Hond in brand gewond

13 July 2018 | Plaaslik
Tanja Bause



Vyf sinkhuise is Maandag in 'n brand in die Mondesa-woonbuurt op ­Swakopmund verwoes.

Niemand is in die voorval beseer nie, maar 'n hond genaamd Sussie Dicklas het erg deurgeloop.

Haar eienaar, mnr. Dicklas Geiseb, het gesê hy was van die werk af op pad huis toe toe hy rook by sy huis sien uitkom. Sy dogter, wat op Arandis werk, het gebel en gevra of haar kind veilig is.

“Ek wou weet wat sy bedoel en toe vertel sy my van die brand. Ek het in 'n taxi gespring en huis toe gejaag. Toe ek daar aankom, sien ek die huis is besig om af te brand,” het Geiseb gesê.

Volgens hom was Sussie buite die huis vasgemaak en omstanders het gesukkel om haar los te maak omdat sy angstig en wild was.

“Sy het nie geweet hulle wil haar net help nie. Sussie het in die huis in gehardloop en omstanders het haar hoor tjank,” het hy gesê.

Ná die brandweer die brand geblus het, het Geiseb Sussie gaan soek en haar in die enigste kamer wat nie afgebrand het nie, onder die bed gevind.

“Sy het daar weggekruip. Ek het haar onmiddellik in 'n taxi gelaai en haar na die Swakop Vet Clinic geneem.”

Sussie het erge brandwonde aan haar kop, veral haar neus, en voorlyf opgedoen.

Have-a-Heart, 'n organisasie wat mense met 'n lae inkomste se diere gratis steriliseer en kastreer, sal vir Sussie se behandeling betaal. Sussie is aan die organisasie bekend omdat hulle haar onlangs gesteriliseer het.

Volgens Have-a-Heart se woordvoerder wou Sussie aanvanklik niks by die kliniek eet nie.

“Dit was belangrik dat sy eet omdat sy die proteïene nodig het om gesond te word. Sy het op haar tweede dag darem maalvleis verslind,” het die woordvoerder gesê.

“Sy gaan in die nabye toekoms dalk 'n oogoperasie nodig kry. Tans kry sy anti­biotika en pynmedikasie en ons hoop die wonde ontsteek nie en dat sy vinnig gesond sal word. Sussie was baie opgewonde om haar eienaar te sien. Sy is 'n heel ander hond as haar eienaar by is. Ons hoop sy kan gou huis toe gaan, want sy verlang na haar eienaar.”

Geiseb het Sussie vier jaar gelede as baba­hondjie by 'n man in Mondesa gekoop. Hy en sy gesin van vyf, wat almal in die huis bly, het amper al hul besittings in die brand verloor.

“Dit is net die een kamer waarin ek vir Sussie gekry het, wat nie afgebrand het nie. Die res van die huis, ons klere, meubels, elektriese toerusting, alles is vernietig,” het hy gesê.



ORGANISASIES WAT HELP

Noodgevalle soos Sussie s'n word deur Animal Kind International ­gefinansier, wat geld vir dié doel aan Have-a-Heart beskikbaar maak. Geld wat vir sterili­sasies geskenk is, word ook slegs ­daarvoor aangewend.

Afgesien van die sterilisering en kastrering van honde en katte verskaf Have-a-Heart ook inentings aan diere en ontwurm hulle.

Die organisasie is afhanklik van skenkings en het sedert sy stigting in 2013 op Outjo na verskeie dorpe in die land uitgebrei.

Gesamentlik is daar al oor die 5 000 diere sedert die organisasie se stigting tot Junie vanjaar geopereer.

Veeartsenyklinieke van oral in die land en Namibië se enigste mobiele dierekliniek staan saam met Have-a-Heart in die stryd teen ongewenste honde en katte.

Soortgelyk

 

Kraam buite kliniek - verpleegsters geskors

14 ure gelede | Ministeries

Henriette Lamprecht – Twee verpleegsters wat ‘n hoogswanger vrou by die Okuryangava-kliniek glo weggewys het, is in opdrag van die minister van gesondheid en maatskaplike...

Lewenslank vir Suide-verkragters

14 ure gelede | Howe

Elvira Hattingh en Ronelle Rademeyer - Twee mans wat vroue op Mariental en Tses verkrag en vermoor het, is gister in twee afsonderlike sake vonnisse...

Schlettwein sê oor TIPEEG, FOCAC

14 ure gelede | Regering

Denver Kisting – In die eerste plek is Namibië se ekonomie besig om aan te pas by ’n nuwe pad van groei nadat dit een...

Weer vir 19 September

14 ure gelede | Weer

BINNELAND: Gedeeltelik bewolk en warm in die Suide met enkele buie in die verre Suide. Elders sal baie tot bloedig warm in die Noorde wees.KUS:...

TransNamib op soek na nuwe direksie

14 ure gelede | Vervoer

Catherine Sasman Die ministerie van werke en vervoer het in 'n openbare kennisgewing aangekondig dat nuwe direksielede vir TransNamib gesoek word. Die huidige direksie se...

Esau: Visvangkwotas kan nie verkoop word

14 ure gelede | Ministeries

Leandrea Louw Die minister van visserye en mariene hulpbronne, mnr. Bernard Esau, het gewaarsku visvangkwotas kan nie verkoop word “om vinnig geld te maak nie”....

Help soek na vermistes

14 ure gelede | Misdaad

Tanja BauseDie Namibiese polisie vra die publiek se hulp in die opsporing van twee vermiste mense. Die 14-jarige Niita Fillemon word sedert 19:00 verlede Woensdag...

Grond: Wit boere wíl praat

14 ure gelede | Ministeries

Elvira HattinghDie president van die Namibië Landbou-unie (NLU), mnr. Ryno van der Merwe, sê dit is onwaar dat wit kommersiële boere nie in gesprek tree...

Vrou haal die byt uit veghond

14 ure gelede | Omgewing

Die naam Amerikaanse veghond (pit bull terrier) het al ‘n vloekwoord geword en boesem vrees by die meeste mense in. Geen ander honderas het in...