Horn: Namibië sal grondprys betaal

Denver Kisting – As die grondkwessie in Suid-Afrika skeefloop, sál Namibië ook die prys betaal.

Dít is omdat Namibië steeds, veral op ekonomiese front, ’n gevangene van dié buurland is.

Só het die politieke ontleder en akademikus, prof. Nico Horn, gister gemaan.

Horn se waarskuwing kom voor die 38ste beraad van die Suider-Afrikaanse Ontwikkelingsgemeenskap (SADC) wat môre in Windhoek afskop.

Pres. Hage Geingob sal sy hande vol hê as die SADC se nuwe voorsitter, het ontleders gister by navraag gesê.

Geingob neem die leisels by Suid-Afrika oor.

Horn sê ’n mens sou hoop die SADC-beraad sal politieke verantwoordbaarheid onder die loep neem.

Dít veral teen die agtergrond van die verwikkelinge in Zimbabwe, sê hy.

Behalwe dat mens nie weet of die SADC-leiers wel omstrede kwessies gaan bespreek nie, sal dit beslis nie in die openbaar gedoen word nie, sê Horn.

Volgens hom het die doodsklok destyds vir kritiese denke binne dié streekliggaam gelui toe die Campbell-saak voor die SADC-tribunaal gedien het.

Wyle mnr. Mike Campbell het etlike jare gelede die Zimbabwiese regering voor die tribunaal gedaag nadat sy plaas onteien is.

Baie is van mening die SADC is niks anders as ’n vereniging van broederskap wat wegskroom van omstrede sake nie, waarsku Horn.

Hy sê selfs belangrike gesprekke rondom integrasie binne die streek het tot dusver min vrugte afgewerp. “Ons het nog baie min daarvan gesien.”

Dr. Charles Mubita, ’n ander analis, het gister gesê Geingob se sukses as voorsitter sal afhang van hoe hy met ander lidlande se leiers sal kan beraadslaag.

“Dit sal alles steun op sy vermoë om te beraadslaag en ander te oortuig.”

Aangesien die SADC volgens ’n troikastelsel bestuur word, sal Geingob deurgaans met die uittredene voorsitter en sy adjunk, wat by die beraad verkies sal word, moet beraadslaag, sê Mubita.

“Hy sal gewoond moet raak daaraan om die organisasie te lei en met twee mense te beraadslaag.”

Geingob sal hiernaas sekere besluite baie vinnig moet neem en sal nie kan wag tot ’n situasie handuit ruk nie, sê Mubita.

Maar, waarsku hy, elke SADC-lidland is ’n soewereine staat, “en daar kan nie voorgeskryf word wat hulle moet doen nie. Hy sal die samewerking van die lidlande benodig.”

Mubita voorsien ook Geingob sal voortdurend die uitdaging hê om sy nasionale verantwoordelikhede met dié van die streek te balanseer.

Oor verwikkelinge in die streek het Geingob verlede week in ’n onderhoud met Republikein gesê: “SADC is een van die sekerste streke op die vasteland. As nuwe voorsitter werk ons daaraan om die proses van streekintegrasie te verdiep. Die toekoms van die streek lyk goed.”