Minister sluit Educare se deure
Enkele dae nadat ’n onwettige skool in Windhoek ’n ministeriële opdrag gekry het om sy deure te sluit, is ouers gevra om hier vir direkteursposte aansoek te doen.
Henriette Lamprecht – Die minister van onderwys, kuns en kultuur het Vrydag skriftelik instruksie gegee dat Educare Windhoek sy deure moet sluit.
Die opdrag om “alle werksaamhede van die skool” te staak, tree met die ontvangs van die brief in werking. Die skool het Vrydag vir die ontvangs geteken.
Minister Katrina Hanse-Himarwa het ook opdrag gegee dat Educare Windhoek alle vooruitbetalings deur ouers en voogde vir inskrywings van leerlinge vir aanstaande jaar moet terugbetaal. Skoolgelde vir aanstaande jaar is met 17% deur die skool verhoog.
Alle rolspelers moet voorts ook van die skool se sluiting in kennis gestel word. Die ministeriële opdrag kom in terme van bepaling 46 (a) – (b) en 47 (1) van die onderwyswet.
Educare Windhoek is sedert die skool sy deure geopen het, nooit by die ministerie geregistreer nie en is gevolglik onwettig bedryf. In terme van die onderwyswet word ’n private skool verplig om die skool in terme van bepaling 41 as sulks te registreer, alvorens onderrig deur enige persoon by die skool verskaf word.
Intussen het die permanente sekretaris, me. Sanet Steenkamp, beklemtoon dat leerlinge van die skool wat nou ’n ander heenkome moet soek, se toekoms nie verby is nie.
“Almal het ’n duur les geleer, maar al het die leerlinge dalk ’n jaar verloor, het hulle nie hul toekoms verloor nie.”
Sy het ouers aangemoedig om kinders weer te probeer terugplaas by skole waar hulle as leerlinge ingeskryf was vóór hulle by Educare Windhoek ingeval het.
Steenkamp het voorts ’n beroep op ouers gedoen om aan te dring op ’n registrasiesertifikaat van die ministerie, alvorens leerlinge ingeskryf word.
“Dié sertifikaat is ’n waarborg en stempel van goedkeuring dat jou kind in goeie hande is.”
Sy het beklemtoon dat die ministerie se deur oop is vir ouers en leerlinge van Educare Windhoek.
“Ons hart lê by die ouers en die kinders.”
In ’n skrywe wat Maandag aan ouers van leerlinge aan die skool uitgereik is, het Educare Windhoek egter probeer om die skool aan ouers, grootouers en voogde te verkoop.
Tydens ’n vergadering van die skoolraad verlede Dinsdag het die huidige hoof uitvoerende beampte, mnr. Wihan Brand, die skool “aan die ouers aangebied om oor te neem”. Die voorsitter van die skoolraad, mnr. Wessel Burger, het egter gevoel dié besluit berus by die ouers. Donderdag is tydens ’n vergadering met rolspelers besluit om twee opsies aan ouers te bied.
Volgens die eerste opsie (Artikel 21-maatskappy) maak alle huidige ouers/grootouers/voogde ’n eenmalige betaling van N$10 000 aan Brand om sy belegging in Educare Windhoek uit te koop. Alternatiewelik kan agt beleggers elk N$450 000 aan Brand oorbetaal om hom uit te koop.
Die tweede opsie (vereniging sonder winsgewende doel) behels ’n raad van nege direkteure wat deur die huidige skoolraad aangewys word. Die direkteure sluit in ’n rekenmeester, regsadviseur, menslike hulpbronne-bestuurder, sportbestuurder, swart bemagtigings of politieke raadgewer (senior politikus of gemeenskapsleier) ’n bestuurder vir inligtingstegnologie, sowel as hoofde vir die primêre en sekondêre skool in. Vereistes vir die direkteure sluit die gepaste kwalifikasies en ondervinding in. Die hoof uitvoerende beampte moet ’n meestersgraad in sakebestuur met ’n minimum ondervinding van vyf jaar hê. Vir dié opsie bly Brand aan as hoof uitvoerende beampte.
Ook moet die direkteure ’n “lid van die skool wees, met skoolgelde wat ten volle vereffen is”. Sou daar nie aan die vereistes voldoen word nie, kan die raad van direkteure persone op ’n ad hoc-basis aanwys. Die aangewese persone het egter nie stemregte nie.
Tydens die vergadering met rolspelers het 78 ten gunste van opsie twee gestem met Brand wat as hoof uitvoerende beampte aanbly. Kennis is ook gegee dat Educare Windhoek na ’n vereniging sonder winsgewende belang verander in afwagting op die skool se nuwe registrasie as private skool by die ministerie.
Die skrywe aan ouers dien ook as ’n “amptelike bevestiging aan ouers oor die toekoms van die skool”. Ouers word ook aangemoedig om so gou as moontlik vir die direkteursposte aansoek te doen.
Die opdrag om “alle werksaamhede van die skool” te staak, tree met die ontvangs van die brief in werking. Die skool het Vrydag vir die ontvangs geteken.
Minister Katrina Hanse-Himarwa het ook opdrag gegee dat Educare Windhoek alle vooruitbetalings deur ouers en voogde vir inskrywings van leerlinge vir aanstaande jaar moet terugbetaal. Skoolgelde vir aanstaande jaar is met 17% deur die skool verhoog.
Alle rolspelers moet voorts ook van die skool se sluiting in kennis gestel word. Die ministeriële opdrag kom in terme van bepaling 46 (a) – (b) en 47 (1) van die onderwyswet.
Educare Windhoek is sedert die skool sy deure geopen het, nooit by die ministerie geregistreer nie en is gevolglik onwettig bedryf. In terme van die onderwyswet word ’n private skool verplig om die skool in terme van bepaling 41 as sulks te registreer, alvorens onderrig deur enige persoon by die skool verskaf word.
Intussen het die permanente sekretaris, me. Sanet Steenkamp, beklemtoon dat leerlinge van die skool wat nou ’n ander heenkome moet soek, se toekoms nie verby is nie.
“Almal het ’n duur les geleer, maar al het die leerlinge dalk ’n jaar verloor, het hulle nie hul toekoms verloor nie.”
Sy het ouers aangemoedig om kinders weer te probeer terugplaas by skole waar hulle as leerlinge ingeskryf was vóór hulle by Educare Windhoek ingeval het.
Steenkamp het voorts ’n beroep op ouers gedoen om aan te dring op ’n registrasiesertifikaat van die ministerie, alvorens leerlinge ingeskryf word.
“Dié sertifikaat is ’n waarborg en stempel van goedkeuring dat jou kind in goeie hande is.”
Sy het beklemtoon dat die ministerie se deur oop is vir ouers en leerlinge van Educare Windhoek.
“Ons hart lê by die ouers en die kinders.”
In ’n skrywe wat Maandag aan ouers van leerlinge aan die skool uitgereik is, het Educare Windhoek egter probeer om die skool aan ouers, grootouers en voogde te verkoop.
Tydens ’n vergadering van die skoolraad verlede Dinsdag het die huidige hoof uitvoerende beampte, mnr. Wihan Brand, die skool “aan die ouers aangebied om oor te neem”. Die voorsitter van die skoolraad, mnr. Wessel Burger, het egter gevoel dié besluit berus by die ouers. Donderdag is tydens ’n vergadering met rolspelers besluit om twee opsies aan ouers te bied.
Volgens die eerste opsie (Artikel 21-maatskappy) maak alle huidige ouers/grootouers/voogde ’n eenmalige betaling van N$10 000 aan Brand om sy belegging in Educare Windhoek uit te koop. Alternatiewelik kan agt beleggers elk N$450 000 aan Brand oorbetaal om hom uit te koop.
Die tweede opsie (vereniging sonder winsgewende doel) behels ’n raad van nege direkteure wat deur die huidige skoolraad aangewys word. Die direkteure sluit in ’n rekenmeester, regsadviseur, menslike hulpbronne-bestuurder, sportbestuurder, swart bemagtigings of politieke raadgewer (senior politikus of gemeenskapsleier) ’n bestuurder vir inligtingstegnologie, sowel as hoofde vir die primêre en sekondêre skool in. Vereistes vir die direkteure sluit die gepaste kwalifikasies en ondervinding in. Die hoof uitvoerende beampte moet ’n meestersgraad in sakebestuur met ’n minimum ondervinding van vyf jaar hê. Vir dié opsie bly Brand aan as hoof uitvoerende beampte.
Ook moet die direkteure ’n “lid van die skool wees, met skoolgelde wat ten volle vereffen is”. Sou daar nie aan die vereistes voldoen word nie, kan die raad van direkteure persone op ’n ad hoc-basis aanwys. Die aangewese persone het egter nie stemregte nie.
Tydens die vergadering met rolspelers het 78 ten gunste van opsie twee gestem met Brand wat as hoof uitvoerende beampte aanbly. Kennis is ook gegee dat Educare Windhoek na ’n vereniging sonder winsgewende belang verander in afwagting op die skool se nuwe registrasie as private skool by die ministerie.
Die skrywe aan ouers dien ook as ’n “amptelike bevestiging aan ouers oor die toekoms van die skool”. Ouers word ook aangemoedig om so gou as moontlik vir die direkteursposte aansoek te doen.
Kommentaar
Republikein
Geen kommentaar is op hierdie artikel gelaat nie