Lesley Gariseb vertel Namibië se stoepstories

In 'roekelose, vreeslose Afrikaans'

08 November 2019 | Kuns en vermaak
Francoise Steynberg - Die politieke en sosiale kommentator Lesley Gariseb gaan op 13 November sy boek, Namibië Stoepstories, in Windhoek bekend stel.

Op die Facebook-blad "Straight Talk, No Insult" het Lesley baie Namibiërs se harte met sy kwinkslae oor politieke en sosiale kwessies aangegryp. Dit het hom genoop om sy stories in 'n boekformaat self te publiseer.

"Die boek is as't ware maar 'n samestelling van stories wat ek oor die jare geskryf het met kommentaar van Namibiërs," het Lesley in sy diep basstem tydens 'n onderhoud met Kollig gesê.

"Ek soek na beter samerwerking, verstandhouding en samesyn tussen en met alle Namibiërs, ongeag ras, agtergrond, godsdiens en politiek.

"Maar Chinese tel nie as Namibiërs in my boek nie. Daarom skryf ek oor onregverdige idees soos NEEEF, ongelyke behandeling ten opsigte van wetstoepassing, swak staatsdiens en algemene verval van sake, veral op regeringsvlak.

"Ek het die boek grotendeels geskryf as 'n poging om die rassegaping te vernou, verstandhouding tussen alle rasse te probeer bewerkstellig, asook oor baie van die dinge wat dreig om ons as Namibiërs uitmekaar te hou."

Lesley sê hy skryf vir mense wat nie 'n stem het nie, maar in sy wildste drome het hy nooit gedink dat sy stories so 'n groot impak sal hê nie.

"Ek skryf oor staatsverval, die verantwoordelikheid van die leierskap, korrupsie, maar tog ook oor die toekoms van die land en die geleenthede wat daar is."

Sy positiewe uitkyk op Namibië is aansteeklik. Lesley sê hy het na al die uithoeke van die land, in Afrika en oorsee gereis.

"Ek ken die land. Ek ry nie teerpaaie nie; ek ry grondpaaie waar dit die mooiste is. Namibië is 'n mooi land."

Lesley meen Namibië is 'n goeie land met hoop, 'n blink toekoms en vooruitsigte.

"Daar is geen ander land vir my as Namibië nie," beklemtoon hy.

AFRIKAANS

Lesley sê die boek is in roekelose en vreeslose Afrikaans geskryf "soos ek dit sien".

Volgens hom is sy Afrikaans so mooi danksy sy dik, groen voorgeskrewe Afrikaanshandboek op hoërskool, Afrikaans my taal.

Lesley, wat Damarasprekend is, sê sy gesin se huistaal is Afrikaans, "want my vrou kom van Angola af en kan nie Damara praat nie". Die egpaar het twee dogters (25 en 16) en 'n 22-jarige seun.

Lesley is op Goreses naby Otjinene in die Omahekestreek gebore en het op Walvisbaai grootgeword. Hy het op Otjinene en Walvisbaai skoolgegaan en in 1988 aan die Sekondêre Skool A. Shipena in Windhoek gematrikuleer.

TOERISMEBEDRYF

Hy was vir meer as 19 jaar in die toerismebedryf en het die land platgereis.

"Ek was van die eerste swartmense wat kort ná onafhanklikheid die toerismebedryf betree het, onder andere as gids. Ek het later 'n kultuurkamp by Wilhelmstal gestig waar toeriste die San-kultuur eerstehands kon ervaar," vertel Lesley.

Die boekbekendstelling van Namibië Stoepstories sal op Woensdag 13 November om 18:00 vir 19:00 by De Kayak in die Olympia-woonbuurt in die hoofstad plaasvind.

"Diegene in Windhoek wat reeds vir die boek betaal het, kan dit daar kry en diegene wat dit nog wil bekom, kan die boek daar koop. Ek sal natuurlik alle boeke teken," sê Lesley.

Soortgelyk

 

Miljoene gevra ná ongeluk leerling eis

10 ure gelede | Howe

Henriette Lamprecht – Die ouers van ’n matriekleerling wat in 2016 in ’n motorongeluk dood is en waarin haar vriend ernstig beseer is, dagvaar...

Media 'mishandel' Hage

10 ure gelede | Regering

Denver Kisting – ’n Hoë prys is vir Namibië se demokrasie betaal en strukture mag nie vir persoonlike en politieke gewin misbruik word nie. “Ons...

VERKIESINGS 2019: PRESIDENSIËLE KANDIDATE

10 ure gelede | Politiek

Bernardus SwartbooiLandless People's Movement (LPM) Bernardus Clinton Swartbooi het weggebreek van Swapo toe hy in 2017 weens kritiek teen die regering gedwing is om as...

Weer vir 11 November 2019

10 ure gelede | Weer

BINNELAND: Gedeeltelik bewolk en baie tot bloedig warm met enkele tot geïsoleerde donderstorms in die Noorde, Noordooste en oostelike dele. Elders sal dit gedeeltelik bewolk...

Namibië, China se band opnuut gekap

10 ure gelede | Regering

Denver Kisting – Pres. Hage Geingob loop veral in die sosiale media deur nadat China se premier, me. Sun Chunlan, gesê het dié land en...

‘Gevaarlike’ man ná vyf dae aangekeer

10 ure gelede | Misdaad

Denver Kisting – Vyf dae nadat ’n man onder polisiebewaking uit ’n hospitaal verdwyn het, is mnr. San Ricky Geingob weer agter tralies.Hoofinsp. Kauna Shikwambi,...

Tragedie tref toergroep

10 ure gelede | Ongelukke

Iréne-Mari van der Walt op Swakopmund - Altesaam 34 Duitse toeriste se Namibiese reis is kortgeknip ná hul “Rotel”-bus aan die brand geslaan het.Die bus...

VERKIESINGS 2019: GRONDHERVORMING, LANDBOU EN DIE KLIMAAT

10 ure gelede | Politiek

In die reeks neem ons politieke partye se manifeste in oënskou wat sekere sleutelkwessies betref.ALL PEOPLE’S PARTY (APP)• Vergoeding vir volksmoorde en hervestiging van die...

Verkiesings 2019: Vertroue en prestasie – keersye van dieselfde...

10 ure gelede | Politiek

Christie Keulder - Burgers se vertroue in politieke instellings is ‘n belangrike maatstaf van legitimiteit.Mense glo in die wettigheid van politieke instellings en ‘n regime...