Kabinet sê ja vir Chinese tabakplaas

Risiko van wetsoortreding

14 June 2019 | Ministeries
Ronelle Rademeyer



Die kabinet het die groen lig aan die Chinese tabakverbouer- en verspreider Namibia Oriental Tobacco gegee om 10 000 ha grond in 'n staatswoud met beskermde boomspesies in 'n tabakplantasie, mielie- en voerlanderye te omskep.

Die huurkontrak en die terme en voorwaardes van dié projek naby Katima Mulilo in die Zambezistreek kan ingevolge die goedkeuring deur die kabinetskomitee vir handel en ekonomiese samewerking gefinaliseer word, het die ministerie van inligting en kommunikasietegnologie gister bekend gemaak.

Hierdie goedkeuring kom in weerwil daarvan dat omgewingskonsultante vroeër gewaarsku het Namibië loop die risiko om strydig met vyf landswette, vyf VN-konvensies en 'n SADC-protokol op te tree of dit te verbreek indien die gebied in landerye omskep word.

Dit sluit in die Grondwet, die bosbouwet, die wet op die beheer van tabakprodukte, die wet op grondbewaring, die SADC-protokol op Bosbou, die VN se konvensie op klimaatsverandering, asook die konvensies op biodiversiteit en die bekamping van verwoestyning asook die Wêreldgesondheidsorganisasie (WHO) se konvensie op tabakbeheer.

Die gebied is in 'n staatswoud geleë waar verskeie van die 58 boomsoorte beskermde spesies is. Twee van hierdie spesies staan op die rand van uitwissing en is op die Internasionale Unie vir Natuurbewaring (IUCN) se rooilys.

Dr. André Faul, biowetenskaplike verbonde aan Geo Pollution Technologies, het gister by navraag gesê hoewel hulle 'n volledige omgewingsimpakstudie (EIA) aanbeveel met spesialisstudies oor spesifieke aspekte, het hulle nooit enige dokument of verslag gesien om te bepaal of dit wel gedoen is nie.

Geo Pollution Technologies het in 2013 in sy omgewingsomvangsbepaling in opdrag van Namibia Oriental Tobacco gewaarsku die genoemde kwelpunte laat rooiligte flikker en dieptestudies daaroor móét gedoen word.

“Ons het verneem die volledige EIA is gedoen en 'n omgewingsklaringsertifikaat is uitgereik, maar ons is nooit toegang daartoe gegee vir hersiening en kommentaar nie. Sover ons weet, het die ander belanghebbendes en geraakte partye ook nie die dokument gesien nie. Dit is strydig met artikel 23 van die regulasies van die omgewingsbestuurswet wat bepaal alle geraakte partye en belangstellendes moet insae hê,” sê hy.

Geo Pollution Technologies het in sy verslag gesê dit is belangrik om deur dieptestudies te bepaal presies wat die impak van die ontbossing op die omgewing gaan wees, tot watter mate insekdoders en kunsmis die grond en grondwater kan besoedel en les bes wat die wetlike implikasies gaan wees.



KOMITEE SÊ JA

Mnr. Percy Misika, uitvoerende direkteur van landbou, water en bosbou, sê 'n tegniese komitee wat deur die kabinet aangestel is om die aansoek te ondersoek, het bevind die Chinese maatskappy voldoen aan al die vereistes.

“Die komitee het aanbeveel die projek kan voortgaan,” was sy antwoord toe Republikein hom gevra het oor die aanbevelings dat verskeie dieptestudies deur kundiges eers gedoen moet word.

Volgens Misika gaan die Chinese op 7 500 ha van die 10 000 ha tabak, mielies en veevoer op 'n rotasiebasis verbou. Op die ander 2 500 ha gaan infrastruktuur soos verwerkingsaanlegte, paaie en selfs skole opgerig word. Natuurlike boomlanings sal die gewasse teen wind beskerm, sê hy.

Namibia Oriental Tobacco is die alleenagent van die Hongyunhonghe Tobacco Group of Companies wat aan die Chinese regering behoort. Dit is die vyfde grootste tabakmaatskappy in die wêreld.

Soortgelyk

 

Omkeerpunt vir Meatco

17 ure gelede | Landbou

Elvira Hattingh - Meatco het die afgelope boekjaar sy totale verliese met N$33 miljoen gesny en het boonop daarin geslaag om sy gemiddelde produsenteprys met...

Honde, katte, kinders, sushi en goeie harte

17 ure gelede | Omgewing

Tanja Bause - Die niewinsgewende organisasie Have-a-Heart op Walvisbaai het onlangs in samewerking met Mobile Animal Clinic Namibia 'n baie suksesvolle sterilisasie- en kastrasieveldtog onderneem....

Lubowski ‘krabbel terug’

17 ure gelede | Regering

Denver Kisting – Mnr. Sisa Namandje, pres. Hage Geingob se prokureur, sê me. Gabrielle Lubowski skrabbel terug nadat sy vroeër die staatshoof glo valslik beskuldig...

Blowing the whistle

17 ure gelede | Mense

Justicia Shipena Tamara !Gaoses is the first internationally recognised female 3x3 basketball referee in the country and this qualification allowed her to officiate...

LPM betreur Operasie Kalahariwoestyn

17 ure gelede | Politiek

Catherine Sasman – Die Landless People’s Movement (LPM) het sy stem by die toenemende druk gevoeg dat die regering lede van die Namibiese weermag (NDF)...

Weer vir 25 Junie 2019

17 ure gelede | Weer

BINNELAND: Sonnig en matig tot warm in die Suide. Elders sal dit sonnig en warm wees, maar baie warm in die Noorde. KUS:...

Hilton Hotel 7de keer beste in Namibië

17 ure gelede | Toerisme

Vir die sewende agtereenvolgende jaar het die Hilton Hotel in Windhoek met die World Travel-toekenning vir 2019 as die beste hotel in Namibië weggestap. “Ek...

CoW-drama kry tweede asem

17 ure gelede | Regering

Denver Kisting – Sodra sy tugverhoor afgehandel is, kan die stadsraad besluit of strafregtelike klagte ook teen mnr. Robert Kahimise, Windhoek se uitvoerende hoof, gelê...

Kalahariwoestyn-slagoffer se lyk op lorrie

17 ure gelede | Polisie

Denver Kisting – Talle Namibiërs is woedend omdat mnr. Fambauone Black (22) se oorskot die afgelope Saterdag agter op ’n lorrie terug Zimbabwe toe vervoer...