Hoekom 'n goeie fotograaf sy botter werd is

Baie paartjies vergeet hoe belangrik ’n goeie fotograaf vir hul troue is. Dié persoon speel immers ’n noemenswaardige rol in wat waarskynlik een van die belangrikste dae van jul lewens is.

Met dit in ag genome, sal julle ekstra sorg moet neem wanneer julle ’n fotograaf begin soek. Deur die volgende riglyne te volg, kan julle julself dalk net te red van 'n onverwagte teleurstelling later.

Begin vroegtydig soek

Indien moontlik, begin reeds met julle verlowing soek. Besoek verskillende fotograwe en gaan hulle portefeuljes noukeurig na. Maak seker julle sien voorbeelde van hul werk by troues.

Styl

Elke fotograaf het ’n persoonlike styl. Besluit op een waarmee julle gemaklik voel. ’n Goeie fotograaf moet die luim, emosie en sentiment van die dag kan vasvang. Hou aan soek totdat jy een kry wat deur sy of haar werk met jou "praat". Julle foto's behoort soos dit in ’n glanstydskrif te lyk. Dit moenie styf of onnatuurlik voel nie.

Ondervinding

Vind uit hoe lank die fotograaf reeds troues afneem en hoeveel troues hy/sy op sy kerfstok het. Onthou egter dat ’n gebrek aan ervaring nie die enigste faktor moet wees wat jou keuse beïnvloed nie. As jy op 'n streng begroting is, sal 'n minder ervare fotograaf jou minder kos. In die algemeen is jou foto's nie iets waaraan jy moet afskeep nie.

Geldsake

Sodra jy op ’n fotograaf besluit het, moet jy gewoonlik ’n deposito betaal en ’n kontrak teken. Moet nooit op ’n mondelingse ooreenkoms staatmaak nie, en moenie vir die fotograaf vra "om die datum oop te hou" nie.

Hoewel jy ’n deposito sal moet betaal, moet nooit die volle bedrag vooruit betaal nie. Die uitstaande bedrag word eers ná die troue betaal en wanneer jy jou foto's gesien en proewe ontvang het.

Die pryse wat fotograwe vra, verskil groot. Kies iemand wat binne jou begroting val maar wie se gehalte en styl in jou smaak val.

Sit dit op skrif

Wanneer julle ’n fotograaf bespreek, maak melding van besonderhede soos kostes, belasting, ekstra uitgawes en wat die fotograaf moet voorsien (die aantal ure, hoeveelheid proewe en foto's, asook die grote van foto’s, ens.) Die ooreenkoms moet ook aandui wanneer uitstaande bedrae betaal moet word. Wees duidelik oor die troudatum, die venue en wanneer die fotograaf daar moet wees.

Behoeftes

Bespreek watter soort foto's jy soek, soos byvoorbeeld ’n nabyskoot van die troukoek, van julle saam met sekere gaste, ens. Laat hy verskeie foto's van spesiale oomblikke afneem.

Die groot dag

Laat soveel foto's moontlik neem voor die seremonie, voor die blomme begin verwelk en die uitrustings begin kreukel.

Later

Die tyd wat dit neem om jou foto's te kry, kan wissel. Sommige fotograwe sal binne ’n paar dae reeds proewe kan voorsien, terwyl ander ’n klompie weke kan neem. Maak seker jy weet wat om te verwag wanneer jy die fotograaf uitsoek.