Koebaai winter, hallo somer

08 September 2020 | Rubrieke
Dit was volgens kundiges die koudste winter wat ons in 20 jaar beleef het.

Vir my het die grendeltyd soos een lang, koue winter gevoel.

Hierdie pandemietyd is vir almal aaklig en dit is ’n donker, depressiewe tyd. Van my kollegas het positief vir die virus getoets en so ook inwoners in my buurt. Corona het lewens geëis en vir talle hul lewensbestaan verwoes.

My haarkapper Suné Gous is in ’n motorongeluk dood en die virus eis die lewe van oom Dirk Mudge. Knap staatsdienskommissaris Wilma Deetlefs se dood was vir my ’n groot skok, so ook dié van ons ruimtepionier, dr. Japie van Zyl. Mag operasangeres Ina Di Michele, ’n getroue leser en groot kritikus van Republikein, sag rus.

Die lente moes vir ons nuwe lewe en hoop bring, maar op lentedag woed nog ’n kouefront en die wind waai ons weg. Ek kerm oor die nare wind en my ma sê ek moet nooit oor die wind kla nie.

“Die wind waai om vir ons reën te bring,” betugtig sy my. Ek nies vir die hoeveelste keer van die stofdwarrels. Die wêreld is vaal, grys en trietsig.

Donderdag reik die weerkantoor ’n weerwaak van reën uit en ek wonder of die weervoorspellers nou die kluts kwyt is. Ek trek weer die aand my wintersnagklere en dik slaapsokkies aan.

Vrydag verskyn vlieswolkies in die lug. My verevriendin skrop langs my op die bed en lê ’n eier. Die doringbosse in Kameeldoringspruit se bloeisels bot wit wolbolletjies.

Middagtyd val ’n paar vet druppels vir enkele minute op Kameeldoringspruit. Ek verneem van goeie buie by Grootfontein en Gobabis.

Ek kry nêrens my reënmeter om buite op te hang nie, maar twyfel sterk of die reën sal kom.

Vrydagaand lê ek in die bed en die honde raak onrustig. Ewe skielik begin die blitse slaan en die donderweer basuin.

Toe die druppels hard op my sinkdak begin val, hardloop ek uit stoep toe.

Die wilde kat kom soek skuiling onder die stoepbank.

Dan sak die reën uit. Die mooiste geluid op aarde vir Namibiërs.

Vir die eerste keer in ’n lang tyd slaap ek rustig sonder bekommernisse oor corona. As ek deur die nag wakker word, hoor ek steeds die reën sag val.

Dit voel of die reën sommer die virus weggespoel het. Reën bring altyd hoop.

Saterdagoggend ruik die nat grond vars en die voëls kwetter vrolik. Tien grasgroen Suidwes-parkiete wei onder my kameeldoringboom.

My buurvrou se reënmeter staan op 6 mm. Saterdagaand word ons met nog ’n 3,5 mm geseën.

Daar was geen lente na die winter nie, maar dankie vir die reën, die seën en die somer.

Soortgelyk

 

Geingob onder skoot oor ‘wit’ opmerkings

11 ure gelede | Politiek

Denver Kisting – Die leier van die amptelike opposisie, mnr. McHenry Venaani, sê wat pres. Hage Geingob die afgelope naweek oor wit mense kwytgeraak het,...

Verskeie daaglikse vlugte binnekort na SA

11 ure gelede | Vervoer

Ronelle Rademeyer – FlyWestair en Airlink, die private Namibiese en Suid-Afrikaanse rederye, het tot reisigers se redding gekom en gaan die leemte aan direkte, geskeduleerde...

Skone Lira bemark Namibië

11 ure gelede | Toerisme

Die Suid-Afrikaanse sangeres Lira, wat die inperking in Namibië deurgebring en uitgebreide verkenningsreise in die land onderneem het, is deur die Federasie van Namibiese Toerismeverenigings...

Weer vir 19 Oktober

11 ure gelede | Weer

BINNELAND: Gedeeltelik bewolk en bloedig warm in die Ooste. Elders sal die sonnig wees en baie warm tot bloedig wees. KUS: Gedeeltelik bewolk en koel...

Verdagte panga-rowers in hegtenis

11 ure gelede | Misdaad

Kristien KrugerVolgens ’n Namibiese polisieverslag is sewe mans in hegtenis geneem in verband met ’n aantal gewapende rooftogte in Windhoek.Die mans het hulself glo die...

Massavrekte van robwelpies ondersoek

11 ure gelede | Omgewing

Elvira Hattingh – ’n Ondersoekspan het begin om ongewone vrektes onder Kaapse pelsrobbe te ondersoek nadat klaarblyklik duisende wyfies vanjaar hul welpies teen die Namibiese...

Vier ton vis by Swakoppoort gekonfiskeer

11 ure gelede | Misdaad

Ronelle Rademeyer en Kristien Kruger – Sowat vier ton gedroogte vis en groot hoeveelhede visnettte en vislyn, asook die vlotte wat gebruik is om dit...

Stigma rondom Covid-19 neem af

11 ure gelede | Gesondheid

Jana-Mari Smith – Die normalisering van Covid-19 die afgelope jaar het veroorsaak dat stigmatisering weens die coronavirus besig is om af te neem, maar kenners...

Duitsland steun nasionale parke

11 ure gelede | Omgewing

Francoise SteynbergNóg 'n mylpaal is vir omgewingsbewaring behaal met die Duitse regering deur KfW wat sedert 2006 sowat N$1,4 miljard (75,5 euro) in Namibiese nasionale...