Ligter vonnis vir Schiefer

Ses jaar minder

14 September 2017 | Howe
Jacqueline Louw



Drie appèlregters het Dinsdag in die guns beslis van die 28-jarige Romeo Manellitto Schiefer, wat na die hooggeregshof geappelleer het teen die tronkstraf van 48 jaar wat bykans drie jaar gelede in die hoërhof in Windhoek aan hom opgelê is vir twee klagte van moord.

Hy is in Oktober 2013 tot 28 jaar tronkstraf gevonnis vir elk van die twee moordklagte deur regter Naomi Shivute in die hoërhof in Windhoek. Agt jaar van die een vonnis sou saam met die ander vonnis uitgedien word.

Die hooggeregshof het Dinsdag die twee vonnisse van 28 jaar elk bevestig, maar het beveel dat 14 jaar van die een vonnis saam met die ander vonnis uitgedien moet word, wat beteken dat Schiefer 42 jaar gevangenisstraf in plaas van 48 jaar sal uitdien.

Ná 'n verhoor waarin Schiefer skuld ontken het op die klagte dat hy sy ouers op 18 Januarie 2008 in hul huis in Khomasdal vermoor het, het regter Shivute hom in September 2013 in die hoërhof in Windhoek skuldig bevind op twee klagte van moord en 'n klag van diefstal.

Schiefer was nie suksesvol in 'n appèl in die hoërhof teen hierdie beslissing nie. Verlof om slegs teen sy vonnisoplegging te appelleer is egter deur die hooggeregshof toegestaan.

Schiefer het sy pa, mnr Frans Schiefer (50), deur die kop geskiet terwyl hy in sy bed gelê het en sy ma, me. Francina Schiefer (50), herhaaldelik met 'n mes gesteek en nege keer met 'n pistool geskiet. Hy was 18 toe hy sy ouers vermoor het.

Schiefer se prokureur, mnr. Winnie Christians, het Schiefer se jeugdigheid ten tyde van die voorval as versagtende omstandighede aangevoer in sy appèl teen die vonnis. ­Christians het betoog die regter het 'n fout begaan toe sy 'n 48-jaar vonnis opgelê het aan 'n persoon wat 18 jaar oud was toe die misdaad gepleeg is.

Die hoërhof het bevind die staat het bo enige redelike twyfel deur omstandigheids- en forensiese getuienis, asook 'n skuldbekentenis van Schiefer, bewys hy is skuldig aan die moorde.

In die skuldbekentenis, wat Schiefer 'n dag nadat hy sy ouers doodgemaak het, aan 'n senior polisieoffisier gemaak het, het hy gesê hy is “aangehits” om die moorde te pleeg.

Hy het glo besluit “dit was genoeg” toe sy ma hom gevloek het en hom daarvan beskuldig het dat hy nie wou studeer nie en dat hy haar geld mors deur “rond te loop en niks te doen nie”.

Schiefer het 'n mes geneem en sy ma aangeval. Daarna het hy sy pa se pistool gaan haal en hom in die kop geskiet.

Ná hy sy pa geskiet het, het hy kombuis toe gegaan en die deur wat sy ma gesluit het, oopgeskiet. Sy ma het na sy ouers se slaapkamer gevlug en Schiefer het haar daar geskiet en ook weer met 'n mes gesteek.

Ná die moord het hy ander klere aangetrek en saam met 'n vriend uitgegaan totdat hy 'n foonoproep van een van sy broers ontvang het om huis toe te gaan.

Regter Shivute was korrek in haar bevinding dat Schiefer nie enige berou oor die moord op sy ouers getoon het nie, het regter Elton Hoff opgemerk.

Regter Shivute het die feit dat Schiefer 'n eerste oortreder was, sy jeug en die tydperk van meer as ses jaar wat hy in aanhouding spandeer het voor hy gevonnis is, as versagtende omstandighede in sy vonnisoplegging gemeld, het Hoff gesê.

“Hy is 'n eerste, jeugdige oortreder, die misdade is sonder enige voorbedagte rade gepleeg en die appellant het nie 'n geskiedenis van gewelddadige optrede gehad nie,” het Hoff in sy uitspraak genoem.

Hoff het gesê indien hy die verhoorregter was, sou hy beveel het dat 'n langer gedeelte van die een vonnis saam met die ander vonnis uitgedien word.

Adjunk-hoofregter Petrus Damaseb en appèlregter Dave Smuts het met die appèluitspraak saamgestem.

Soortgelyk

 

Trump laat Amerika bloos oor 'Nambia"

8 ure gelede | Internasionaal

Pres. Donald Trump van Amerika het gister tydens ‘n vergadering met Afrikaleiers in New York na Namibië as “Nambia” verwys.Tydens die ontmoeting het Trump gesê:...

Ysterertsmyn dalk op Windhoek se voorstoep

18 ure gelede | Plaaslik

Ronelle Rademeyer - Gemeenskapsvergaderings word vandag by Neudamm en in Windhoek gehou vir insette oor die impak wat die beplande ysterertsmyn 50 km oos van...

Droogtenood in Suide al groter

18 ure gelede | Omgewing

Ronelle Rademeyer 'n Projek, onder aanvoering van die Keetmanshoop Streekslandbou-unie (SLU), is tans werksaam om dringend voer vir vee op meer as 50 plase in...

wenfoto by Hakos gekiek

18 ure gelede | Omgewing

Die wenner van die Insight Sterrekunde Fotograaf van die Jaar-kompetisie het sy foto in Namibië geneem. Die Rus Artem Mironov is vanjaar se algehele wenner­...

Nuwe stelsel veroorsaak chaos by lughawe

18 ure gelede | Plaaslik

Catherine Sasman Die ministerie van binnelandse sake en immigrasie sê dit het 'n korttermyn­oplossing gevind om die chaotiese­ vertragings by die Internasio­nale Lughawe Hosea Kutako...

Weer vir 21 September

18 ure gelede | Weer

BINNELAND: Gedeeltelik bewolk en baie tot bloedig warm. Winderige toestande word in die Noorde en oor die sentrale hoëgrond verwag. KUS: Gedeeltelik bewolk en matig...

'Noord-Amerikaners wil Namibië besoek'

18 ure gelede | Toerisme

Namibië is 'n toeristebestemming wat Noord-Amerikaners graag wil besoek.Só sê die besturende direkteur van Namibia Wildlife Resorts (NWR), me. Zelna Hengari, wat saam met die...

Tienermeisie steek baba glo in tas weg

18 ure gelede | Misdaad

Twee vroue, van wie een 'n skoolmeisie is, is Dinsdag in verband met die verberging van 'n geboorte in hegtenis geneem.OMUTELEVolgens die Namibiese polisie se...

Goeie nuus vir sekuriteitswagte

18 ure gelede | Arbeid

Augetto Graig - Die ministerie van arbeid, nywerheidsbetrekkinge en werkskepping het aangekondig sekuriteitswagte in Namibië moet van verlede Vrydag (15 September) af ten minste N$8,75...