Minister Namoloh oor polisiebrutaliteit gepols

733 dossiere vir verdere ondersoek teruggestuur

15 March 2019 | Ministeries
Catherine Sasman – Die minister van veiligheid en sekuriteit, mnr. Charles Namoloh, sê sy ministerie maak nie staat op mediaberigte oor die beweerde toename in polisiebrutaliteit teenoor lede van die publiek nie.

Volgens hom reageer die ministerie slegs op formele klagtes en verslae.

Hy sê elke streek het afdelings vir interne ondersoeke, wat net op klagtes oor polisiebeamptes fokus, en voeg by enige gegriefde persoon moet formele klagtes indien.

Namoloh het gereageer op vrae deur die Popular Democratic Movement (PDM) se parlementslid, mnr. Nico Smit, oor beweerde “ontstellende verslae” in koerante oor polisieaanrandings sedert Desember.

In Januarie het mans en vroue oor aanrandings en vernedering deur lede van die spesiale taakmag in die polisieselle op Okahandja gekla.

In dieselfde maand het ‘n man op Swakopmund gekla hy is in ‘n polisiewa gegooi en ‘n hele dag lank onwettig aangehou sonder enige klag teen hom, ná hy foto’s op die strand geneem het waar polisiebeamptes besig was om vissermanne te verwyder.

Op Karasburg het twee mans gekla hulle is aangerand en sonder enige rede met pepersproei gespuit.

Volgens Namoloh word bewerings van polisiebrutaliteit geëvalueer en ondersoek.

Hy sê afhangende van die meriete van elke bewering word strafregtelike of departementele sake geopen en na die kantoor van die aanklaer-generaal vir ‘n besluit verwys.

Alternatiewelik word dit na die polisie se eenheid vir interne ondersoeke vir ‘n departementele verhoor verwys.

Volgens Namoloh is slegs drie gevalle van beweerde polisiebrutaliteit die afgelope 18 maande voltooi. Een van die gevalle is tans op die hofrol in die Otjozondjupastreek. In die Omahekestreek is ‘n polisiebeampte tot 33 jaar tronkstraf gevonnis. Die derde geval was in die Khomasstreek waar ‘n polisiebeampte selfmoord gepleeg het kort ná hy sy meisie vermoor het.

Smit wou van Namoloh weet of dit ‘n misdaad is om foto’s van polisiebeamptes te neem waar hulle hul pligte uitvoer.

Volgens Namoloh is daar tans geen wet wat dit verbied nie, maar sommige misdaadtonele vereis verdere ondersoek en die afneem of publisering van die tonele kan sulke ondersoeke in die wiele ry.

“Die afneem en publisering kan in sommige gevalle daartoe lei dat die misdaadtoneel besmet word,” het Namoloh gesê.

Hy het beklemtoon polisiebeamptes word “nooit aangemoedig” om lede van die publiek aan te rand nie en is opgelei om hulself te alle tye in ooreenstemming met die wet te gedra.

“Natuurlik sal jy as mense ‘n paar kry wat die wet en polisieregulasies oortree.”

Volgens die strafproseswet word polisiebeamptes gemagtig om die minimum geweld te gebruik om iemand in hegtenis te neem of wanneer iemand hulle teësit.

Smit het ook sy kommer uitgespreek oor die groot aantal onopgeloste moorde op jong meisies en vroue, en die beweerde onvermoë van die polisie om ernstige misdade te ondersoek.

Namoloh het erken van 2014 tot 2018 is 733 dossiere vir verdere ondersoek teruggestuur.

“Dit beteken nie die ondersoeke is ‘n mislukking nie. Vir vervolging om voort te gaan, is prima facie-bewyse nodig,” het Namoloh gesê.

Volgens hom het die polisie en die kantoor van die aanklaer-generaal nou begin met ondersoeke met die oog op vervolging om te verseker elkeen word behoorlik volgens die vereistes van die hof gelei.

Namoloh sê nie alle dossiere wat nie in die hof beland, verdwyn nie, maar word eerder “tydelik verlê”.

Volgens hom sal dié omstandighede met die instelling van ‘n elektroniese databasis verbeter.

Met verwysing na die saak waarin wyle mnr. André Heckmeir na bewering deur twee Amerikaners, mnre. Kevin Townsend en Marcus Tomas vermoor is, het hy gesê dit sloer omdat die beskuldigdes hul prokureurs voortdurend afdank om nuwes aan te stel.

Volgens Namoloh is daar “verskeie redes” vir vertragings in die Caprivi-hoogverraadverhoor.

Een hiervan is die beskuldigdes se vertragingstaktieke.

Hulle voer aan hulle is nie Namibiërs nie en kan daarom nie in Namibiese howe vervolg word nie.

Nog ‘n rede is die groot aantal beskuldigdes wat terselfdertyd van verskillende oortredings aangekla is, en die lang proses om vir regshulp en private regsgeleerdes aansoek te doen.

Soortgelyk

 

Eis van miljoene ná miskraam

21st of May 00:00 | Howe

Ronelle Rademeyer - ‘n Vrou wat aanvoer sy het ‘n miskraam gehad nadat sy drie dae lank sonder kos en water in die polisieselle by...

Kuns tussen die wingerde

21st of May 00:00 | Byvoegsels

Ronelle Rademeyer - “Ek glo ’n goeie skildery ontstaan wanneer ’n bietjie talent en ’n groot klomp passie op die skilderdoek ontmoet.”Dit is hoe die...

Twee Namibiërs in SA hof oor diamante

21st of May 00:00 | Howe

Francoise Steynberg - Twee Namibiese mans het gister in die Bellville-landdroshof in Kaapstad in verband met die onwettige besit van 27 ongeslypte diamante verskyn. Mnr....

Namibiër vertolk hoofrol in Fiela se kind

21st of May 00:00 | In beeld

Die Namibiese aktrise Zenobia Kloppers het die hoofrol in die fliek Fiela se kind losgeslaan. Zenobia, wat Fiela Komoetie sal speel, is ’n bekende aktrise...

Live for the moments, not the milestones

21st of May 00:00 | Mense

Mariselle StofbergCarla van Zyl is the top medical student from the class of 2018 at the University of Namibia (Unam). This motivated, driven and passionate...

Musieklegende se stem stil

21st of May 00:00 | Kuns en vermaak

Lloyd Zandberg - Die geliefde Suid-Afrikaanse musikant, Brian Finch (72), het Sondag sy maande lange stryd teen kanker verloor.Finch en sy vrou, Marion, woon al...

Padgebruik al duurder

21st of May 00:00 | Infrastruktuur

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Weer vir 21 Mei 2019

21st of May 00:00 | Weer

BINNELAND: Mestal mooi weer en baie warm in die Noordooste. Elders sal dit gedeeltelik bewolk en warm tot baie warm, maar koud in die...

Kragverspreider gedagvaar

21st of May 00:00 | Howe

Henriette Lamprecht – ’n Ma van Mondesa op Swakopmund dagvaar die Erongostreek se kragverspreider ná die dood van haar minderjarige dogter. Theonese Anthea Simon is...