Helfte van Namibiërs sonder toilette

Slegs 15% van landelike gebiede het toegang tot sanitasiegeriewe

11 December 2018 | Plaaslik
Henriette Lamprecht - ‘n Beraamde 1,2 miljoen Namibiërs (sowat 50%) ontlas in die oopte.

In landelike gebiede styg dit tot 76%, maar die persentasie wissel tussen die verskillende streke van 35% in die Hardap- tot 80% in die Ohangwenastreek.

In stedelike gebiede staan ontlasting in die oopte op 20%, en dít meestal in informele nedersettings.

Volgens die minister van landbou, bosbou en water is daar ook duidelike ongelykhede met betrekking tot toegang tot sanitasiegeriewe in landelike en stedelike gebiede.

Slegs 15% van landelike huishoudings het volgens me. Anna N. Shiweda toegang tot verbeterde sanitasiegeriewe, in vergelyking met die 55% in stedelike gebiede.

Shiweda was aan die woord tydens die bekendmaking van die Eenyma- en Okakango Konduda-nedersetting, in die Eenhana-kiesafdeling in die Ohangwenastreek, wat amptelik die status van ‘n oop ontlastingvrye gebied (ODF) verwerf het.

Dié status is behaal danksy die toepassing van die gemeenskapsgebaseerde totale sanitasie-benadering (CLTS) wat fokus op die verandering van gedrag, en wat ook die uitgangspunt van die Nasionale Strategie vir Sanitasie van 2008 is.

Dié benadering is vir die eerste keer in 2014 deur die stigter van CLTS, dr. Kamal Kal van Bangladesh, in Namibië bekend gestel.

Die doel van CLTS is om gedrag ten opsigte van higiëne te verander sodat ontslae geraak kan word van oop ontlasting en sodat sanitasiegeriewe in gemeenskappe kan verbeter.

Volgens die minister is die negatiewe impak van swak higiëne en sanitasiepraktyke op kinders goed bekend en lei dit jaarliks wêreldwyd tot ten minste 1,5 miljoen kinders onder die ouderdom van vyf se dood.

“In Namibië word sowat die helfte van die sterftes en siektes van kinders onder die ouderdom van vyf jaar toegeskryf aan voorkombare en behandelbare siektes, wat hoofsaaklik deur swak higiëne en sanitasiepraktyke veroorsaak word,” het Shiweda gesê.

Dié siektes sluit diarree, wurms en lugweginfeksies soos longontsteking in. Daarmee saam is 24% van kinders onder die ouderdom van vyf jaar se groei vertraag, en dít kan aan swak water-, sanitasie- en higiënetoestande (WASH) toegeskryf word.

Shiweda het voorts na die huidige uitbreking van hepatitis E in die land verwys, wat tot dusver die lewens van 33 mense geëis het, terwyl byna 4 000 gevalle landswyd aangeteken is.

“Hepatitis E word deur kontak met ontlasting oorgedra, wat wys hoe belangrik die veilige verwydering van menslike afval is. Hande moet ook te alle tye met lopende water en seep gewas word vóór en ná maaltye voorberei is, ná jy die toilet besoek het en ná ‘n baba se doek omgeruil is.”

Volgens Shiweda geniet toegang tot drinkbare water en sanitasiedienste nasionale voorkeur, en is dit in verskeie sleutelbeleidsrigtings, ontwikkelingsplanne en strategieë vervat.

Al 33 huishoudings in die Eenyama-nedersetting, wat 270 mense huisves, sowel as die 268 inwoners van die Okakango Konduda-nedersetting, het volgens die minister nou ODF-status.

“Wat deel van al ons pogings moet wees en veral in Namibië, is dat mense se ingesteldheid moet verander, en nie net dat sanitasiegeriewe voorsien word nie.”

Shiweda het ‘n studie aangehaal wat ‘n gaping tussen kennis en die toepassing van higiënepraktyke in Namibië uitwys.

“Dit wys ons pas nie die kennis wat nodig is in praktyk toe nie. Ons veldtogte moet alle vlakke van die samelewing teiken en veral op skoolgaande kinders as agente van verandering fokus.”

Soortgelyk

 

SDFN houses at Kalkfeld nearing completion

5 ure gelede | Infrastruktuur

KALKFELD – The construction of 18 houses by the Shack Dwellers Federation of Namibia (SDFN) is nearing completion at the Kalkfeld settlement in the Otjozondjupa...

Manlike pasiënt 'twee keer' besny

5 ure gelede | Ministeries

Henriette Lamprecht Die ministerie van finansies het 'n forensiese ondersoek na die eispatrone van verskaffers van gesondheidsdienste van stapel gestuur om moontlike bedrog by die...

Kaptein wou terugdraai voor 157 sterf

5 ure gelede | Ongelukke

Ronelle Rademeyer Die kaptein van Ethiopian Airlines se vlug ET302 het toestemming gehad om die vliegtuig terug te draai na die Internasionale Lughawe Bole by...

Só vaar die Verkrygingsraad

5 ure gelede | Ministeries

Augetto Graig Struikelblokke kan in geleenthede omskep word. Só sê me. Lischen Ramakhutla, die Sentrale Verkrygingsraad van Namibië (CPBN) se administratiewe hoof.Sy en mnr. Patrick...

Weer vir 11 Maart 2019

5 ure gelede | Weer

BINNELAND: Gedeeltelik bewolk en warm tot baie warm in die Noorde, Noordooste, Ooste en sentrale hoogland met geïsoleerde donderbuie op plekke. Elders sal dit...

Ou beursbeleid finansier 'enige' student

5 ure gelede | Onderwys

Henriette Lamprecht - “As jy van die begin af nie gehad het wat nodig is nie, gaan jy dit ook nie aan die einde...

Stem nou vir jou gunstelingpaartjie!

5 ure gelede | Gebeure

D'Arlin en Leigh-Ann Benade is een van die top-30-paartjies in Republikein se Bruidspaar van die Jaar-kompetisie. Een gelukkige leser, wat aan ons SMS-kompetisie deelneem, kan...

Aanleg les binnekort weer dors

5 ure gelede | Regering

Elvira Hattingh - Windhoek se WinGoc-aanleg (Windhoek Goreangab Operating Company) sal na verwagting binne dae weer drinkwater aan Windhoekers kan verskaf. Terselfdertyd beplan die munisipaliteit...

Wetsontwerp terug parlement toe

5 ure gelede | Ministeries

Ogone Tlhage – Die wet op staatsondernemings sal na verwagting eersdaags weer in die Nasionale Vergadering (NV) vir finale insette voorgelê word, mnr. Leon Jooste,...