Hou houtgerus oor papierwerk

Onwettige boomkappery duur voort, sê bron

15 March 2019 | Omgewing
Catherine Sasman - Ingeligte bronne sê die onwettige kap van skaars en beskermde bome duur in die verre noordooste van die land voort ondanks die ministerie van die omgewing en toerisme se verbod daarop sedert 26 November verlede jaar.

Dié bronne beweer die Chinese sakeman mnr. Xuecheng Hou se New Force Logistics CC is tans besig om bome op plase suidoos van Rundu langs die D3401- en D3425-roetes na Cumo en Gcwatjinga in Kavango-­Oos af te kap.

Van die bronne sê selfs dat dit nou “op 'n nywerheidskaal” plaasvind.

Die bronne, wat anoniem wil bly uit vrees vir weerwraak, sê Hou het kamp opgeslaan tussen Rundu en Ncaute waar hy hope hout berg wat pas gekap is.

“'n Mens sien die verskil tussen bome wat onlangs afgekap is en dié wat vir 'n lang tyd al in die son lê. Dié wat pas afgekap is, vertoon geel terwyl die ouer hout 'n rooier kleur het,” sê een van die bronne.

Volgens hom het Hou die afgelope drie weke vyf of ses lorrievragte vol hout na Walvisbaai gestuur om hoofsaaklik na die Chinese mark uitgevoer te word.

Een van die lorries is voorgekeer aangesien sy lisensie verval het.

“Hou gee nie om of lisensies nog geldig is nie. Al wat hy doen, is om die boete te betaal. Dit pla hom nie,” het die bron gesê.

Hy het ook gesê Hou steur hom ook nie aan die oorladingreël nie en sommige van die lorries vervoer tot 40 ton hout pleks van die voorgeskrewe 20 ton per vragmotor.

Republikein verneem verder dat die onreëlmatige oes en vervoer van skaars houtsoorte 'n hoogtepunt bereik het, aangesien houthandelaars in die lig van die moratorium 'n totale verbod op die houtbedryf vrees. Die ingeligte bronne beweer ook sommige bosbou-amptenare by die ministerie van landbou, water en bosbou se kantoor op Rundu en elders in die streek is kop in een mus met die houthandelaars.

Een bron sê Hou is koorsagtig besig om hout op 35 plase in die Ncaute- en Cumo-gebied te oes nadat hy in ­September verlede jaar die regte daarop bekom het.

Voor die moratorium ingestel is, het hy die kwota hout op 20 plase reeds gekap en is nou besig met die oorblywende 15 plase.

Volgens hom kan Hou met sy gesofistikeerde toerusting tot 740 bome per dag afsaag.

“Hulle (die houthandelaars) verwoes woude,” sê hierdie bron en sê hulle saag en laai bedags die hout, maar die lorries beweeg net snags.

Hy het verder vertel Hou betaal tot N$500 000 per lorrie vir die vervoer na Walvisbaai en die transaksies word dikwels snags in die middel van die woude beklink.

Hou se ­WhatsApp-profielfoto is 'n advertensie vir sy besigheid, wat hy as volg bemark: “Koop hout (stomp en blokke), kontantbetalings ­beskikbaar (vir) oes, houtvervoer en houtuitvoer”.

Hierop kan foto's gesien word van 'n reuselorrie wat kreun onder swaar boomstompe, 'n vurkhyser, 'n ­afgekapte boom en Maersk-skeepshouers wat op lorries gelaai word.

Dié bron na aan hom voer aan “hout is die nuwe goud” en sê Hou se winkel in China Town in Windhoek is net 'n rookskerm om sy ware “geldmaak-bedrywighede” te verdoesel.

Hou het by navraag al hierdie beweringe ten sterkste ontken en sê hy is nie by die oes van hout betrokke nie.

“Eerste dinge eerste: Ons is 'n ­logistieke maatskappy vir pad- en plaasvervoer,” het hy gesê en by­gevoeg hy het verskillende kliënte wat hom betaal om vir hulle hout na Walvisbaai te vervoer.

Op die bewering dat “Chinese bome afkap”, het hy gesê: “Geen Chinese mens sal daardie tipe van fisieke werk doen nie”.

Hou sê aangesien hy 'n vervoer­onderneming het, moet hy 'n “oessertifikaat, 'n vervoersertifikaat en 'n kwaliteitsinspeksiesertifikaat” hê voor hy die hout vervoer.

Hy sê verder al die plase (sy kliënte) het “wettige dokumente” om hout te oes.

“Ons benut ons masjiene en toerusting om hulle hout te koop. As hulle dink die prys is onredelik, kan hulle 'n ander koper vind.

“Die regering het vroeër meer as 300 permitte uitgereik om bome op plase af te kap. Ons help net 'n klein ­persentasie van mense met vervoer,” het Hou aan Republikein gesê.

Hy het ook ontken daar was on­gelukke waarin lorries omgeslaan het, wat te swaar gelaai is.

Vrae wat aan die ministerie (van landbou, water en bosbou) oor hierdie kwessies gestuur is, is ná weke se wag steeds nie beantwoord nie.



UITVOERSTATISTIEKE

Volgens NamPort se statistieke is 11 660 ton hout van Namibiese oorsprong reeds in 2019 deur Walvisbaai uitgevoer. Altesaam 7 502 ton is na China uitgevoer.

Tussen 2016 en 2018 is 44 652 ton hout uit Zambië, 2 354 ton uit Angola en 49 852 ton uit die Demokratiese Republiek die Kongo (DRK) en 836 ton uit ander SADC-lande via Walvis­baai na China, Viëtnam, Brittanje, Nederland en Singapoer uitgevoer.

Tussen 2014 en 2018 het Namibië met sy klein hoeveelheid woude 8 428 ton hout na lande soos Chili, China, Duitsland, Spanje, Frank­ryk, ­Brittanje, Nederland, die VSA, Grieke­land, Suid-Afrika, Suid-­Korea, Taiwan, Angola, Australië, België, Mexiko, Maleisië, Singapoer en St. Helena uitgevoer.

Soortgelyk

 

‘Burger in rou’ bepleit genesing

7 ure gelede | Kuns en vermaak

Ronelle Rademeyer - ‘n Optog vind vanaand (Dinsdag) vanaf die Goethe Instituut se kultuursentrum na die Alte Feste-museum plaas waar ‘n gedramatiseerde visuele uitbeelding van...

Windhoek se waterverbruik bly té hoog

9 ure gelede | Omgewing

Windhoekers het die afgelope week 7% méér water gebruik as wat toelaatbaar tydens droogtetye is en kon weereens nie die vereiste teiken van 10% besparings...

Brexit: Uitstel bied uitvoerders blaaskans

18 ure gelede | Ministeries

Ronelle Rademeyer - Die moontlike negatiewe impak wat ‘n haakplek in die onderhandelinge vir ‘n nuwe handelsooreenkoms met Brittanje op uitvoerders kon hê, is deur...

Erindi: Chinese het nié aanbod gemaak

18 ure gelede | Ministeries

Elvira Hattingh - Die eienaars van die Erindi Private Wildreservaat het nie ‘n koopaanbod van enige Chinese burgers ontvang nie. Mnr. Sisa Namandje, Erindi se...

Geen laatregistrasie vir nasionale eksamens

18 ure gelede | Ministeries

Henriette Lamprecht - Geen laatregistrasie sal ná spertye gedoen word vir deeltydse studente vir die Junior Sekondêre Sertifikaat (graad 10) of voltydse sowel as deeltydse...

Leeujagters geskiet

18 ure gelede | Omgewing

Ileni Nandjato – Die Namibiese polisie in die Oshanastreek het ‘n saak van poging tot moord geopen ná me. Amalia Sheya (51), ‘n werknemer van...

Weer vir 26 Maart

18 ure gelede | Weer

BINNELAND: Gedeeltelik bewolk en baie tot bloedig warm in die Suide en die Zambezistreek, andersins gedeeltelik bewolk en baie tot bloedig warm met geïsoleerde donderbuie...

Kriminalisering van aborsie 'werk nie'

18 ure gelede | Regering

Henriette LamprechtDie hoë siekte- en sterftesyfer verwant aan onveilige, onwettige aborsies bewys die kriminalisering van aborsie keer onwettige aborsies nie werklik nie.“Hoewel dit wyd erken...

N$210 miljoen vir registrasiepersoneel

18 ure gelede | Regering

Denver KistingMnr. Theo Mujoro, die Verkiesingskommissie van Namibië (ECN) se uitvoerende hoof, sê die N$67 miljoen wat aan hulle toegeken is, is nie voldoende om...