Lorenzo se punte vir Unam vereer

Rugby

21 October 2019 | Sport
Andrew Poolman



Die flinke heelagter Lorenzo Louis se reusebydrae vanjaar het hom 'n gewilde keuse as sportman van die jaar gemaak toe die rugbyklub FNB Universiteit van Namibië die naweek sy jaarafsluitingseremonie gehou het.

By dieselfde geleentheid het mnr. Johan Diergaardt benadruk dat hy dié keer vir goed as hoofafrigter die tuig neerlê.

“Ek sal graag nog in ander hoedanighede dien, maar die grondslag is gelê vir 'n nuwe stem om oor te neem. Unam kan weer (die NRU premierliga) soos in 2015, 2016 en 2017 oorheers,” het Diergaardt voorspel.

Louis was vanjaar in sy gebruiklike 15-trui, of ewe dikwels van die reserwebank af, 'n geweldige faktor in plaaslike klubrugby. Met 14 drieë en 225 punte het hy benewens die sportman-wisseltrofee ook die pryse as voorste driedrukker en voorste puntemaker vir die seisoen ontvang.

Die geharde losvoorspeler Cameron Langenhoven se inklimspel is ook nie misgekyk nie, toe hy as speler van die jaar bekroon is.

Die haastige vleuel Shareave Titus het met twee toekennings weggestap, naamlik Unam se beste presteerder in sewesrugby en die spelers se speler van die jaar.

Kami Mieze het met die klubvoorsitter, mnr. Christie Windvogel, se voorsitterstoekenning weggestap, as erkenning vir sy persoonlike groei as speler en spanmaat en sy bereidheid om in ver­skeie posisies as voorspeler rondgeskuif te word.

Die universiteit se sportkantoor het ook 'n toekenning op die spel geplaas wat mnr. Werner Jeffery aan die jong Namibiese vleuel Chad Plato oorhandig het.

“Hierdie toekenning is tevore deur spelers soos Mahepisa Tjeriko en Lesley Klim ingepalm. Vanjaar vereer ons vir Chad, wat ná die teleurstelling van die beëindiging van 'n groepie Namibiese spelers se junior kontrakte by die Blou Bulle weer opgestaan het. Boonop is sy seisoen twee keer deur beserings onderbreek, maar toe hy sy kans in Namibië se Wêreldbekerspan na Japan kry, het hy almal met sy vertonings teen Italië en die Springbokke verstom,” het Jeffery verduidelik.

Vanjaar was 'n merkwaardige mylpaal vir Unam-rugby, om sewe huidige en gewese spelers vir die Wêreldbeker-span op te lewer.

“As dit nie vir beserings (Oderich Mouton en Mahepisa Tjeriko) was nie, kon dit dalk selfs nege gewees het,” het Diergaardt gesê nadat Plato, Desiderius Sethie, Obert Nortjé, Prince !Gaoseb, Max Katjijeko, Lesley Klim en Helarius Kisting erkenning vir hul WB-insluiting gekry het.

Katjijeko, wat ook as Unam se topspeler vanjaar vir die nasionale span uitgesonder is, is die mikrofoon gegee vir 'n toespraak.

“Van skool af het ek geleer dat jy jou nie moet steur aan wat mense sê jy nie kan doen nie.

“In graad 11 moes ek terugstaan vir sogenaamde seniors om WHS se eerste span te verteenwoordig ... ouens wat ná skool nie eens verder rugby gespeel het nie,” het Katjijeko onthou.

“Ná skool het ek dikwels gehoor ek is 'n paar sentimeter te kort om vir Namibië slot te speel en 'n paar kilogram te lig om flank te speel. Die feit dat (afrigter) Phil Davies my in die beginspan vir soveel belangrike toetse gebruik het, wys dat 'n mens moet besluit na wie se stemme jy luister.”

Ander Unam-toekennings vir 2019 was:

Mees toegewyde speler: Shaun van Wyk.

Beste vordering: Johnny Mwenyo (Namibië sewes).

Mees veelsydige speler: die broers Sunday en Simon Haitembu.

Beste voorspeler, derde span: Quintin Tsekupe.

Beste voorspeler, tweede span: Martinus Nekundi.

Beste voorspeler, eerste span: Gilad Plaatjies.

Beste agterspeler, derde span: Owen van Rooi.

Beste agterspeler, tweede span: Josh Bessinger.

Beste agterspeler, eerste span: die senterpaar Milaan van Wyk en Camlo Martin.

Beste presteerder vir die Windhoek Draught Welwitschias: Milaan van Wyk.



GRONDSLAG

STEEDS DAAR

Unam sal in die komende weke aankondig hoe sy afrigterstruktuur vir 2020 daar sal uitsien.

“Toe ek aan die begin van 2015 oorgeneem het, het ons stelselmatig die spelers ontwikkel tot waar ons vanjaar sewe lede van die Wêreldbeker-span opgelewer het. Spelers soos Helarius, Lesley en Max kon intussen uit professionele kontrakte in die buiteland voordeel trek.

“Vanjaar was ons trofeekas leeg nadat ons eerste span op omstrede wyse in die finaal verloor het, maar daar is steeds genoeg ruggraat in die spelersgroep oor dat ons kan aanhou ontwikkel.

“Dit is steeds binne Unam se vermoë om wéér so 'n string onoorwonne vertonings te lewer soos toe ons in 2015 die opposisie dikwels met vyftig punte van hul voete gehardloop het.

“Enige speler met ernstige voornemens moet op sy leefstyl let en die nagevolge in die oog hou van alles wat jy eet en drink.”

Soortgelyk

 

AgriBusDev-baas geskors

1st of June 18:23 | Regering

Mnr. Petrus Uugwanga, die landbousake-ontwikkelingsagentskap (AgriBusDev) se besturende direkteur, is met onmiddelike effek geskors. Die voorsitter van die AgriBusDev-raad, me. Sophia Kasheeta, het pas ‘n...

Twee 'renosterstropers' verskyn in Gobabis-hof

2 ure gelede | Howe

Twee vermeende renosterstropers het vandag in die landdroshof op Gobabis verskyn.Mnre. Alberto Mbwale en Joseph Matheus het op klagte van die onwettige jag van spesiaal...

Pastoor Babi steeds agter tralies

5 ure gelede | Howe

Pastoor Jackson Babi (30) van die House of Joy Ministries en sy medebeskuldigde, mnr. Friza Dumeni (25), bly steeds agter tralies.Landdros Linus Samunzela het vanoggend...

25ste Covid-19-geval bevestig

7 ure gelede | Gesondheid

'n Vroulike gesondheidswerker (32) is Namibië se jongste Covid-19-geval. Dit bring die aantal bevestigde Covid-19-gevalle in Namibië op 25 te staan. Volgens die minister van...

Hof hoor president is 'mislei' oor arbeidsregulasies

18 ure gelede | Howe

Ronelle Rademeyer - Pres. Hage Geingob is “verkeerd geadviseer” met die opstel van die gewraakte arbeidsregulasies waarvan die grondwetlikheid Vrydag in die hoërhof deur Namibiese...

Namibiërs in haglike omstandighede onder SA-kwarantyn

18 ure gelede | Gesondheid

Twee vroue van Windhoek en die een se 16-jarige dogter meen die vervalle staatshospitaal by Nababeep naby Springbok in die Noord-Kaap waar hulle in kwarantyn...

'Profeet' Babi se borgaansoek vandag

18 ure gelede | Misdaad

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni,...

Twee bemanningslede positief vir Covid-19

18 ure gelede | Gesondheid

Henriette Lamprecht & Leandrea Louw – Walvisbaai huisves tans drie aktiewe gevalle van Covid-19 ná ‘n 51-jarige man Saterdag positief vir die virussiekte getoets het....

Fishrot-manne skarrel vir borgtog

18 ure gelede | Misdaad

Augetto Graig – Die Windhoek-landdroshof het Vrydag met verskeie Fishrot-sake gewemel, met borgtogaansoeke wat met aansoeke vir die verlenging van tyd vir verdere ondersoek, meegeding...