Miljarde later verlaat albatrosse die land

Meer as N$3 miljard vir huur van A330’s

29 April 2021 | Regering
Ronelle Rademeyer – Die twee Airbus A330-220-vliegtuie wat sedert September 2013 ’n baie duur albatros om die nek van Namibiese belastingbetalers was, het gister hul swanevlug uit die land onderneem.

Dié twee vliegtuie, wat tot in Maart verlede jaar op die Windhoek-Frankfurt-roete in gebruik was, is deur kapteins Warren Zehrt, André Davids, Leon Maritz en Teeleleni Kakehongo na die Halle-lughawe by Leipzig in Duitsland gevlieg.

Die vliegtuie sal daar onderhoudswerk ondergaan om dit in sodanige toestand te kry dat dit aan die kontrakvoorwaardes van Castlelake Aviation voldoen.

Air Namibia, wat verlede maand finaal gelikwideer is, het in 2013 ’n kontrak met hierdie Amerikaanse vliegtuigverhurings- en finansieringsmaatskappy aangegaan en dié twee vliegtuie in gebruik geneem.

Met Air Namibia se likwidasie op hande, moes mnr. Leon Jooste, minister van staatsondernemings (SOE’s), in aller yl met Castlelake Aviation onderhandel om ’n skikking ten opsigte van dié kontraktuele verpligting te bereik. Die regering het ’n waarborg van N$2,5 miljard verskaf, en die vrees het bestaan dat Castlelake Aviation die waarborg sou oproep.

Jooste het gister aan Republikein gesê die regering is nog besig om “die finale detail van die skikkingsooreenkoms te onderhandel”.

“Ons het wel reeds ooreengekom wat die basiese kommersiële terme en beginsels sal wees,” sê Jooste.

Op ’n vraag aan hom oor hoeveel hierdie twee vliegtuie die Namibiese belastingbetaler gekos het sedert dit in September 2013 in gebruik geneem is, het hy gesê ’n finale syfer kan eers na afloop van die skikkingsooreenkoms bekend gemaak word.

Namibië is tans in jaar agt van die 12 jaar-huurkontrak. Dié kontrak het die nasionale redery maandeliks US$1,1 miljoen (N$15,59 miljoen) per vliegtuig gekos – dus meer as N$3 miljard oor dié tydperk teen die huidige wisselkoers.

Volgens Jooste het die maandelikse verlies op die Frankfurt-roete egter veel meer beloop.

Halle-lughawe in Leipzig is bekend vir vliegtuigherstel- en onderhoudswerk deur verskeie diensverskaffers soos Lufthansa Technik AG en ander. Daar is selfs ’n klankdigte vliegtuigloots wat groot genoeg is om aan die Airbus A380 te kan werk.

Die vermaakstelsels op die twee A330’s sal onder meer herstel moet word, het Republikein vroeër berig.

Die vliegtuie sal in Liepzig die nodige onderhoudswerk ondergaan sodat dit in presies die toestand is waarin dit destyds in ontvangs geneem is.

Daarna sal dit aan Air Lease 82 in Ierland oorhandig word. Dié verhuringsmaatskappy is deel van Castelake Aviation.

- [email protected]

Soortgelyk

 

Skoolhoof van Swakop sterf aan Covid-19

9 ure gelede | Mense

Ronelle Rademeyer – Huldeblyke het gister uit onderwys- en ander kringe ingestroom nadat die skoolhoof van Pro-Ed Akademie se hoër­skool op Swakopmund, mnr. Henry McCarthy,...

ReconAfrica voor hof gedaag

9 ure gelede | Howe

Ronelle Rademeyer – Reconnaissance Energy Africa (ReconAfrica) het sonder konsultasie of vooraf kennisgewing die natuurlike woud en landerye wat wettiglik deur 'n familie by Mbambi...

Weer vir 10 Mei 2021

9 ure gelede | Weer

BINNELAND: Sonnig en warm tot baie warm in die Suide. Elders sal dit gedeeltelik bewolk en warm tot baie warm wees.KUS: Gedeeltelik bewolk en warm...

Nog NBC-werkers keer terug

9 ure gelede | Arbeid

Hoewel die NBC-staking landswyd voortduur, het 74 werknemers intussen teruggekeer werk toe en is die Engelse radiodiens, National FM, weer terug op die lug. Die...

Noodkreet teen misdaadvlaag

9 ure gelede | Misdaad

Tunohole Mungoba op Oshakati – Die Oshakati-stadsraad het Donderdag 'n openbare vergade­ring in Okandjengeni-Suid op dié dorp gehou waar verskeie veiligheidskwessies geopper en klagtes teen...

Dwelms van amper N$2 miljoen gekonfiskeer

9 ure gelede | Misdaad

Volgens die Namibiese polisie is in April meer mense in besit van dwelms in hegtenis geneem as gedurende Maart. In Maart is 106 mense in...

Nuwe lewe in onooglike kraghuis geblaas

9 ure gelede | Kuns en vermaak

Claudia Reiter – Die kunstenaars Kat en Lens het die mure van 'n transformator-substasie in Conrad Ruststraat in Klein Windhoek geverf en verfraai. “Ons ry...

Geen partytjie vir Nujoma

9 ure gelede | Gemeenskap

Die kantoor van die stigterspresident Sam Nujoma het aangekondig hy gaan nie op 12 Mei sy 92ste verjaardag met 'n openbare byeenkoms vier nie. Dié...

Betaaldag hier vir Air Namibia se personeel

9 ure gelede | Vervoer

Ogone Tlhage – Die minister van openbare ondernemings (SOE's), mnr. Leon Jooste, het bevestig die regering het 'n gedeelte betaal van die N$278 miljoen wat...