‘Humanitêre krisis’ in nedersettings

Geingob spreek topbesluitnemers toe

30 January 2019 | Regering
Augetto Graig - Die humanitêre krisis wat inwoners van die hoofstad se informele nedersettings daagliks ervaar, geniet tans die aandag van die land se hoogste besluitnemers.

President Hage Geingob het gister ’n afvaardiging van leiers in die sentrale regering, die Khomasstreek, en die hoofstad se raad en bestuur na Staatshuis ontbied om dié voortdurende ramp, asook oplossings daarvoor te bespreek.

Die munisipale kenner, prof. Faniel Maanda, het die omvang van die krisis verduidelik.

Hy het gesê daar is tans 87 informele nedersettings in en om die hoofstad.

Windhoek benodig N$1 miljard om die 26 mees gevestigde nedersettings in die stad te ontwikkel, het hy gesê.

Groei

Terwyl die hoofstad se bevolking na verwagting oor 23 jaar gaan verdubbel, vermeerder die hoeveelheid mense in nedersettings tans só vinnig dat húl bevolking binne 9,5 jaar sal verdubbel, het hy gesê.

Tans woon sowat 131 000 mense uit Windhoek se totale bevolking van sowat 394 000 mense in hierdie nedersettings.

Maanda het gesê die lewe in Windhoek se nedersettings kan met die wêreld se agterbuurte vergelyk word.

Inwoners is kwesbaar weens misdaad en ’n gebrek aan water, sanitêre en gesondheidsgeriewe, terwyl oormatige hitte, die voortdurende moontlikheid van brande, oormatige koue en kitsvloede hulle ook in gevaar stel.

Siekte

Swak toegang tot basiese dienste, die ophoop van vullis, ontbossing en woestynvorming, asook openbare ontlasting vererger dié omstandighede, en dra ook by tot die verspreiding van die hepatitis-epidemie wat die hoofstad verlede jaar getref het, het Maanda gesê.

Hy skat tot 8 000 nuwe mense vestig hulself jaarliks in Windhoek se informele nedersettings, met ’n gevolglike behuisingsbehoefte van sowat 2 000 huisgesinne.

Die voortdurende toestroming na veral die Havana-nedersetting het Windhoek se munisipaliteit genoodsaak om ’n draad te span om dié invloei te beperk.

Maanda het gewaarsku die mislukking om basiese dienste te verskaf kan tot meer misdaad en uiteindelik meer burgerlike onrus en minagting van die regering lei.

“Die stad kan onregeerbaar raak,” het hy gewaarsku.

Nóú is die tyd

Die burgemeester van Windhoek, mnr. Muesee Kazapua, het gesê die begin van die jaar is ’n goeie tyd om dié probleem aan te spreek.

“Mense is op soek na geleenthede,” het hy gesê.

Hy het ’n beroep gedoen op die streng toepassing van maatreëls om dít te bekamp.

Die munisipaliteit se uitvoerende hoof, die pas heraangestelde mnr. Robert Kahimise, het gesê die hoofstad se bestuur versoek dat ’n noodtoestand afgekondig word om te keer dat die situasie vererger.

“Daar is baie wat ons reeds doen, maar dit is nie genoeg nie,” het hy gesê.

Kahimise het gesê die gryp van grond en die onwettige oprigitng van informele huise verdubbel volgens die geskiedenis tydens ’n verkiesingsjaar.

Geingob het gesê die dringendheid van die situasie het niks te doen met die komende nasionale verkiesing later vanjaar nie.

Hy het gesê sy besluit om in te gryp is ’n regstreekse uitvloeisel van die resolusies van 2018 se tweede nasionale grondkonferensie.

Shack Dwellers bied hoop

Die eerste minister, me. Saara Kuugongelwa-Amadhila, het gesê omstandighede in Namibië se nedersettings is onmenslik.

Volgens haar word vennootskappe met die private sektor, asook die toepassing van ’n buigsame grondbesitstelsel en meer ondersteuning vir die Shack Dwellers Federation of Namibia (SDFN) as moontlike oplossings oorweeg.

Geingob het gesê die SDFN bou huise vir lede teen sowat N$40 000 per huis, terwyl privaat ontwikkelaars en selfs die regering se eie National Housing Entreprise (NHE) slegs huise teen N$300 000 elk kan verskaf.

Intussen ondersteun die president die benadering dat die Namibiese polisie meer moet doen om die bou van onwettige huise in die eerste plek te voorkom.

Volgens hom word die vryheid van beweging misbruik, wat Namibië se grondwet verseker.

“Daar is geen absolute vryheid nie,” het hy gesê.

“Kom ons moedig hulle aan om te bly waar hulle gebore is en waar hulle vandaan kom,” het hy gesê oor die talle mense wat gedurig Windhoek toe verhuis.

Soortgelyk

 

Houtskoolbedryf sien enorme groei

2 dae gelede | Landbou

Elvira Hattingh op Otjiwarongo - Die Namibiese houtskoolbedryf het 'n "ontploffing in houtskoolproduksie" die afgelope jaar ervaar en 'n groei van 33% in een jaar...

Lodge, besigheid beroof – sewe vas

2 dae gelede | Misdaad

Henriette Lamprecht – Sewe verdagtes was gister reeds agter tralies nadat hulle by twee verskillende inbrake in die Omahekestreek betrokke was. Een van die inbrake...

Tolpaaie dalk op pad

2 dae gelede | Vervoer

font face="Verdana" >Catherine Sasman - Die Padfondsadministrasie (RFA) beoog om die lewensvatbaarheid van tolpaaie in Namibië te ondersoek.Dít as ’n moontlike bykomende bron...

Grondwet praat jou taal

2 dae gelede | Howe

Denver Kisting – Dit is belangrik dat die oppergesag van die land, die Grondwet, toeganklik is vir Jan en San Alleman.Alle wette in Namibië is...

Agterstallige pos glo nie NamPost se skuld

2 dae gelede | Ministeries

Catherine Sasman – Volgens NamPost is die agterstand in die aflewering van pos en pakkies nie sy skuld nie, maar wel die Suid-Afrikaanse Internasionale possentrum...

Weer vir 9 Augustus

2 dae gelede | Weer

BINNELAND: Gedeeltelik bewolk en warm in die Suide, maar baie tot bloedig warm in die Noorde.KUS: Gedeeltelik bewolk en matig tot warm met miskolle in...

Nou aan die gang

2 dae gelede | Kuns en vermaak

» Vanaand is die immergewilde Windhoek City Market weer in die hoofstad. Geniet ’n onbeperkte vonkelwynproe van verskeie wynkelders uit Suid-Afrika se produkte. Dié mark...

Klei en keramiek by negende biënnale

2 dae gelede | Kuns en vermaak

Die Pottebakkersvereniging van Namibië (PAN) se 9de Keramiek Biënnale word eersdaags by die Nasionale Kunsgalery van Namibië (NAGN) aangebied sal word. Die geleentheid is die...

N$150 miljoen vir landskapbestuur

2 dae gelede | Ministeries

Die ministerie van die omgewing en toerisme en die Nasionale Beplanningskommissie van Namibië het Woensdag ’n ooreenkoms met die Verenigde Nasies se Ontwikkelingsprogram (UNDP) onderteken,...