Hond is held in aanval

04 January 2019 | Misdaad
Elvira Hattingh - ‘n Geliefde familiehond het waarskynlik ‘n jong vrou se lewe op Oujaarsdag gered toe sy tydens ‘n huisbraak herhaaldelik gewapende rowers van haar eienaar afgeweer het en in die proses ernstige beseer is.

Bella die boerboelhond is in die nek en skouer gesteek, van haar spiere is afgesny en ‘n slagaar getref, wat veroorsaak het dat sy baie bloed verloor het. Die boewe het haar ook met ‘n glasbottel in die gesig geslaan, wat haar neus beseer en haar lip gesny het.

Me. Clarissa Stofberg (20) vertel sy was alleen in hul huis in Avis terwyl haar ma, tannie en suster om 23:30 gery het om vinnig na die stad se Nuwejaar-vuurwerkvertoning te gaan kyk, toe twee boewe die deure oopgebreek het en met messe in hul huis instorm.

“Ek het op die sitkamerbank gesit met Bella naby toe die boewe die huis binnegekom het. Ek kon op hul gesigte sien dat hulle nie verwag het ek gaan daar wees nie,” het ‘n getraumatiseerde Stofberg gister aan Republikein vertel.

BELLA BESKERM

Stofberg sê hulle het gesê hulle gaan haar doodmaak as sy enige geluid maak. Sy het hulle met die sitkamerbank se kussings gegooi en gevra wie hulle is toe hulle haar die eerste keer met die messe bestorm het.

Dis toe dat Bella die eerste keer tussenbeide tree en die boewe afweer, en die boewe haar met die mes steek.

In die proses het hulle haar ‘n ernstige snywond aan die nek toegedien. Stofberg sê die boewe het haar en Bella in ‘n hoek in die sitkamer vasgekeer, terwyl sy vir Bella vasgehou het en met haar arm drukking op die bloeiende wond probeer plaas het.

Sy vertel die boewe is die hele huis deur en het haar vir ‘n skootrekenaar en haar selfoon gevra.

Sy het eers ontken dat sy ‘n selfoon het, waartydens hulle haar weer wou bydam en gesê het hulle het haar met ‘n selfoon gesien. Bella het haar op die aanval gegaan en is weer beseer.

“Dis toe dat ek vir Bella gryp en my selfoon vir hulle gooi. Ek het vir hulle gesê hulle moet alles vat wat hulle wil hê, maar net vir my en Bella uitlos,” het Stofberg gesê.

Sy sê sy het heeltyd probeer om nie vir hulle te kyk nie omdat sy bang was hulle sou haar dan doodmaak aangesien sy hul gesigte gesien het.

“Danksy Bella kon hulle nie náby my kom nie. Sy het geensins enige vrees getoon nie. Ek dink as ek nie daar was nie, sou hulle Bella doodgemaak het,” het Stofberg hartseer gesê.

Die boewe het die huis met hul televisie en ‘n DVD-speler verlaat. Stofberg het toe uitgehardloop en by bure aangeklop, maar niemand was tuis nie.

“Ek was só in skok en my bene was lam - terwyl ek gehardloop het, het ek kort-kort geval.”

HULP DAAG OP

Eindelik het sy ‘n sekuriteitsvoertuig in die straat teëgekom. Die sekuriteitswag het vir haar ‘n selfoon gegee om haar ma te bel.

Terwyl sy buite was, het Bella in die huis rondgeloop en báie bloed verloor, voordat sy in Stofberg se kamer gaan lê het.

Stofberg sê sy en haar ma het op die sypaadjie vir die ambulans gewag, terwyl haar suster en haar tannie vir Bella veearts toe geneem het. Terwyl sy gewag het, het skok ingetree en het sy aanvalle begin kry.

Sy en Bella is weer terug by die huis, maar Stofberg sê sy is baie bang en het snags dieselfde nagmerrie oor en oor. “Dit voel nog alles baie onwerklik, asof dit nie kon gebeur het nie,” het sy aan Republikein gesê.

Stofberg se ma, Sandra, sê haar dogter is erg getraumatiseerd en sy het die vrees uitgespreek dat as die boewe haar so met ‘n mes moes steek, sy dit dalk nie sou oorleef het nie.

“As dit nie vir Bella was nie, het hulle Clarissa beslis gesteek en dalk nog meer kwaad aangedoen,” het sy gesê.

BELLA IS SPESIAAL

Wat Bella nog meer spesiaal maak, is dat Sandra se man die hond vier maande voor sy dood vir hulle as gesin gekry het. Bella is nou sowat vier jaar oud en baie beskermend.

“As sy nie so ‘n groot, sterk hond was nie, was sy vir seker dood. Die veearts sê sy weeg tussen 40 en 50 kg.

“Almal wat al daardie bloed in die huis gesien het, kon nie glo dat Bella oorleef het nie,” het Sandra gesê.

Sy sê die hele voorval het in sowat tien minute gebeur. Hulle het 23:30 gery om die vuurwerk te gaan kyk en presies om 23:43 het Stofberg haar gebel.

“Hulle moes ons dopgehou het en het toegeslaan die oomblik toe ons ry,” het sy gesê.

Sandra sê die veearts kon Bella binne tien minute ná die aanval help en sy was drie ure lank in die teater.

“Die veearts het goeie werk gedoen en die hond se lewe gered. Clarissa het waarskynlik ook Bella se lewe gered deur drukking op die wond te plaas,” het sy gesê.

Sy het haar dankbaarheid uitgespreek teenoor die gemeenskap, die buurtwag en sekuriteitsmaatskappye wat hulle bygestaan het.

“Mense het selfs saamgespan om Bella se veeartsrekening van N$6 000 te betaal.”

Soortgelyk

 

Padgebruik al duurder

2 ure gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Padgebruik al duurder

2 ure gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Gesondheid: Advertensie vals

3 ure gelede | Gesondheid

Die ministerie van gesondheid en maatskaplike dienste (MoHSS) sê 'n inligting wat op sosiale media sirkuleer oor opleidingsgeleenthede by die ministerie is vals. Die vals...

'n Seder val in Swapo

13 ure gelede | Mense

Ronelle Rademeyer - Huldeblyke stroom sedert vroeg gisteroggend in die sosiale media in nadat dit bekend geword het Namibië se voormalige vise­president (2015 – 2018)...

Duitsland gee ou kruis terug

13 ure gelede | Plaaslik

Ronelle Rademeyer - Een van die belangrikste artefakte uit die glorieryke ontdekkersera van die Portugese seevaarders sal in Augustus deur die Duitse museum vir geskiedenis...

Weer vir 20 Mei 2019

13 ure gelede | Weer

WEERWAAK: Koue en winderige toestande word in die Suide verwag. Die nodige voor­sorgmaatreëls moet getref word. BINNELAND: Gedeeltelik bewolk en warm tot baie warm in...

Namport dank 86 werkers af

13 ure gelede | Plaaslik

Die Namibiese haweowerheid, Namport, het Vrydag aangekondig 86 werkers by die vraghouerterminaal by die Walvisbaaise hawe wat in Augustus aan 'n onwettige staking deelgeneem het,...

Speaker dring aan jeug moet by kiesproses betrek word

13 ure gelede | Politiek

Denver Kisting - Die speaker van die Nasio­nale Vergadering (NV), prof. Peter Katjavivi, sê die jeug moet by die verkiesings­proses betrek word.Die uitvoerende hoof van...

'Sam Nujoma is 'n ikoon'

13 ure gelede | Regering

Stigterspresident Sam Nujoma se 90ste verjaardagvieringe is Saterdag op Etunda in die Omusatistreek gevier en deur verskeie hooggeplaastes bygewoon. President Hage Geingob het Nujoma as...