Ministerie sê oor wilde perde

Tanja Bause – Die ministerie van die omgewing en toerisme het ’n mediaverklaring uitgereik waarin hulle bevestig hulle bewus is van die kommer oor die wilde perde by Garub in die ||Kharasstreek se welsyn.

“Ons is bewus van die uitdagings wat die perde in die gesig staar, soos die droogte en die hiënas, en ons werk aan ’n oplossing,” lui die verklaring.

Die ministerie het nog geen finale besluit geneem oor die verskuiwing van die perde of oor hoeveel perde verskuif gaan word nie.

“Ons werk egter aktief aan ‘n oplossing en ons besluit sal gebaseer wees op wat die beste vir die perde en die toerismesektor sal wees,” lui die verklaring.

“Ons verseker die gemeenskap dat alle aspekte oorweeg sal word wanneer besluite oor die welsyn en die oorlewing van hierdie diere geneem word. Ons bedank die gemeenskap en die toerismesektor vir hul ondersteuning om die oorlewing van die perde te verseker,” lui die verklaring.

Dié verklaring volg nadat mnr. Romeo Muyunda, woordvoerder van die ministerie, verlede week telefonies aan Republikein gesê het die ministerie sal van die perde skuif sodra beskikbare grond gevind is.

“Die ministerie het voorlopig ingestem dat sommige van die perde geskuif word, maar die plek waarheen hulle geskuif sal word, moet nog geïdentifiseer word,” het Muyunda gesê.

“Ons gaan van die perde skuif sodat die ekostelsel nie versteur word nie. Ons wil ook verseker die perde sterf nie uit nie. Hulle word na ’n plek verskuif waar daar genoeg kos vir hulle is en waar hulle kan aanteel,” het hy gesê.

Hy het ook gesê dit sal net ’n tydelike oplossing wees en dat die perde terug na Garub geneem sal word sodra hul populasie weer stabiel is.