Meatco het beesgetalle nodig

Omkeerstrategie skep aansporing vir lewering

27 June 2019 | Landbou
Elvira Hattingh



Hoewel dit lyk of Meatco se omkeer­strategie die vleisverwerker op die herstelpad geplaas het, is die maatskappy bekommerd oor hul kwynende mark­aandeel en die aantal slagbeeste wat plaaslik gelewer word.

Tydens Meatco se afgelope jaarvergadering is aangedui die plaaslike vleisreus het die ­afgelope boekjaar sowat 20 000 minder beeste as in sy vorige boekjaar geslag.

Tog kon hy verliese terselfdertyd met N$33 mil­joen sny, wat as 'n “noemens­waardige verbetering van Meatco se ­finansiële situasie” beskou word.

Die omkeerstrategie het Meatco klaarblyklik van 'n veel erger situasie gered, want volgens vooruitskat­tings kon 'n verlies van N$185 miljoen die maat­skappy in die gesig gestaar het, sou die neiging voortduur waarin Meatco voortdurend al minder beeste vir verslagting van produsente ontvang.

Dit was noodsaaklik dat Meatco 'n manier vind om die verwagte lewering van 55 000 slagbeeste met minstens 10 000 koppe te verhoog, sê die vleisverwerker in sy jaarverslag.

Meatco kon deur sy omkeerstrategie daarin slaag om in die 2018-'19-boekjaar 62 086 beeste te slag – wat 7 390 méér is as wat verwag is.

“Hierdie was dus 'n groot omkeerpunt vir Meatco as 'n finansieel volhoubare besigheid,” lui die verslag.



Só IS DEURSET ­VERHOOG

Dié sukses kom nadat die vleisreus doelbewus probeer het om sy deurset te verhoog deur onder meer produsentepryse met gemiddeld 9,88% te verhoog.

Dit kom nadat Meatco tydens die 2017-'18-boekjaar minder as sy Suid-Afrikaanse eweknieë betaal het. Meatco het sy prys toe aangepas tot hy van die hoogste pryse betaal het (gemiddeld N$44,56/kg vir A2- en AB2-grade), as dit byvoor­beeld met pryse in ­Brasilië en Uruguay vergelyk word.

Meatco het ook begin om beeste van alle ­ouderdomme in te neem, 'n eenvoudiger bemarkingstelsel in te stel en om produsentevertroue te probeer herstel.

Die ­omkeerstrategie het ook behels dat bespaar moes word en daar is aan die salarisrekening en op ander onkostes gesny, terwyl die ­Noorweegse kwota verhoog is en Meat­­co se netto-­inkomste met N$15 miljoen verhoog is.

Die maatskappy is ook meer doeltreffend ge­maak, meer beeste is noord van die veterinêre kordonheining geslag en daar is aan verbeterde vertroue onder rolspelers gewerk.



GETALLE 'n ­LEWENSAAR

Meatco sê egter die volhoubare verskaffing van genoeg beeste aan die vleisverwerker is een van die noodsaaklikste aandrywers vir waarde en sal nog vir 'n lang tyd so bly.

Meatco sê ook die 2017-'18-boekjaar was die eerste keer dat sy mark­aandeel kleiner as dié van ander plaaslike abattoirs geraak het.

Meatco sê vir baie jare het Namibië jaarliks sowat 150 000 beeste plaaslik geslag, maar dat hierdie getal jaarliks afgeneem het en die aantal bees wat lewendig uitgevoer word, sedert 2015 skielik begin toeneem het.

“Dit was 'n kommerwekkende situasie wat ingryping in die vorm van 'n omkeerstrategie benodig het,” lui die verslag.

“Mededinging van Suid-Afrikaanse voerkrale het eksponensieel ­toegeneem en dit mag voorkom of daar 'n doelbewuste strate­gie was om die produksiestelsel in Namibië van 'n slagos- na 'n speenkalfproduksiestelsel te verander.

“Hierdie sal ernstige nagevolge vir Namibië se produksiestelsel hê, soos tydens die afgelope jaar toe Suid-Afrikaanse owerhede grense gesluit het weens die uitbreking van bek-en-klouseer in die buurland.

“Hul voerkrale het opge­hou om speenkalwers uit Namibië aan te koop, wat 'n groot uitwerking op plaaslike veilingpryse gehad het,” lui hul jaarverslag.

Volgens Meatco verkies produsente ook om hul beeste aan plaaslike abattoirs te lewer omdat dit laer standaarde handhaaf en geen beperkings het nie, anders as Meatco se uitvoer-abattoir.

Meatco sê hierdie ­neig­ing ontneem hulle van 'n deurset in hul fabriek en dat plaaslike slagplase se kapasiteit tans vinnig groei.

“Solank plaaslike slag­syfers onder 120 000 beeste per jaar is, sal Meatco net een slagplaas vir verslagting gebruik.”



SANDKORREL IN ­WOESTYN

Die totale landboubedryf in Namibië se waarde is in 2017 op N$7,5 miljard beraam, terwyl die lewende­hawesektor se waarde N$3,4 miljard is. Meatco maak sowat 50% hiervan uit.

Sowat 70% van Namibië se bevolking is afhanklik van beesboerdery vir hul lewensbestaan.

Tog is Namibië se rooivleisbedryf in die wêreldkonteks “'n sandkorrel in die woestyn”, sê Meatco in sy jaarverslag.

Vir elke bees in Namibië is daar 422 in ander lande en vir elke ton vleis wat ons lewer, word sowat 1,7 miljoen in ander lande gelewer.

Die sowat 2,7 miljoen beeste in Namibië ver­teenwoordig minder as 'n half persent van die wêreld se beeskudde, wat in 2018 na raming sowat meer as 'n miljard beeste sterk was.

Soortgelyk

 

Net 20,6% water in damme oor

22 ure gelede | Weer

Elvira Hattingh - Damme in Namibië het in totaal net 20,6% of 144,030 Mm³ (miljoen kubieke meter) water oor, vergeleke met dieselfde tyd verlede jaar...

Kiessaak misluk ure voor eerste kruisies

22 ure gelede | Politiek

Jana-Mari Smith - Enkele ure voordat die stembus vir Namibië se 2019-verkiesings in Japan as eerste van die buitelandse sendings sou open, is gister in...

Japan reg om eerste te stem

22 ure gelede | Politiek

Denver Kisting – Namibiërs wat tans in Japan is, kon sedert middernag die eerste mense word om aan vanjaar se presidensiële en Nasionale Vergadering(NV)-verkiesings deel...

Weer vir Woensdag 13 November

22 ure gelede | Weer

BINNELAND: Meestal mooi weer en baie tot bloedig warm in die Suide, andersins gedeeltelik bewolk en baie tot bloedig warm met 'n paar tot geïsoleerde...

Toerismebedryf bekommerd na nog ’n toeris sterf ...

22 ure gelede | Ongelukke

Ronelle Rademeyer - In ’n donker week vir toeristeveiligheid in Namibië is ’n 32-jarige Belgiese man Sondagaand dood toe die toerlorrie waarin ’n groep van...

SME Bank: Krediteure kan hul geld kry

22 ure gelede | Misdaad

Catherine Sasman – Die meester van die hoërhof het op 8 November toestemming gegee vir die eerste krediteure- en ledevergadering van die SME Bank, wat...

Volvo to use blockchain traceability of cobalt

22 ure gelede | Motors

Volvo Cars will become the first carmaker to implement global traceability of cobalt used in its batteries by applying blockchain technology. The announcement follows the...

VERKIESINGS 2019: ONDERWYS EN GESONDHEID

22 ure gelede | Politiek

In die reeks neem ons politieke partye se manifeste in oënskou wat sekere sleutelkwessies betref.ALL PEOPLE’S PARTY (APP)• Gratis onderwys van kleuterskool tot eerste tersiêre...

Eenheid teen geslagsgeweld kry hupstoot

22 ure gelede | Misdaad

Yolanda Nel - Wanneer ’n kind by die huis verkrag word, word dié kind vir 21 dae na ’n plek van veiligheid geneem en daarná...