Listeriose: Slaghuis se produkte 'skoon'
Slaghuise op Tsumeb moes gister bontstaan om te verseker hul produkte is nie die bron van listeriose-kwaad nie.
Henriette Lamprecht
Die slaghuis en fabriek wat die minister van gesondheid en maatskaplike dienste by implikasie uitgesonder het as die bron van listeriose op Tsumeb, sê verskeie toetse word daagliks en maandeliks op alle produkte gedoen en tot so lank as ses maande terug was daar geen positiewe resultate vir die bakterie wat die siekte veroorsaak nie.
Dr. Bernard Haufiku het in die Nasionale Vergadering gesê die listeriosepasiënt wat tans behandeling ontvang, het Weense worsies by 'n slaghuis op die dorp gekoop wat na aanleiding hiervan op sosiale media geïdentifiseer is.
Volgens mnr. Jean Simonis van Simondeum Fine Meats het die fabriek 'n internasionaal-erkende gehaltebeheerstelsel. HACCP is 'n voorkomende voedselveiligheidstelsel waarin elke stap in die vervaardiging, berging en verspreiding van 'n produk wetenskaplik vir mikrobiologiese, fisiese en chemiese gevare getoets word.
“Ons toets ook elke oggend die produkte wat die vorige dag gemaak is,” het Simonis gesê.
Sou alarm gemaak word, is daar korrektiewe stappe om die nodige aksie te neem.
Volgens Simonis het hy Dinsdag met sy gehaltespan vergader en so ver as ses maande terug was daar geen positiewe resultate vir listeriose in die fabriek se produkte nie.
Hy het beklemtoon die publiek het “géén rede tot kommer” nie, sou hulle wel produkte van dié fabriek gekoop het.
“Benewens gereelde besoeke en toetse deur onder meer gesondheidsinspekteurs, verseker die HACCP-stelsel dat ons produkte skoon is.”
Volgens Simonis wil die fabriek ook begin om produkte uit te voer en het die ministerie van landbou, water en bosbou se direktoraat vir veeartsenydienste Vrydag tydens 'n uitvoeroudit die groen lig hiervoor gegee.
Nog 'n slaghuis op die dorp het gister by navraag gesê van sy kliënte het bestellings na aanleiding van die aankondiging gekanselleer. Hy sou nou op eie houtjie sy produkte by 'n laboratorium in die hoofstad laat toets om te bevestig die bron van die siekte lê nie by sy slaghuis nie.
Intussen het dr. Lilian Kahuika, mediese epidemioloog verbonde aan die ministerie van gesondheid en maatskaplike dienste, gesê dit gaan goed met die 41-jarige man van Tsumeb wat in die Rooms-Katolieke Hospitaal in Windhoek behandel word.
“Hy is stabiel en stap rond,” het Kahuika gesê. Volgens haar word toetse vir listeriose plaaslik gedoen, met 'n wagtydperk vir uitslae wat wissel van een tot drie dae. Monsters word van die pasiënt se liggaamsvloeistowwe geneem, met 'n kultuur wat gegroei word en onder 'n mikroskoop kan bevestig of die pasiënt positief toets al dan nie.
Dit duur volgens haar normaalweg twee tot drie weke voordat 'n pasiënt simptome van die siekte toon. 'n Baie raar gevalle kan dit tot 70 dae wees. Mense wat die vatbaarste vir die siekte is, sluit swanger vroue en enige iemand wie se immuunstelsel verswak is.
“Siek en bejaarde mense, asook ook babas se immuunstelsel is nie sterk genoeg om teen die siekte te baklei nie.”
Kahuika het voedselhigiëne beklemtoon wat die veilige berging en voorbereiding van voedsel, sowel as skoon hande insluit.
“Vermy ongepasteuriseerde suiwelprodukte. Verhit kouevleise en verwerkte vleisprodukte voordat jy dit eet.”
Die ministerie van gesondheid en maatskaplike dienste (MoHSS) het in 'n verklaring gesê persone naby aan die man en wat ook van die worsies geëet het, is reeds vir toetse na die staatshospitaal op Tsumeb geneem. 'n Inspeksie is ook volgens die verklaring reeds uitgevoer by die betrokke slaghuis waar die produkte glo gekoop is.
Intussen het Windhoek Schlachterei, 'n lid van Namibia Dairies en filiaal van die Ohlthaver & List (O&L)-groep gesê sy produkte is veilig vir menslike gebruik.
Mnr. Eduard Keys, hoof van Windhoek Schlachterei, het beklemtoon danksy streng beleidsrigtings, prosedures en standaarde “was ons nog altyd vol vertroue dat ons produkte veilig is”. Die maatskappy het in die lig van die plaaslike geval van listeriose ook 'n onafhanklike evaluering laat doen wat dit bevestig het.
Hartlief het op sy beurt gesê “al ons produkte word onder die strengste voedselveiligheidstandaarde vervaardig”.
Die slaghuis en fabriek wat die minister van gesondheid en maatskaplike dienste by implikasie uitgesonder het as die bron van listeriose op Tsumeb, sê verskeie toetse word daagliks en maandeliks op alle produkte gedoen en tot so lank as ses maande terug was daar geen positiewe resultate vir die bakterie wat die siekte veroorsaak nie.
Dr. Bernard Haufiku het in die Nasionale Vergadering gesê die listeriosepasiënt wat tans behandeling ontvang, het Weense worsies by 'n slaghuis op die dorp gekoop wat na aanleiding hiervan op sosiale media geïdentifiseer is.
Volgens mnr. Jean Simonis van Simondeum Fine Meats het die fabriek 'n internasionaal-erkende gehaltebeheerstelsel. HACCP is 'n voorkomende voedselveiligheidstelsel waarin elke stap in die vervaardiging, berging en verspreiding van 'n produk wetenskaplik vir mikrobiologiese, fisiese en chemiese gevare getoets word.
“Ons toets ook elke oggend die produkte wat die vorige dag gemaak is,” het Simonis gesê.
Sou alarm gemaak word, is daar korrektiewe stappe om die nodige aksie te neem.
Volgens Simonis het hy Dinsdag met sy gehaltespan vergader en so ver as ses maande terug was daar geen positiewe resultate vir listeriose in die fabriek se produkte nie.
Hy het beklemtoon die publiek het “géén rede tot kommer” nie, sou hulle wel produkte van dié fabriek gekoop het.
“Benewens gereelde besoeke en toetse deur onder meer gesondheidsinspekteurs, verseker die HACCP-stelsel dat ons produkte skoon is.”
Volgens Simonis wil die fabriek ook begin om produkte uit te voer en het die ministerie van landbou, water en bosbou se direktoraat vir veeartsenydienste Vrydag tydens 'n uitvoeroudit die groen lig hiervoor gegee.
Nog 'n slaghuis op die dorp het gister by navraag gesê van sy kliënte het bestellings na aanleiding van die aankondiging gekanselleer. Hy sou nou op eie houtjie sy produkte by 'n laboratorium in die hoofstad laat toets om te bevestig die bron van die siekte lê nie by sy slaghuis nie.
Intussen het dr. Lilian Kahuika, mediese epidemioloog verbonde aan die ministerie van gesondheid en maatskaplike dienste, gesê dit gaan goed met die 41-jarige man van Tsumeb wat in die Rooms-Katolieke Hospitaal in Windhoek behandel word.
“Hy is stabiel en stap rond,” het Kahuika gesê. Volgens haar word toetse vir listeriose plaaslik gedoen, met 'n wagtydperk vir uitslae wat wissel van een tot drie dae. Monsters word van die pasiënt se liggaamsvloeistowwe geneem, met 'n kultuur wat gegroei word en onder 'n mikroskoop kan bevestig of die pasiënt positief toets al dan nie.
Dit duur volgens haar normaalweg twee tot drie weke voordat 'n pasiënt simptome van die siekte toon. 'n Baie raar gevalle kan dit tot 70 dae wees. Mense wat die vatbaarste vir die siekte is, sluit swanger vroue en enige iemand wie se immuunstelsel verswak is.
“Siek en bejaarde mense, asook ook babas se immuunstelsel is nie sterk genoeg om teen die siekte te baklei nie.”
Kahuika het voedselhigiëne beklemtoon wat die veilige berging en voorbereiding van voedsel, sowel as skoon hande insluit.
“Vermy ongepasteuriseerde suiwelprodukte. Verhit kouevleise en verwerkte vleisprodukte voordat jy dit eet.”
Die ministerie van gesondheid en maatskaplike dienste (MoHSS) het in 'n verklaring gesê persone naby aan die man en wat ook van die worsies geëet het, is reeds vir toetse na die staatshospitaal op Tsumeb geneem. 'n Inspeksie is ook volgens die verklaring reeds uitgevoer by die betrokke slaghuis waar die produkte glo gekoop is.
Intussen het Windhoek Schlachterei, 'n lid van Namibia Dairies en filiaal van die Ohlthaver & List (O&L)-groep gesê sy produkte is veilig vir menslike gebruik.
Mnr. Eduard Keys, hoof van Windhoek Schlachterei, het beklemtoon danksy streng beleidsrigtings, prosedures en standaarde “was ons nog altyd vol vertroue dat ons produkte veilig is”. Die maatskappy het in die lig van die plaaslike geval van listeriose ook 'n onafhanklike evaluering laat doen wat dit bevestig het.
Hartlief het op sy beurt gesê “al ons produkte word onder die strengste voedselveiligheidstandaarde vervaardig”.
Kommentaar
Republikein
Geen kommentaar is op hierdie artikel gelaat nie