Hellwig leef nog, beduie met sy hand

17 February 2021 | Howe
Ronelle Rademeyer en Ellanie Smit – Die matrone van die koshuis by die Namibië Instituut vir Mynbou en Tegnologie (NIMT) se kampus op Arandis, me. Gertrud Naobes, het gister getuig mnr. Heimo Hellwig (60) het nog geleef toe sy by die moordtoneel aankom.
Sy het voor regter Christie Liebenberg in die hoërhof in Windhoek getuig sy het die oggend van 15 April 2019 die uitvoerende direkteur, mnr. Eckhart Mueller (72) en vir Hellwig, sy adjunk, in ’n plas bloed voor die deur van die administrasiegebou op die kampus aangetref. Daar was verskeie patroondoppies op die toneel en sy kon sien die glas van die voordeur is stukkend.
Hellwig het nog geleef en het met die wysvinger van sy regterhand beduie. “Sy mond het beweeg. Hy wou praat, maar die woorde het nie uitgekom nie,” het Naobes getuig.
Sy was in ’n stadium so emosioneel dat staatsadvokaat Antonia Verhoef die hof versoek het om vir ’n tydjie te verdaag.
Naobes, wat vir 25 jaar onder Mueller gewerk het, was gister die derde getuie in die staat se saak teen mnr. Ernst Lichtenstrasser (59), ’n voormalige dosent in pas- en draaiwerk by NIMT se kampus op Tsumeb.
Lichtenstrasser het Maandag skuld ontken op die twee klagte van moord teen hom, asook ses ander klagte wat die onwettige besit van ’n vuurwapen en ammunisie, asook regsverydeling insluit.
Naobes het getuig Mueller en Hellwig het soggens saam uit Swakopmund werk toe gery en om 06:30 by die kampus aangekom.
Sy kon hul voertuig sien stilhou van waar sy daardie tyd soggens voorbereidings getref het om vir die studente in die eetsaal ontbyt te bedien.
Sy het getuig sy het die oggend om halfsewe ’n harde geluid gehoor wat geklink het soos dinamiet wat ontplof.
Die volgende oomblik het die sekuriteitswag, ene Festus, aangehardloop gekom en wou weet of sy ook die geraas gehoor het.
Hy is toe weg om te gaan ondersoek instel. Kort daarna was hy terug en het geskok geroep: “Matrone, matrone, bel die polisie!”
Naobes het aan die hof vertel sy het die polisie op Arandis gebel, waar ’n vroulike polisiebeampte haar meegedeel het daar is nie ’n voertuig by die polisiekantoor waarmee hulle na die moordtoneel kan kom nie.
Sy het voorts getuig toe sy saam met die sekuriteitswag na die moordtoneel terugkeer, het sy Mueller en Hellwig in ’n plas bloed op die grond sien lê.
Die hof het gehoor Naobes het ook ’n polisiebeampte wat sy op Walvisbaai ken, gebel en van die moorde ingelig.
Sy het getuig die plaaslike polisie het eers 30 minute nadat sy hulle gebel het, by die toneel opgedaag.
’n Vorige getuie, mnr. Peter van Eeden, het die hof vertel Lichtenstrasser het sy plaas tussen Otavi en Tsumeb verskeie kere sedert 2016 besoek om op sy skietbaan skyfskiet te oefen.
Volgens Van Eeden het Lichtenstrasser aan hom genoem die afdeling waar hy op Tsumeb klasgegee het, gaan toemaak en hy sal na Keetmanshoop verplaas word.
Lichtenstrasser het gevoel dit is onregverdig en hy het die bestuur hiervoor geblameer.
Volgens hom was Lichtenstrasser en sy seun twee dae voor die dubbele moord op sy plaas waar hy met ’n boog skyfgeskiet het.
Die verhoor duur voort. Adjunkaanklaer- generaal Antonia Verhoef het aangedui die staat gaan 53 getuies roep.
[email protected]

FOTO
Mnr. Ernst Lichtenstrasser (59) gister in die beskuldigdebank in die hoërhof in gesprek met sy regsverteenwoordiger, mnr. Albert Titus

Soortgelyk

 

Vrou woon in haar motor by hospitaal

7 ure gelede | Mense

Henriette Lamprecht – 'n Bejaarde vrou van die kus woon die afgelope week in haar motor in die parkeerterrein van 'n staatshospitaal in Windhoek om...

Toekoms van 77 Air Nam-vlieëniers onseker

7 ure gelede | Vervoer

Francoise Steynberg – Altesaam 77 vlieëniers van Air Namibia se toekoms is onseker. Boonop het bykans 75% van die redery se vlieëniers se lisensies verval...

Ses damme voller as 100%

7 ure gelede | Weer

Elvira Hattingh – Terwyl altesaam sowat ses Namibiese damme tans 100% of meer water bevat, oorstroom die Zambezirivier sy walle, met water wat in die...

Weer vir 24 Februarie

7 ure gelede | Weer

WEERWAAK: Wydverspreide donderbuie word in Ohangwena, Oshikoto, Otjozondjupa en Omaheke verwag. BINNELAND: Sonnig en warm in die Suide en Weste, andersins gedeeltelik bewolk en baie...

'Swak bestuur rede vir Meatco se krisis'

7 ure gelede | Byvoegsels

Ellanie Smit - Volgens ’n verslag wat aan die ministerie van staatsondernemings (SOE's) voorgelê is, staar Meatco likwidasie in die gesig indien hy nie kostes...

Hof kry Heritage Health voor stok

7 ure gelede | Gesondheid

Henriette Lamprecht – Die mediese fonds Heritage Health het 'n bloutjie in die hoërhof geloop nadat hy sy jaarlikse premies wou verhoog, maar dié stap...

'IEB in nuwe formaat is hier om te bly'

7 ure gelede | Onderwys

Henriette Lamprecht – Die nuwe leerplan vir skole in Namibië wat die Onafhanklike Eksamenraad (IEB)-stelsel volg, is vergelykbaar met die Namibiese Senior Sekondêre Sertifikaat (SSS)...

#Indigiwalk Namibia in die pyplyn

7 ure gelede |

Augetto Graig – Die pad na 'n beter wêreld is eensaam en lank en mnr. Craig (Q7) Beckett, 'n Suid-Afrikaanse Khoisan-jagter, geneser en menseregte-aktivis, sal...

‘Geen personeel betrokke by stropery’

7 ure gelede | Ministeries

Francoise Steynberg Die ministerie van die omgewing, bosbou en toerisme het bevestig dat geen van sy personeel by wildstropery betrokke was nie en stropery het...