Hofdrama kring al hoe wyer uit
Aanklaers by die landdroshof in Windhoek weier om voor landdros Gerrit van Pletzen te verskyn.
Denver Kisting
'n Landdros verbonde aan die Windhoek-landdroshof is met verlof nadat aanklaers by dié hof weier om voor hom te verskyn.
Dít kom nadat mnr. Gerrit van Pletzen sowat twee gelede een van die aanklaers, mnr. Rowan van Wyk, aan minagting van die hof skuldig bevind het.
Ná sy skuldigbevinding is Van Wyk tot 30 dae gevangenisstraf gevonnis.
Die beheeraanklaer by dié hof, mnr. Hans Thourob, het gistermiddag bevestig die aanklaers versuim om voor Van Pletzen te verskyn. Trouens, sê Thourob, “dit is ék wat agter dit is”.
Volgens hom is die besluit geneem omdat Van Pletzen na bewering aanklaers boelie en in die verleentheid stel. “Hy verneder hulle. Nou wil niemand voor hom verskyn nie.”
Thourob sê hulle is ingelig dat Van Pletzen na die gesinshof by die Windhoek-landdroshof in Katutura oorgeplaas sal word waar hy nie met aanklaers hoef te werk nie, nadat 'n klagskrif aan die aanklaer-generaal se kantoor oorhandig is.
Op sy beurt het Van Pletzen gister gesê hy het verlof geneem nadat die nuus oor die aanklaers se weiering om voor hom te verskyn, rugbaar geword het. “Ek sit nie op die oomblik op die bank vir sake nie, want hulle weier om voor my te verskyn. Toe't ek besluit ek neem verlof.”
Hoewel hy Woensdag weer vir werk moet aanmeld, sê die landdros hy sal waarskynlik langer vakansie neem.
Hy het voorts gesê van die landdroste by die hof in Lüderitzstraat in die hoofstad is besig met 'n grootskaalse ondersoek na die gedrag van die aanklaers daar. “Ons sal 'n verslag saamstel van alle voorvalle waar hulle drooggemaak het en vir ons gelieg het.”
Volgens hom is die aanklaers “besig om 'n gat vir hulleself te grawe. Die bewyse is als op skrif.”
Van Wyk is onlangs deur Van Pletzen op waarskuwing vrygelaat nadat die aanklaer aangedui het hy gaan teen die skuldigbevinding en vonnis appelleer.
Sy appèl is vir 27 Julie vanjaar geskeduleer. Luidens die hofrekords van die verrigtinge op Vrydag 13 April het 'n woordewisseling tussen die twee mans ontstaan oor presies waar 'n bedrogdossier was.
Van Wyk het glo gesê die aanklaer-generaal se beslissing in die bedrogsaak is steeds nie beskikbaar nie nadat die saak reeds vantevore om daardie rede uitgestel is.
Van Pletzen het glo toe gesê Van Wyk sinspeel daarop dat die dossier nog by die aanklaer-generaal se kantoor lê.
Van Wyk het dít ontken waarna Van Pletzen volgens die hofrekords gesê het: “Meneer, deur te sê die beslissing is nie beskikbaar nie, impliseer direk die dossier ís by die aanklaer-generaal se kantoor en dat die vertraging daar lê. Ek wil niks verder hoor nie.”
Tóé bars die bom met Van Wyk wat gesê het Van Pletzen beledig hom.
Die landdros het toe vir Van Wyk beveel om niks verder te sê nie.
“Ek sal nie stilbly nie,” het Van Wyk glo voorts gereageer, en aangehou praat.
Hy voer aan Van Pletzen het vir hom gesê om sy mond te hou (“shut up”) en dít het hom sodanig gegrief dat hy die landdros glo ingelig het sy gedrag is disrespekvol en onprofessioneel.
Van Pletzen sê Van Wyk lieg dat hy beveel is om sy mond te hou. “Ek het nooit vir hom gesê 'shut up' nie. Hy is 'n leuenaar.”
Hy is keelvol daarvoor dat aanklaers die hof belieg wanneer hulle vra dat 'n saak opnuut uitgestel word, sê die landdros. “Ek is onpopulêr omdat ek die enigste een is wat sê ek aanvaar dit nie.”
'n Landdros verbonde aan die Windhoek-landdroshof is met verlof nadat aanklaers by dié hof weier om voor hom te verskyn.
Dít kom nadat mnr. Gerrit van Pletzen sowat twee gelede een van die aanklaers, mnr. Rowan van Wyk, aan minagting van die hof skuldig bevind het.
Ná sy skuldigbevinding is Van Wyk tot 30 dae gevangenisstraf gevonnis.
Die beheeraanklaer by dié hof, mnr. Hans Thourob, het gistermiddag bevestig die aanklaers versuim om voor Van Pletzen te verskyn. Trouens, sê Thourob, “dit is ék wat agter dit is”.
Volgens hom is die besluit geneem omdat Van Pletzen na bewering aanklaers boelie en in die verleentheid stel. “Hy verneder hulle. Nou wil niemand voor hom verskyn nie.”
Thourob sê hulle is ingelig dat Van Pletzen na die gesinshof by die Windhoek-landdroshof in Katutura oorgeplaas sal word waar hy nie met aanklaers hoef te werk nie, nadat 'n klagskrif aan die aanklaer-generaal se kantoor oorhandig is.
Op sy beurt het Van Pletzen gister gesê hy het verlof geneem nadat die nuus oor die aanklaers se weiering om voor hom te verskyn, rugbaar geword het. “Ek sit nie op die oomblik op die bank vir sake nie, want hulle weier om voor my te verskyn. Toe't ek besluit ek neem verlof.”
Hoewel hy Woensdag weer vir werk moet aanmeld, sê die landdros hy sal waarskynlik langer vakansie neem.
Hy het voorts gesê van die landdroste by die hof in Lüderitzstraat in die hoofstad is besig met 'n grootskaalse ondersoek na die gedrag van die aanklaers daar. “Ons sal 'n verslag saamstel van alle voorvalle waar hulle drooggemaak het en vir ons gelieg het.”
Volgens hom is die aanklaers “besig om 'n gat vir hulleself te grawe. Die bewyse is als op skrif.”
Van Wyk is onlangs deur Van Pletzen op waarskuwing vrygelaat nadat die aanklaer aangedui het hy gaan teen die skuldigbevinding en vonnis appelleer.
Sy appèl is vir 27 Julie vanjaar geskeduleer. Luidens die hofrekords van die verrigtinge op Vrydag 13 April het 'n woordewisseling tussen die twee mans ontstaan oor presies waar 'n bedrogdossier was.
Van Wyk het glo gesê die aanklaer-generaal se beslissing in die bedrogsaak is steeds nie beskikbaar nie nadat die saak reeds vantevore om daardie rede uitgestel is.
Van Pletzen het glo toe gesê Van Wyk sinspeel daarop dat die dossier nog by die aanklaer-generaal se kantoor lê.
Van Wyk het dít ontken waarna Van Pletzen volgens die hofrekords gesê het: “Meneer, deur te sê die beslissing is nie beskikbaar nie, impliseer direk die dossier ís by die aanklaer-generaal se kantoor en dat die vertraging daar lê. Ek wil niks verder hoor nie.”
Tóé bars die bom met Van Wyk wat gesê het Van Pletzen beledig hom.
Die landdros het toe vir Van Wyk beveel om niks verder te sê nie.
“Ek sal nie stilbly nie,” het Van Wyk glo voorts gereageer, en aangehou praat.
Hy voer aan Van Pletzen het vir hom gesê om sy mond te hou (“shut up”) en dít het hom sodanig gegrief dat hy die landdros glo ingelig het sy gedrag is disrespekvol en onprofessioneel.
Van Pletzen sê Van Wyk lieg dat hy beveel is om sy mond te hou. “Ek het nooit vir hom gesê 'shut up' nie. Hy is 'n leuenaar.”
Hy is keelvol daarvoor dat aanklaers die hof belieg wanneer hulle vra dat 'n saak opnuut uitgestel word, sê die landdros. “Ek is onpopulêr omdat ek die enigste een is wat sê ek aanvaar dit nie.”
Kommentaar
Republikein
Geen kommentaar is op hierdie artikel gelaat nie