Man 'verbrysel meisie se gesig met 'n klip'

Maria Eiseb - ’n Jong vrou, me. Lisina Aube Harases (30), is glo gister in die vroeë oggendure agter die Sophia Shaningwa-brandweerstasie op Outjo vermoor.

Volgens die woordvoerder van die Namibiese polisie in die Otjozondjupastreek, ao. Maureen Mbeha, was Harases ten tyde van die voorval op pad werk toe.

Die polisie se verslag dui aan haar gewese kêrel haar glo agtervolg, aangerand, verkrag en vermoor.

Mnr. Paul |Aib, die oorledene se oom, het gesê Aubes, soos sy bekend gestaan het, het altyd vroeg opgestaan en werk toe gestap - wat glo ’n hele ent van hul huis in die Soweto-woonbuurt af is.

|Aib het gesê hy slaap daardie tyd van die oggend nog en vermoed die verdagte het vir Harases agtervolg.

Die pad na haar werk is glo dig begroei - veral ná die goeie reëns.

“Hy het haar baie wreed doodgemaak, haar gesig is heeltelmaal geskend,” het |Aib gesê.

Hy het voorts vertel Harases en die verdagte was in ’n stryery betrokke waartydens hy glo gedreig het om haar te vermoor.

Uit vrees het sy glo die huis waar hulle saamgewoon het, verlaat en by haar suster ingetrek.

Sy het die verdagte toe ook by die polisie gaan verkla waarna hy in aanhouding was.

“Sy het die saak egter teruggetrek en hy het haar kort daarna kom doodmaak,” het |Aib gesê.

Harases het haar kollegas soggens vroeg wakker gebel en het na wat verneem word altyd eerste by die werk opgedaag.

Me. Melodi |Uiras, een van die oorledene se kollegas, het glo bekommerd geraak toe Harases nie vir werk opdaag nie.

“Ons het vir mekaar gevra hoekom sy laat is en waar sy kan wees,” het |Uiras gesê.

Volgens haar was Harases ’n stil mens, maar het glo gereeld oor die geweld in die verhouding gekla.

“Dit is baie emosioneel vir ons. Ons dorpie is ’n klein plekkie, maar vroue word baie lelik doodgemaak,” het |Uiras gesê.

Volgens Mina |Ais, ’n niggie van Harases, was die verdagte ’n baie “rowwe en gewelddadige” mens.

“Hy het haar altyd geslaan en sy het die verhouding gereeld beëindig en hom dan weer teruggevat,” het sy gesê.

Harases se liggaam is deur ’n verbyganger ontdek waarna die polisie van die voorval in kennis gestel is.

Sy het glo haar werksuniform aangehad.

Insp. Adolf Xamiseb, die dorp se stasiebevelvoerder, het gesê die verdagte is by sy huis in die Etoshapoort-nedersetting in hegtenis geneem is tans in polisieaanhouding.

Volgens Xamiseb sal die verdagte vandag in die hof op die dorp verskyn.

Harases laat drie kinders agter.