Ingilse bring onbekende faktor na Vegkop

Skolerugby

11 July 2019 | Sport
Tielman van Lill



Die Samsung Windhoek Hoërskool Koedoebulle gaan die onbekende karakter van die besoekende Birkenhead College uit Engeland beproef wanneer hulle vandag net ná vyfuur by WHS se FNB Vegkopstadion op die veld draf.

Birkenhead College, wat op 9 Augustus sy 159ste bestaansjaar vier, het wel 'n paar jaar gelede in Namibië getoer, maar uiteraard is bitter min oor die besoekende spelers bekend.

WHS 1 het die komende naweek geen ligaverpligtinge nie en kan dus die kragmeting vir 'n paar proefnemings met kombinasies gebruik en terselfdertyd van sy junior spelers inspan.

WHS, wat ná ses wedstryde in vanjaar se Momentum o.19-premierliga met 45 ligapunte in die derde posisie is, is stadig maar seker besig om sy stempel as 'n sluimerende krag af te druk. Die ligbloues moes laas naweek hard werk om PSG Pro-Ed Akademie met 20-8 onder te kry, in 'n wedstryd waarin die Swakopmunders se hegte verdediging een van die uitstaande faktore was.

Erik Strauss, WHS se kaptein wat van onlangse harsingskudding herstel het, het van die bank af gewys hy is so reg soos 'n roer en sal vandag sy span met sy gebruiklike passie en voorbeeld lei.

Henry Kemp, hoofafrigter van die Koedoebulle, sê sy span is gereed om al sy spelers 'n kans op die veld te gee.

“Behalwe dat ons weet die ouens kom van Engeland af, het ek geen idee wat die standaard van hul spel is nie. Ek het basies geen inligting oor Birkenhead nie. Dalk is die ouens goed; mens sal nooit weet nie. Ons moet maar kyk wat op die veld gebeur en daarby aanpas. Ek glo dit sal die seuns stimuleer om vir 'n slag teen onbekende opposisie met 'n ander tipe spelstyl en temperament te speel.

“Soos sake tans op die ligaleer staan, kan ons moontlik vir die Superliga-fase kwalifiseer en ek wil (vandag) gebruik om proefnemings vir die toekoms te maak. Ons gaan beslis 'n paar nuwe kombinasies probeer. Ek wil veral vir die jonger spelers 'n kans gee om te begin en dan later die gereelde senior spelers op Birkenhead loslaat.

“Al die reserwes sal speelkans kry om hulself te bewys. Dit kan streng gesproke die laaste kans vanjaar wees wat hulle sal kry om hul merk vir die eerste span te maak.

“Daar is werlik baie talent en soveel seuns wat hul hande opsteek. Vir ons as afrigtingspan maak die talent wat tot ons beskikking is dit moeilik om 'n span te kies.

“Behalwe Erik Strauss wat van harsingskudding herstel het en weer topfiks op sy pos is, het ons tot dusver regtig 'n baie geseënde jaar sonder ernstige beserings gehad. Met Erik terug op sy pos gaan ons die vuurvreterhaker JC Rossouw, wat vir Erik as kaptein tydens sy afwesigheid ingestaan het, van die bank af speel.

“Dit gaan 'n lekker oefenwedstryd wees waar ons manne soos die agtsteman Sheron Rossouw, losskakel Geraldo Beukes, stut Oppies Opperman en flank Rowan Jansen van die reserwebank af gaan gebruik. Almal van hulle het laasweek vir die Namibiese Akademiespan in Bloemfontein gespeel,” het die breier afgesluit.

Strauss sê dit gaan lekker wees om 'n nuwe uitdaging aan te pak wat hul gaan toets.

“Van ons kant af sien ons nogal baie uit daarna, want dit is lekker om vir 'n slag teen 'n onbekende teenstander te speel. Behalwe ons normale voorbereiding, kan ons nie werklik planne vir Birkenhead beraam nie. Hulle is 'n totaal onbekende faktor wat ons karakter gaan toets, dus sal ons hulle vanaf die afskop moet vasvat.

“Ons sal met die kragmeting weer baie nuwe dinge kan leer. Byvoorbeeld om te sien hoe hulle dinge in die verskillende fasette van die spel uitvoer. Ons kan leer en dit moontlik verbeter en weer in ons span toepas. Met ons toer in Portugal het ons baie geleer en as ons by hulle kon kers opsteek, kan ons dit des te meer by die Engelse ook doen.”



HARDE LIGASTRYDE WAG

“Al ons ouens wat na die Akademieweek in Suid-Afrika was, sal as reserwes opkom. Dit gee die jonger manne die geleentheid om 'n speelkans te kry en ook ondervinding op te doen. Van die span se kant af sien ons geweldig uit na vandag se botsing en leerproses.

“Maklik gaan dit beslis nie wees nie en ons sal ook nie sommer oor hulle kan loop nie. Dit gaan 'n harde wedstryd wees en dit is presies wat ons nodig het.

“Ons laaste twee ligawedstryde in die groepfase is teen KMC/JCC Affies volgende Woensdag (17 Julie) en teen die onoorwonne voorloper Tsumeb Gimnasium drie dae later by Vegkop. Dit gaan beide klipharde botsings wees.

“Dus is (vandag) se uitstappie net die regte medisyne wat die dokter voorgeskryf het om ons vir Tsumeb Gim en Affies te slyp. Dit gaan nie maklik wees nie, maar ons sien geweldig uit na vandag en die res van die seisoen,” het Strauss aan Republikein vertel.

Die 2019 Momentum-ligas in alle ouderdomme se kwarteindrondes word op 26 en 27 Julie in Windhoek by die Hage Geingob-stadion asook by Trustco United se veld in Olympia afgehandel.

Die Koedoebulle: 1 Edmando Coetzee, 2 Jacques Marais, 3 Iyambo Sjueea, 4 Riaan Grové, 5 Conwill Draghoender, 6 Rikus van Staden, 7 Donavan Resandt, 8 Erik Strauss (kaptein), 9 Jessie Drotsky, 10 Keanan van Wyk, 11 Emil Weder, 12 Zian van Wyk, 13 Maandero Haimbodi (onderkaptein), 14 Dylan Denysschen, 15 Coenraad Pretorius.

Reserwes: 16 JC Rossouw, 17 Daniel Opperman, 18 Forché Windstaan, 19 Sheron Rossouw, 20 Rowan Jansen, 21 Tyrese de Wee, 22 Coburn Claassen, 23 Geraldo Beukes.

- [email protected]

Soortgelyk

 

Covid-19: 5de nuwe geval binne 4 dae

14 ure gelede | Gesondheid

‘n Vragmotorbestuurder in Walvisbaai het gister positief vir Covid-19 getoets.Dit is die vyfde positiewe geval sedert Woensdag. Al die persone was in kwarantyn.Persone waarmee die...

‘80% van skole gereed’

3 dae gelede | Onderwys

Henriette Lamprecht – Sowat 80% van die 1 920 staatskole oraloor in die land is gereed om leerlinge volgens verpligte gesondheidsregulasies te ontvang wanneer hulle...

Nog leerlingdokters wag om uitgeplaas te word

3 dae gelede | Gesondheid

Henriette Lamprecht – Meer as 100 leerlingdokters wag glo reeds maande om vir internskappe by staatshospitale oraloor in die land uitgeplaas word. Die 166 leerlingdokters...

Stadspolisie van hardhandigheid beskuldig

3 dae gelede | Misdaad

Denver Kisting – ’n Inwoner van Groot Aub, mnr. Richard Davids, voer aan ’n beampte van die stadspolisie, waarnemende sersant Erwen Katiti, het hom Dinsdaglaatmiddag...

Weer vir 22 Mei 2020

3 dae gelede | Weer

BINNELAND: Gedeeltleik bewolk en warm in die streke van ||Kharas en Hardap. Elders sal dit sonnig en warm tot baie warm wees.KUS: Gedeeltelik bewolk en...

‘Vervoer van drank nie ’n misdaad’

3 dae gelede | Misdaad

Francoise SteynbergDie blote vervoer van drank is nie ’n misdaad nie en kan nie as redelike gronde gebruik word vir agterdog van die koop of...

Vroue in kwarantyn toets positief vir Covid-19

3 dae gelede | Gesondheid

Henriette Lamprecht – Twee vroue het in kwarantyn positief vir Covid-19 getoets. Dit bring Namibië se totaal bevestigde Covid-19-gevalle op 18 te staan. Volgens die...

Ebikes: vinnig, goedkoop en groen

3 dae gelede | Mense

Tanja Bause Nie te veel besighede kan sê dat hulle in die Covid-19-tyd so goed aangepas het dat hulle nuwe werknemers moes aanstel nie. Ebikes4Africa...

Market Watch Covid page - snippets

3 dae gelede | Gesondheid

The Namibia Football Association (NFA) executive committee has yet to decide what to do with funds it expects to receive from the Federation of International...