Meganiese kenner gelooi

Graham onder kruisondervraging

22 November 2018 | Howe
Erwin Leuschner op Swakopmund - Die moordverhoor van mnr. Jandré Dippenaar het die afgelope twee dae in die streekhof op Swakopmund voortgeduur met 'n uitmergelende kruisondervraging van die staatsgetuie mnr. Martin Graham, wat die meganiese aspekte van beide voertuie bestudeer het wat by die gru-ongeluk betrokke was.

Graham het knap ná die ongeluk op 29 Desember 2014 saam met mnr. Johan Joubert, 'n kundige op die gebied van ongelukrekonstruksie, na Namibië gereis om die oorsaak van die ongeluk te ondersoek.

Terwyl Graham geen meganiese foute by een van die twee voertuie kon vind nie, het Joubert die ongeluk gerekonstruktueer deur afmetings, berekeninge en verklarings van getuies te gebruik.

Tydens sy kruisondervraging het Graham volgehou hy het in beide rigtings op die pad van die ongelukstoneel geloop en 'n "aansienlike blinde hoogte" opgemerk. Hy het dit ook as 'n "baie steil blinde hoogte" beskryf.

Hoewel verskeie ander staatsgetuies die blinde hoogte in die hof genoem het, het Dippenaar se regsverteenwoordiger, adv. Louis Botes, dié beweringe weerlê.

"Het jy die heuwel of die helling gemeet?" het Botes gevra, wat Graham ontken het.

Botes het bygevoeg 'n foto wat 'n blinde hoogte uitbeeld, is ingesluit in die verslag wat deur Graham en Joubert saamgestel is, maar die foto is nie by die ongelukstoneel geneem nie.

"Ek vind dit verskriklik belaglik dat julle 'n foto van 'n beweerde blinde hoogte insluit," het Botes gesê.

Botes het ook heelwat tyd bestee aan vrae oor 'n sogenaamde skuurmerk wat Graham en Joubert aan die regterkant van die pad (in die rigting van Hentiesbaai vanaf Swakopmund) voor die ongeluk opgemerk het.

Albei het tot die slotsom gekom dat hierdie merk deur die Toyota FJ Cruiser, wat Dippenaar bestuur het, veroorsaak is toe hy voertuie verbygesteek het en die linkervoorband die pad verlaat en die merk gelaat het.

Botes het dit as onwaar beskryf en Graham daarvan beskuldig dat hy die skuurmerk opgemaak het om hul weergawe van die ongeluk te ondersteun.

Botes het gesê die betrokke merk strook nie met die ongelukstoneel nie, terwyl Graham dit ontken het.

Tydens hul ondersoeke het beide Graham en Joubert 'n duik aan die linkerkant van die soutpad op die ongelukstoneel waargeneem. Dit is volgens hulle ná die ongelukstoneel agtergelaat en was vir dae ná die ongeluk nog sigbaar.

Botes het gesê die pad is kort ná die ongeluk deur 'n padskraper geskraap. Graham het geantwoord die duik was steeds "baie prominent sigbaar" toe hy die ongelukstoneel besoek het.

"Dit was die eerste keer dat ek 'n ongelukstoneel ondersoek het waar die pad kort daarna geskraap is," het Graham gesê.

Gister het die verdediging met Graham se kruisondervraging voortgegaan.

Adv. Botes wou by Graham weet hoe hy kan beweer wat die oorsaak van die ongeluk was, aangesien hy slegs die meganiese inspeksie behartig het.

Hierop het Graham geantwoord: “Ek het verskeie jare se ondervinding, en gegewe die skadeprofiel van beide voertuie skets dit ’n sekere prentjie. Spoed was ’n faktor.”

Botes het hom daarvan beskuldig dat hy die ongeluk nie objektief of onafhanklik beoordeel het nie.

Hy het aangevoer Graham het nie ’n behoorlike rekord opgestel of behoorlike foto’s geneem nie, waarop Graham gesê het hy het ’n klomp foto’s geneem.

Dippenaar staan op onder meer ses klagte van moord tereg.

Hy word daarvan beskuldig dat hy die oorsaak van 'n trompop-botsing tussen Swakopmund en Hentiesbaai was. Hy was die bestuurder van 'n wit Toyota FJ Cruiser en al drie sy passasiers het gesterf. In die ander voertuig, 'n Ford Ranger waarin 'n Duitse familie gereis het, het net die toe 16-jarige Antonia Joschko oorleef.

Haar pa, ma en suster het gesterf.

Die verhoor duur vandag voort.

Soortgelyk

 

Raad sit oor polisiehoof

5 ure gelede | Regering

Denver Kisting – Die Windhoekse stadsraad (CoW) sou gisteraand vir mnr. Abraham Kanime as hoof van die stadspolisie heraangestel het.Kanime is in Maart verlede jaar...

Windhoek droogste in 90 jaar

5 ure gelede | Weer

Ronelle Rademeyer - Die 2018-’19-reënseisoen sal vir die oorgrote deel van die land in die geskiedenisboeke opgeteken staan as van die droogste in menseheugenis.Die statistiek...

Katrina se lot gou bepaal

5 ure gelede | Howe

Denver Kisting – Onder gewone omstandighede is die staat se verantwoordelikheid om skuld bo redelike twyfel te bewys.In die geval van die oudgoewerneur van die...

Regstelling oor Zenobia Kloppers

5 ure gelede | Kuns en vermaak

Republikein het gister verkeerdelik berig Zenobia Kloppers, die bekende Namibiese aktrise en sanger wat die hoofrol in die rolprent Fiela se kind losgeslaan het, is...

Minder studente ondersteun

5 ure gelede | Ministeries

Augetto Graig - Die nuus dat bestaande en voornemende studente minder finansiële steun gaan ontvang, is ’n teleurstelling. So sê me. Ester Simon, president van...

Lodge heropen binnekort vir Visrivier-voetslaners

5 ure gelede | Toerisme

Namibia Wildlife Resorts (NWR) se Hobas Lodge het vroeg Februarie kitsvloede ervaar wat tot skade gelei het, maar die lodge sal op 1 Junie weer...

Charles Namiseb eindelik gestraf

5 ure gelede | Howe

Die tweede misdadiger en verkragter wat in 2010 vir die aanval op ‘n bejaarde egpaar van Uis verantwoordelik was, is gevonnis.Die eens voortvlugtige en berugte...

Aansoek vir toerisme-ontwikkeling by Meobbaai

5 ure gelede | Toerisme

Francoise Steynberg - Die Namab-toeragentskap het planne om Meobbaai as toeristeaantreklikheid te ontgin.Die agentskap het ‘n aansoek vir ‘n omgewingsklaringsertifikaat vir die bou van ‘n...

Hulp sonder oordeel

5 ure gelede | Mense

Tanja Bause - “Ek het ‘n verkeerde pad geloop – een van verwoesting. Eendag het ek besef ek kan nie meer so aangaan nie....