Hoograma op Rehoboth woed voort ná skorsings
Ofskoon alle aanduidinge is die geskorste Rehoboth-dorpsraadslede is op pad terug, bly dié plaaslike owerheid omstrede.
Denver Kisting – Die ministeriële verteenwoordiger wat sake op Rehoboth moes regruk, me. Nathalia /Goagoses, sê sy’t haarself uit daardie verantwoordelikheid “gedwing”.
Dít kom nadat sy moedeloos geraak het oor die gebrek aan verantwoordbaarheid, sê sy.
Dat geskorste raadslede “net so teruggebring word asof niks gebeur het nie”, blyk die hoofdoring in haar vlees te wees.
“Hulle moet aanspreeklik gehou word,” het sy gister gesê.
Dr. Peya Mushelenga, minister van stedelike en landelike ontwikkeling, het in Maart verlede jaar die ganse dorpsraad geskors.
/Goagoses het gister by navraag gesê sy kon nie langer aanbly en haar eie beginsels daardeur ondermyn nie.
Haar termyn het amptelik in September ten einde geloop en Oktober het kragtens ’n ooreenkoms met Mushelenga as kennismaand gedien, sê sy.
Hoewel sy “tegnies gesproke” steeds in die tuig is tot eerskomende Donderdag het sy Vrydag reeds amptelik die leisels aan die burgemeester, me. Christina Blaauw, oorhandig.
Volgens haar het sy die afgelope drie weke die geskorstes op die hoogte gebring van hoe sy die dorp administratief probeer bestuur het.
/Goagoses sê sy is hartseer oor die stand van sake op Rehoboth.
“Die skade wat gedoen is, is groot.”
Volgens haar is haar pogings as ’n grap gesien “en ek is hierdie kant ernstig”.
Mushelenga het gister gesê: “Geliewe kennis te neem dat ek nog geen aankondiging oor die Rehoboth-kwessie gemaak het nie. Dit is voortydig om tot dan op die kwessie kommentaar te lewer.”
Toe hy gepols is oor ’n berig in ’n plaaslike Rehoboth-koerant waarvolgens die skorsings opgehef is, het hy gesê: “Om raadslede weer aan te stel of te onttrek, word deur die Staatskoerant gedoen. Enige Staatskoerant wat dit sê? Datum en nommer?”
Oor Goagoses se tweede sesmaandetermyn wat ten einde geloop het, sê hy: “Daar is geen eerste en tweede termyn nie. Sy dien as die minister se verteenwoordiger sedert die datum van haar aanstelling tot die minister anders besluit.”
Mushelenga het in ’n stadium aan Republikein gesê: “Die Rehoboth-raadslede sal net weer aangestel word wanneer ons tevrede is die bedrywighede van die munisipaliteit het heeltemal na normaal teruggekeer.”
/Goagoses het gister gesê sy sal aan die einde van dié week alles onthul wat sy by die plaaslike owerheid ervaar het. “Rehoboth sal ondergaan as ons stilbly. Ek sal volle verantwoordelikheid aanvaar vir dit wat ek sal sê. Ek sal die nasie vertel.”
Sy sê sy besef sy gaan waarskynlik “in die moeilikheid kom. Ek is nie bang nie. Dis 46 000 inwoners se welstand wat op die spel was”.
Die Rehoboth-dorspraad is die afgelope jare pal in die nuus vanweë bewerings van wanbestuur.
/Goagoses sê daar is hoop mits dinge reg gedoen word.
Sy sal ook tydens haar ontboeseming oop kaarte speel oor dit was sy nié bereik het nie, het sy gister gesê.
- [email protected]
Dít kom nadat sy moedeloos geraak het oor die gebrek aan verantwoordbaarheid, sê sy.
Dat geskorste raadslede “net so teruggebring word asof niks gebeur het nie”, blyk die hoofdoring in haar vlees te wees.
“Hulle moet aanspreeklik gehou word,” het sy gister gesê.
Dr. Peya Mushelenga, minister van stedelike en landelike ontwikkeling, het in Maart verlede jaar die ganse dorpsraad geskors.
/Goagoses het gister by navraag gesê sy kon nie langer aanbly en haar eie beginsels daardeur ondermyn nie.
Haar termyn het amptelik in September ten einde geloop en Oktober het kragtens ’n ooreenkoms met Mushelenga as kennismaand gedien, sê sy.
Hoewel sy “tegnies gesproke” steeds in die tuig is tot eerskomende Donderdag het sy Vrydag reeds amptelik die leisels aan die burgemeester, me. Christina Blaauw, oorhandig.
Volgens haar het sy die afgelope drie weke die geskorstes op die hoogte gebring van hoe sy die dorp administratief probeer bestuur het.
/Goagoses sê sy is hartseer oor die stand van sake op Rehoboth.
“Die skade wat gedoen is, is groot.”
Volgens haar is haar pogings as ’n grap gesien “en ek is hierdie kant ernstig”.
Mushelenga het gister gesê: “Geliewe kennis te neem dat ek nog geen aankondiging oor die Rehoboth-kwessie gemaak het nie. Dit is voortydig om tot dan op die kwessie kommentaar te lewer.”
Toe hy gepols is oor ’n berig in ’n plaaslike Rehoboth-koerant waarvolgens die skorsings opgehef is, het hy gesê: “Om raadslede weer aan te stel of te onttrek, word deur die Staatskoerant gedoen. Enige Staatskoerant wat dit sê? Datum en nommer?”
Oor Goagoses se tweede sesmaandetermyn wat ten einde geloop het, sê hy: “Daar is geen eerste en tweede termyn nie. Sy dien as die minister se verteenwoordiger sedert die datum van haar aanstelling tot die minister anders besluit.”
Mushelenga het in ’n stadium aan Republikein gesê: “Die Rehoboth-raadslede sal net weer aangestel word wanneer ons tevrede is die bedrywighede van die munisipaliteit het heeltemal na normaal teruggekeer.”
/Goagoses het gister gesê sy sal aan die einde van dié week alles onthul wat sy by die plaaslike owerheid ervaar het. “Rehoboth sal ondergaan as ons stilbly. Ek sal volle verantwoordelikheid aanvaar vir dit wat ek sal sê. Ek sal die nasie vertel.”
Sy sê sy besef sy gaan waarskynlik “in die moeilikheid kom. Ek is nie bang nie. Dis 46 000 inwoners se welstand wat op die spel was”.
Die Rehoboth-dorspraad is die afgelope jare pal in die nuus vanweë bewerings van wanbestuur.
/Goagoses sê daar is hoop mits dinge reg gedoen word.
Sy sal ook tydens haar ontboeseming oop kaarte speel oor dit was sy nié bereik het nie, het sy gister gesê.
- [email protected]
Kommentaar
Republikein
Geen kommentaar is op hierdie artikel gelaat nie