Job soek ekstra joppie by Maties

Henriette Lamprecht - Die Namibiese grondvegter en leier van die Regstellende Herposisionering-beweging (AR) is een van 'n handvol kandidate wat om die laaste benoeming deur die konvokasie op die Universiteit Stellenbosch (US) se raad meeding. Mnr. Job Amupanda vind hom in die uitgelese geselskap van 'n Afrikaanse digter tot die voormalige president van die Reserwebank in Suid-Afrika. Amupanda het sy meestersgraad in politieke wetenskap by Maties verwerf, iets wat hy as "'n hoogtepunt in my akademiese en intellektuele lewe" beskryf het. Hy deel die kandidatelys met prof. Tito Mboweni, voormalige president van die Reserwebank, die Afrikaanse digter en letterkundige prof. Joan Hambidge, dr. Corinne Oosthuizen, ’n kliniese sielkundige, en mnr. Christian van Schalkwyk, ’n prokureur en geoktrooieerde rekenmeester. In Amupanda se visiestelling sonder hy sy alma mater se internasionaliseringsagenda en transformasiepogings uit. "My kennis en ervaring as raadslid sal 'n groot bydrae op albei die monumentale gebiede lewer." Die konvokasie ( ’n vergadering van die stemgeregtigde lede van ’n universiteit soos byvoorbeeld die akademiese personeel en gegradueerde (oud)studente) kan ses lede vir die raad benoem. Dit volg op die bedanking van dr. George du Toit wat as student by die US ingeval het. Lede van die konvokasie het tot 21 Junie om te stem en kan dit onder meer op die US se webtuiste doen. Die nuwe raadslid se termyn begin op 22 Junie en strek tot 1 April 2018. Amupanda is onlangs as die vise-dekaan van die Universiteit van Namibië (UNAM) se fakulteit vir Ekonomie en Bestuurswetenskap aangewys waar hy ook dosent is. Hy het sy BA-honneursgraad by Unam behaal.

Job soek ekstra joppie by Maties

Kommentaar

Republikein 2022-05-22

Meld asseblief aan om kommentaar te lewer

Job soek ekstra joppie by Maties

Kommentaar

Republikein 2022-05-22

Meld asseblief aan om kommentaar te lewer

MELD AAN