Hepatitis E-gevalle neem steeds toe

22 May 2020 | Gesondheid
Jana-Mari Smith

Hoewel geen nuwe Covid-19 gevalle vir meer as 30 dae in Namibië aangemeld is nie, is die voorkoms van hepatitis E steeds besig om skerp toe te neem.

Ongeveer 600 nuwe gevalle is sedert Januarie aangemeld. Die getal het van 7 000 gevalle begin-Januarie tot 7 642 gevalle teen 19 April gestyg.

Hierdie gegewens is afkomstig uit die nuutste verslag rakende die uitgerekte uitbreking wat sedert einde 2017 in die land ondervind word.

Die armste landsburgers wat in informele nedersettings woon en dikwels nie toegang tot basiese fasiliteite soos water en spoeltoilette het nie, is die mees kwesbare slagoffers van die landswye uitbreking.

Die getal hepatitis E-verwante sterftes wat sedert die uitbreking aangemeld is, staan sedert Maart vanjaar op 65. Ses mense is sedert Januarie aan die siekte dood. Van die 65 sterftes was 26 ma's of swanger vroue.

Die infeksiesyfer in die Khomasstreek het sedert Januarie vanjaar met 307 gevalle toegeneem, van 4 422 tot 4 729.

In die Erongostreek, wat die tweede hardste getref is, het die infeksiesyfer van 1 563 in Januarie vanjaar tot 1 631 gevalle teen 19 April toegeneem.

Volgens die nuutste verslag is 55 hepatitis E-gevalle landswyd tussen 6 en 19 April aangemeld. In die voorafgaande twee weke (23 Maart tot 5 April) is 79 gevalle aangemeld.

Uit die totale aantal infeksies was die meerderheid (59%) onder mans en 72% van die geïnfekteerdes was tussen 20 en 39 jaar oud.

BLY PRO-AKTIEF

Die landswye reaksie om Covid-19 hok te slaan, het 'n positiewe impak gehad op die pogings om hepatitis E te bekamp.

Private instansies en regeringsinisiatiewe het toegang tot veilige waterbronne 'n aansienlike hupstoot gegee. Toegang tot handwasgeriewe en sanitasie-fasiliteite in informele nedersettings het sedert Maart vanjaar toegeneem.

Dr. Bernard Haufiku, gewese minister van gesondheid en maatskaplike dienste, sê die nasionale optrede om Covid-19 te bekamp, het 'n positiewe invloed op die pogings teen hepatitis E gehad.

Hy het daarop klem gelê dat die stryd teen die coronavirus nog lank nie verby is nie, terwyl pogings om hepatitis E in Namibië uit te wis, proaktief benader moet word.

Die nasionale reaksie teen Covid-19 werk wel in die guns van die stryd teen hepatitis E, maar dit beteken nie laasgenoemde sal makliker word sodra die gevaar van Covid-19 verby is nie, het Haufiku gewaarsku.

Hy het beklemtoon dat die spoedige reaksie van private en regeringsinstansies as 'n positiewe aanduider dien van wat moontlik is wanneer dié twee sektore hande vat.

SANITASIE EN HIGIëNE

In 'n verslag oor die landswye uitbreking wat die sentrum vir siektebeheer en voorkoming (CDC) in April uitgereik het, word aangedui dat volgens die regering se skattings ongeveer 40% van huishoudings in stedelike areas geleë is in informele nedersettings “met minimale infrastruktuur, beperkte toegang tot ablusiegeriewe en lopende water, asook swak higiëne”.

Die CDC-verslag lê klem daarop dat “verbeterde handwaspatrone en sanitasiegebruike, asook toegang tot veilige waterbronne nodig is om die oordrag van hepatitis E te onderbreek, veral aangesien die sterfterisiko soveel hoër vir swanger vroue is.”

Gemeenskapsgedrewe sanitasieprogramme (CLTS) is geïmplementeer as een van die kernaspekte in die poging om die hepatitis E-epidemie in Namibië te bekamp.

Die Development Workshop of Namibia (DWN) het verlede jaar 'n sleutelrol in die stryd teen hepatitis E gespeel.

Met die hulp van vennote en donateurs het hulle saam met gemeen­skappe gewerk om ablusiegeriewe op te rig en CLTS-programme te implementeer in Windhoek se informele nedersettings.

Met die aanvang van die coronavirus in Namibië het die DWN, met behulp van vennote en skenkers, 'n Covid-19 noodplan van stapel gestuur.

Tot op hede het “tippy tap”-spanne in Windhoek 10 000 handwaspunte opgerig – halfpad na hul mikpunt van 20 000.

Nadat die program uitgebrei is, is nog 10 000 “tippy taps” in ander dorpe oor Namibië deur DWN-werkers en 60 vrywilligers opgerig.

Meer as 25 000 gesinne en ongeveer 75 000 individue is van sulke “tippy taps” afhanklik.

- [email protected]

Soortgelyk

 

Covid-19: 5de nuwe geval binne 4 dae

24th of May 10:45 | Gesondheid

‘n Vragmotorbestuurder in Walvisbaai het gister positief vir Covid-19 getoets.Dit is die vyfde positiewe geval sedert Woensdag. Al die persone was in kwarantyn.Persone waarmee die...

‘80% van skole gereed’

2 dae gelede | Onderwys

Henriette Lamprecht – Sowat 80% van die 1 920 staatskole oraloor in die land is gereed om leerlinge volgens verpligte gesondheidsregulasies te ontvang wanneer hulle...

Nog leerlingdokters wag om uitgeplaas te word

2 dae gelede | Gesondheid

Henriette Lamprecht – Meer as 100 leerlingdokters wag glo reeds maande om vir internskappe by staatshospitale oraloor in die land uitgeplaas word. Die 166 leerlingdokters...

Stadspolisie van hardhandigheid beskuldig

2 dae gelede | Misdaad

Denver Kisting – ’n Inwoner van Groot Aub, mnr. Richard Davids, voer aan ’n beampte van die stadspolisie, waarnemende sersant Erwen Katiti, het hom Dinsdaglaatmiddag...

Weer vir 22 Mei 2020

2 dae gelede | Weer

BINNELAND: Gedeeltleik bewolk en warm in die streke van ||Kharas en Hardap. Elders sal dit sonnig en warm tot baie warm wees.KUS: Gedeeltelik bewolk en...

‘Vervoer van drank nie ’n misdaad’

2 dae gelede | Misdaad

Francoise SteynbergDie blote vervoer van drank is nie ’n misdaad nie en kan nie as redelike gronde gebruik word vir agterdog van die koop of...

Vroue in kwarantyn toets positief vir Covid-19

2 dae gelede | Gesondheid

Henriette Lamprecht – Twee vroue het in kwarantyn positief vir Covid-19 getoets. Dit bring Namibië se totaal bevestigde Covid-19-gevalle op 18 te staan. Volgens die...

Ebikes: vinnig, goedkoop en groen

2 dae gelede | Mense

Tanja Bause Nie te veel besighede kan sê dat hulle in die Covid-19-tyd so goed aangepas het dat hulle nuwe werknemers moes aanstel nie. Ebikes4Africa...

Market Watch Covid page - snippets

2 dae gelede | Gesondheid

The Namibia Football Association (NFA) executive committee has yet to decide what to do with funds it expects to receive from the Federation of International...