hawens na die Midde-Ooste vervoer word.

Die klagskrif getiteld “Say no to livestock by sea” is deur die ­Namibië Dierewelsynsvereniging (Nawa) van sta­pel gestuur in reaksie op 'n sakeplan om lewende skape, beeste en bokke van Namibië na Koeweit te vervoer om daar geslag te word.

Die voorstel deur Trade­port Namibia word uiteengesit in 'n agtergrond­inligtingsdokument (BID), wat deel uitmaak van die maatskappy se aansoek om 'n omgewings­klaringsertifikaat.

Volgens die BID behels die plan die invoer van 70 000 lewende skape, 50 000 bokke en 5 000 beeste uit Suid-Afrika en Botswana deur Ariams­vlei, om weer vanaf ­Lüderitz of Walvisbaai na die Midde-Ooste uitgevoer te word.

Die diere sal op ­Ariamsvlei aangehou wo­rd tot daar ­voldoende getalle is vir verdere vervoer na die hawens, en dan per see na die Midde-Ooste uitgevoer kan word.

In terme van diere se welsyn, word in die BID genoem dat die invoer en uitvoer van lewende diere “inherent 'n hoë risi­­ko vir dierewelsyn inhou, veral gedurende die somer”.

Internasionaal word die vervoer van lewende hawe toenemend teengestaan, wat in sommige lande 'n dekmantel­verbod tot gevolg gehad het en voortgesette regsge­dinge elders.

Nawa waarsku dat afgesien van die talle diere­welsynsrisiko's wat aan lang reise verbonde is, Namibië se internasionale reputasie ook 'n knou kan kry.

In die Verenigde Konink­ryk is regsgedinge aanhangig gemaak om die praktyk te stop.

Die Europese Unie ondersoek welsynsoor­treders wat nie aan ­handelsvoorskrifte voldoen nie.

Australië laat lewende uitvoere slegs toe op voorwaarde dat 'n veearts elke besending na hul bestemming vergesel, en alle diere wat uitgevoer word aan streng Australiese ­dierewelsynstandaarde onderwerp word.

Nieu-Seeland het op 3 September alle ­uitvoere op lewende hawe opge­skort. In Israel is 'n wet om die invoer van lewende diere uit te faseer, voorlopig deur die parlement in die vroeë stadiums goed­gekeur.



'ARGAÏES'

Nawa het ook vandeesweek opgemerk daar is onvoldoende maatreëls om die welsyn van diere in beknopte toestande op skepe te verseker.

Namibië se dierebeskermingsvereniging (DBV) het vandeesweek hul sterk teenkanting teen die ­voorgestelde sakeplan uitgespreek.

“In 2020 is daar geen regverdige rede om die­re 7 000 km per see te vervoer om 'n moontlike wrede dood in 'n vreemde land te verduur nie, veral aangesien die Midde-Ooster­se lande tans groot hoeveelhede koue- en bevrore vleis invoer,” het die DBV gesê.

Die DBV het ­bygevoeg dié praktyk ondermyn die Namibiese wette en ­standaarde vanuit 'n regsperspektief.

Die organisasie het gewaarsku indien die groen lig gegee word vir die uitvoer van lewende hawe per see, dit steun sal wys vir “argaïese handel wat sukkel om maatskaplike goedkeuring in vandag se tyd te behou”.

Hulle wys uit dié handel kon tot dusver alleenlik voortgaan vanweë die geheimhouding waaronder diere al dekades lank uitgevoer word.



NIE LEWENSVATBAAR

Die organisasie het ook benadruk dit is vanuit 'n ekonomiese perspektief beter om vleis in Namibië te verwerk.

Wat die verkryging van die voldoende aantal diere betref, kan ­Tradeport Namibia voor uitdagings te staan kom.

Mnr. Paul Strydom van die Namibiese Vleisraad het Dinsdag in 'n kort verklaring benadruk dat Botswana tans 'n verbod op die uitvoer van beeste na Namibië en Suid-­Afrika het.

Hy wys daarop dat Suid-Afrika sy vrystatus vir bek-en-klouseer van die Wêreldorganisasie vir Dieregesondheid (OIE) verloor het en dus nie vee in dié hoeveelhede na Namibië kan uitvoer nie.

Strydom sê: “Vee-uitvoere per see is teen Namibië se 'Growth at Home'-­strategie en is nie 'n voorkeur-uitvoermetode nie.”

Ten slotte het hy verduidelik Namibië se ­veegetalle ná die droogte lyk nie goed nie, wat die vraag laat ­ontstaan het oor die “lewensvatbaarheid van hierdie plan”.

Mnr. Monty Ndjavera van Tradeport Namibia het dié week gesê hy is nie bewus van die klag­skrif nie.

Volgens hom is hulle 'n “logistieke ­maatskappy wat wil deel wees van enig­iets wat met vervoer te doen het. Maar ons wil nie enige wette oortree nie, plaaslik, internasionaal of andersins.”

Hy het benadruk die voorgestelde plan is nou eers in die beginfase.

Ndjavera het gesê as daar probleme met so 'n sakeonderneming is, kan hulle die idee laat vaar en iets anders begin.



DRYWENDE ­VOERKRALE

Mnr. Tony Gerrans, Afrika se uitvoerende direkteur vir die Humane Society International (HSI), het onlangs geskryf “die vervoer van tienduisende diere op 'n vaartuig beteken dat hulle 21 dae in beknopte krale moet deurbring sonder behoorlike kos en ­versorging, terwyl hulle in hul eie ontlasting staan en ammoniak inasem wat kan lei tot ­respiratoriese probleme, terwyl hulle blootgestel word aan die ­konstante geraas van die skip se enjins, asook aan hitte-uitputting wat so erg kan wees dat die diere kan doodgaan.”

Van die ernstige welsynskwessies wat deur die jare deur diereregte-organisasies gedokumenteer is, is dat die diere in beperkte ruimtes in hokke op verskeie dekke aangehou word, terwyl hulle op harde staalvloere moet staan wat nie geskik is vir diere met hoewe nie.

Hulle staan dikwels so styf teen mekaar dat hulle nooit gedurende die reis kan gaan lê nie.

Die ontlasting en urine van duisende skape word deur die hele reis nie skoongemaak nie, wat die diere dwing om in mekaar se ontlasting te staan, wat tot infeksie kan lei.

Skape word met korrels gevoer wat kan lei tot spys­verteringskwessies vir herkouers wat daaraan gewoond is om gras te vreet.

Sommige diere kan sukkel om die outomatiese voedsel- en ­waterkrippe te bereik, wat boonop deur ontlasting besmet kan word.

[email protected]

Soortgelyk

 

Min kans vir vlieg na SA

1 uur gelede | Toerisme

Ronelle Rademeyer - Hoewel Suid-Afrika Donderdag sy grense vir besoekers uit goedgekeurde lande, waaronder Namibië, heropen, moet Namibiërs vir eers verlief neem met die feit...

Remaining powerful through education

1 uur gelede | Mense

Ester Kamati With a key interest in space science and the history of science, watching videos on these topics is Hosea Hashili’s favourite pastime. Hasili...

Weer, Dinsdag 29 September 2020

1 uur gelede | Weer

BINNELAND: Sonnig en warm tot baie warm, maar baie warm in die Noorde. Enkele wolke sal na verwagting oor die Zambezistreek voorkom.KUS: Gedeeltelik bewolk en...

Vroeggebore tweeling sterk goed aan

1 uur gelede | Gesondheid

Henriette Lamprecht - Twee maande nadat hulle te vroeg op 27 weke in die Lady Pohamba Private Hospitaal in Windhoek gebore is, kan die ouers...

Nuwe Fenata-voorsitter vanuit ontluikende toerismebedryf

1 uur gelede | Toerisme

Francoise Steynberg - Geskiedenis is gemaak toe die nuwe voorsitter van die Namibiese Toerismevereniging (Fenata), me. Netumbo Nashandi, vir die eerste keer uit die geledere...

Onopgeloste verdwynings, moorde stapel op

1 uur gelede | Misdaad

Ellanie Smit – Terwyl die familie van die 22-jarige me. Shannon Darlikie Wasserfall met die trauma van haar verdwyning ses maande gelede worstel, dreig die...

One ­Africa TV ­partners with NMH

1 uur gelede | Onderwys

Distributed through Namibia Media Holdings' (NMH) youth brand, My Zone, the newly added grade zero to seven lessons form part of a ­collaboration with the...

A look at National Readathon, Heritage Week

1 uur gelede | Onderwys

Enzo AmueleThe National Readathon and Heritage Week, which were launched by the minister of education, arts and culture Ester Nghipondoka, took place last week.The Readathon...

Dagboek vir die landbouer

1 uur gelede | Landbou

Agra ProVision se kursusseAgra ProVision bied van 5 tot 8 Oktober 'n kursus oor plaasbestuur in Windhoek aan en daarna van 6 tot 8 Oktober...