Ministerie druip oudit

Te min personeel, te veel pasiënte

16 June 2017 | Ministeries
Henriette Lamprecht



Te min gesondheidswerkers, gestaakte uitreikaksies, geen of vervalle akkommodasie vir mediese personeel op die platteland en 'n gebrek aan ten volle toegeruste ambulanse en bestuurders.

Dít is van die bevindinge van 'n prestasie-oudit op die ministerie van gesondheid en maatskaplike dienste (MoHSS).

Die verslag deur die ouditeur-generaal dek die tydperk tussen 2012 en 2015.

Hiervolgens vertraag die gebrek aan spaaronderdele en tegnici die instandhouding van mediese toerusting, terwyl sommige ambulanse weens die hoë aantal kilometers dikwels tot stilstand stotter.

Sale in hospitale en klinieke laat ook meer pasiënte toe as wat hulle kan akkommodeer. Pasiënte het geen ander opsie as om by tye op vloere, in gange, in stoorkamers of selfs in die kafeteria te slaap nie. Afgesien daarvan dat dit tot 'n “mengsel van pasiënte met verskillende siektes” lei, het dit ook swak gesondheidsdienste tot gevolg.

Volgens die verslag frustreer die diensleweringsproses pasiënte én personeel. Veral die lang rye waarin pasiënte moet wag voordat hulle behandeling ontvang, veroorsaak frustrasie. Die verslag sê personeeltekorte word veroorsaak deur 'n gebrek aan plaaslike gesondheidslui.

Die lang wagtydperk vir die uitreiking van 'n werkspermit aan buitelandse personeel het wel verbeter met die bekendstelling van 'n werkersvisum waarvan die wagtydperk drie maande is.

Onvoldoende akkommodasie op die platteland ontmoedig gesondheidswerkers ook om hier vir poste aansoek te doen.

Die tekort aan mediese toerusting, instrumente en spaaronderdele vir herstelwerk, asook onvoldoende vervoer vir pasiënte in veral afgeleë gebiede, plaas 'n reusedemper op die verskaffing van optimale gesondheidsorg.

Volgens die verslag is die hoogste afstandlesing vir 'n ambulans in die Otjozondjupastreek aangeteken as 695 661 km.

'n Ambulans by die Katutura-staatshospitaal se afstandmeter het op 349 795 km gestaan.

Veral in die afgeleë noordelike gebiede beskik sommige distrik­sentrums oor geen vervoer nie en moet daar by die distrikshospitaal aangeklop word om pasiënte te vervoer.

Dikwels is daar egter geen ambulanse of bestuurders hiervoor beskikbaar nie.

Oor die gebrek aan hospitaalbeddens sê die ministerie dit is nie iets wat verhoed kan word nie.

Volgens die verslag moet bevolkingsgrootte in ag geneem word wanneer gesondheidswerkers na verskillende gesondheids­geriewe uitgeplaas word sodat lang wagtydperke vir pasiënte vermy kan word. Volgens pasiënte wag hulle tussen een en drie ure by veral distriks- en verwysingshospitale om 'n dokter te sien.

Die Wêreldgesondheidsorganisasie (WHO) se maatstaf bepaal dat 2,5 gesondheidswerkers vir 'n 1 000 inwoners beskikbaar moet wees. Verskeie klinieke in die land is ver onder dié standaard.

Danksy ernstige personeeltekorte is daar by die Orwetoveni-kliniek ses gesondheidswerkers vir 37 854 inwoners, by die Donkerhoek-kliniek vyf vir 33 245 inwoners, by die Hakana-kliniek sewe vir 35 565 inwoners, by die Katutura HC-kliniek 61 vir 99 738 inwoners en by die Robert Mugabe-kliniek 11 vir 73 450 inwoners.

Soortgelyk

 

Vrou se liggaam in Goreangabdam gevind

21 ure gelede | Misdaad

Die liggaam van ‘n ongeïdentifiseerde vrou is Donderdagnag in die Goreangabdam by Windhoek gevind. ‘n Woordvoerder van die Namibiese polisie, hoofinsp. Kauna Shikwambi, het vandag...

Dr. Malan Lindeque op lys vir hoë posisies by...

22 ure gelede | Omgewing

Die kabinet het besluit om dr. Malan Lindeque, permanente sekretaris van die omgewing en toerisme, se nominasie vir top-posisies by die Verenigde Nasies (VN) goed...

Nuwe raad vir NPTH

22 ure gelede | Tegnologie

Die adjunkminister van inligting en kommunikasietegnologie mnr. Engel Nawatiseb het vandag die nuutste kabinetsbesluite aangekondig, asook die goedgekeurde nuwe raad van die Namibia Post and...

ECB keur kragtarief-verhoging van 5% goed

23 ure gelede | Energie

Die Elektrisiteitsbeheerraad (ECB) het vanoggend die nasionale kragverskaffer NamPower toestemming te gee om die grootmaat-elektrisiteitstarief met 5% te verhoog. NamPower het op 12 April aansoek...

Muilband-aansoek deur Intelligensiediens oor plase in die hof

1 dag gelede | Howe

Die verhoor van die dringende aansoek vir ‘n interdik waarmee die Namibië se Sentrale Intelligensiediens (NCIS) ‘n weekblad se mond oor moontlike korrupsie met die...

Verwarring oor taxistaking

1 dag gelede | Vervoer

Hoewel die president van die Namibiese Vervoer- en Taxivakbond (NTTU), mnr. Werner Januarie, sê taxi’s gaan eerskomende Maandag staak, sê die president van die...

Seuntjie (3) sterf ná glo met stok geslaan is

1 dag gelede | Misdaad

‘n Driejarige seuntjie het Woensdag in die Otjomukandi-nedersetting in die Kunenestreke gesterf nadat sy 34-jarige tannie hom glo met ‘n stok oral op sy lyf...

Geingob nooi Britse ondernemings na Namibië

1 dag gelede | Regering

Pres. Hage Geingob het gister (Donderdag) saam met 45 ander staatshoofde die amptelike opening van die Statebondsberaad as gas van koningin Elizabeth by Buckingham Paleis...

Hoop in 'n bondeltjie liefde

1 dag gelede | Omgewing

Hope, die bobbejaan wat in 2016 in die nuus was nadat sy in Windhoek erg mishandel is, het ma geword. Ná sy gered is, het...