Kahimise kap kwaai terug

Teen giftigheid uitgevaar

15 July 2019 | Regering
Denver Kisting – Die uitvoerende hoof van die Windhoekse stadsraad (CoW), mnr. Robert Kahimise, het Vrydag gesê daar was geen bondgenootskap wat hom destyds die pos help kry het nie.

Boonop het hy die betrekking losgeslaan ondanks politieke voorbrand wat gemaak is vir kandidate wat swakker as hy gevaar het, sê hy.

Volgens hom het sy aanstelling gespruit uit ’n besluit deur “’n onafhanklike werwingspaneel”.

Geen raadslid was by sy aanstelling meer as twee jaar gelede betrokke nie, het Kahimise gesê. Enige raadslede wat tydens sy onderhoud teenwoordig was, was daar as waarnemers, het hy gesê.

Nadat die paneel ’n aanbeveling aan die raad gemaak het, is ’n besluit met die goedkeuring van die tersaaklike minister geneem, het hy gesê. “Dít het gelei tot my aankoms as die nuwe uitvoerende hoof van die stad.”

Sy eie skorskings en die beweringe van wangedrag hou direk verband met sy skorsing van die stadspolisiehoof, mnr. Abraham Kanime, sê Kahimise.

Volgens hom het sy optrede teenoor Kanime verdeeldheid in die raad gesaai.

Kahimise is glo sedertdien in onguns by sommige raadslede, ontevrede bestuurslui en vakbondverteenwoordigers.

Dié mense se desperate pogings om van hom ontslae te raak, het daartoe gelei dat hulle ’n stortvloed foute begaan het, voer hy aan.

Gevolglik moes hy kort-kort weer aangestel word kort nadat hy geskors is, sê hy.

Kahimise ontken hy het enige openbare geld wanbestee of sy posisie misbruik.

Van die aanvullende klagtes wat glo met die misbruik van N$700 000 verband hou, het hy in die media gelees.

Dit is volgens hom roekelose beriggewing en ’n blinknuwe poging om sy naam skade te berokken, sê hy.

Kanime se skorsing is onlangs ná langer as ’n jaar opgehef.

Hy en Kahimise word albei steeds deur tugstappe in die gesig gestaar.

Omkeerplan glo op dreef

Volgens Kahimise het CoW sedert sy aanstelling geskiedenis gemaak deur twee geoktrooieerde rekenmeesters terselfdertyd aan te stel om wag te hou oor die instelling se finansiële bestuur.

“Omdat die stad ’n miljarddollarinstelling is, het ons gereken dit is tyd om hierdie openbare geld toe te vertrou aan personeel met geskikte kwalifikasies.”

Hy het voorts ’n strategie- en prestasiebestuurseenheid gestig as deel van die strukturele veranderinge om die stad te help met strategieontwikkeling, monitering en beoordeling van organisatoriese prestasie, sê hy.

Hoewel die meeste senior beamptes die veranderinge omarm, is enkeles steeds gegrief, sê hy.

Van dié ongelukkige mense is agter die heksejag om van hom ontslae te raak, sê hy.

Kahimise sê hy het intussen ook ongeoorloofde grondtoekennings stopgesit.

Hiernaas, sê hy, kon hulle ook daarin slaag om hul vastebateregister te voltooi. Die waarde van dié bates beloop N$19 miljard, sê hy.

Hoewel sekere amptenare nog omkoopgeld by lede van die publiek aanvaar, spook die raad glo hard om dié en ander onetiese gedrag uit te roei, sê hy.

Volgens hom tree sommige amptenare steeds op asof hul salarisse nie deur inwoners betaal word nie.

Hy bly egter toegewy aan dienslewering.

Kahimise het toegegee CoW sukkel steeds met kontantvloeiprobleme.

Volgens hom is hul grootste uitgawes – meer as 50% van bedryfsuitgawes – vir water- en kraggebruik.

Hulle moet hul kragrekening, byvoorbeeld, binne twee weke vereffen terwyl dit hulle 60 dae neem om die geld te in wat vir daardie doel gebruik moet word, sê hy.

“Hierdie twee tydperke is nie in ooreenstemming met mekaar nie. Dit veroorsaak ’n reuse- kontantvloeitekort.”

Ondanks die geraas oor hul beweerde hoë salarisse, verteenwoordig dié bedrae kragtens ’n ministeriële maatstaf minder as 35% van bedryfsuitgawes.

Kahimise het die media Vrydag toegespreek om sy kant te stel.

Soortgelyk

 

Verklaar raad nietig, sê Itula

16 ure gelede | Politiek

Henriette Lamprecht - Dr. Panduleni Itula, tandarts van beroep en onafhanklike presidentskandidaat in die pas afgelope verkiesings, wil hê die aanstelling van nuwe lede van...

Makalani’s se voete in die water

16 ure gelede | In beeld

Die Namibiese weerkantoor het gister wéér ’n weerwaak vir wydverspreide donderstorms uitgereik, wat na verwagting in die Ohangwena-, Otjozondjupa-, Khomas- en Omahekestreek sal voorkom. Daar...

Opposisie, Itula gaan hof toe oor verkiesings

16 ure gelede | Politiek

Denver Kisting – Die amptelike opposisie, die Popular Democratic Movement (PDM), het gister by monde van sy leier, mnr. McHenry Venaani, gesê hulle gaan ook...

Noa kap na ‘leunstoel-kritici’

16 ure gelede | Misdaad

Ronelle Rademeyer - Die Teenkorrupsiekommissie (ACC) se uitvoerende direkteur, mnr. Paulus Noa, het teruggekap na wat hy “leunstoel-kritici” noem en sê pleks dat hulle dié...

STEMFEITE: OSHANA

16 ure gelede | Politiek

Die infografiek lig Ondangwa se verkiesingsuitslae uit. In 2014 het Swapo 86% van alle stemme in die kiesafdeling gewen.

Weer vir 5 Desember 2019

16 ure gelede | Weer

WEERWAAK: Donderstorms van 50 mm en meer oor 24 uur kan kitsvloede in Ohangwena, Otjozondjupa, Khomas en Omaheke veroorsaak.BINNELAND: Gedeeltelik bewolk en baie warm...

PDM steek skadukabinet aan die werk

16 ure gelede | Politiek

Denver Kisting – Mnr. McHenry Venaani, leier van die amptelike opposisie, die Popular Democratic Movement (PDM), het gister die party se skadukabinet aangekondig.Volgens hom gaan...

Vervoerpionier se roudiens Saterdag

16 ure gelede | Mense

Francoise Steynberg - Die roudiens van ’n pionier en legende in die Namibiese vervoer- en toerismebedryf, wyle mnr. Willie du Toit (68), vind Saterdag om...

Namibiër vlieg agter rooikuifloerie aan

16 ure gelede | Omgewing

Francoise Steynberg - Ná die skaars rooikuifloerie (Musuphaga rossae) onlangs vir die eerste keer langs die Kavangorivier ontdek is, het ’n kranige Namibiese vryskutfotograaf en...