'Heksejag' teen Kahimise
Die Windhoekse munisipaliteit staar opnuut 'n politieke krisis in die gesig.
Denver Kisting
Die uitvoerende hoof van die Windhoekse stadsraad, mnr. Robert Kahimise, is ongewild omdat hy mense keer om hulle verder aan tenders dik te vreet.
“Mnr. Kahimise is 'n godvresende man, 'n wedergebore Christen, gee nie voor nie en 'n ware seun van die lewende God,” lui 'n brief aan die minister van stedelike en landelike beplanning, dr. Peya Mushelenga, oor die beweerde teistering waaronder Kahimise gebuk gaan.
“Hy het hulle van tenders ontneem. Hulle eet nie meer soos vantevore nie,” lui die skrywe voorts.
Mushelenga het gister gesê albei partye móét gehoor word voor hy kan reageer op die jongste relletjie by Windhoek se munisipaliteit (CoW).
Die minister het by navraag aan Republikein gesê: “Mense teen wie bewerings gemaak word, moet 'n geleentheid kry om hul kant te stel. Dít is wat natuurlike geregtigheid vereis.”
Die tafel is sedert verlede Woensdag opnuut vir drama gedek nadat dit aan die lig gekom het sommige raadslede beplan glo om van die uitvoerende hoof, mnr. Robert Kahimise, ontslae te raak.
Mushelenga het bevestig hy het 'n sterk bewoorde brief ontvang waarin drie CoW-raadslede allerlei bewerings maak oor hoe Kahimise deur bestuurslede gekasty word.
Al drie dié raadslede behoort aan opposisiepartye.
In dié brief, wat agt bladsye beslaan, sê die drie mense hulle is keelvol dat ál die skuld vir CoW se probleme voor Kahimise se deur gegooi word.
Dít terwyl Kahimise die gemors waarin CoW gedompel is, by sy voorgangers geërf het.
As Mushelenga nie die bestuurslede vasvat nie, sal hulle geen ander keuse hê as om 'n mosie van wantroue teen hul kollegas in te stel nie, sê die gegriefde lede.
Om seker te maak dié plan verloop sonder intimidasie, stel die drietal voor dit geskied deur geheime stembriewe.
'Bedenklike toestand'
Volgens hulle het Kahimise met sy aanstelling sowat 'n jaar gelede CoW in 'n bedenklike toestand aangetref.
Hulle beweer voorts hy het in sy kort ampstermyn reeds daarin geslaag om van die chaos om te keer.
Die drie raadslede, wat verlede week aan Mushelenga geskryf het, is die Popular Democratic Movement (PDM) se mnr. Ignatius Semba, mnr. Josef Kauandenge van die National Unity Democratic Organisation (Nudo) en me. Brunhilde Cornelius van die Rally for Democracy and Progress (RDP).
Afgesien van ander negatiewe gevolge belemmer die huidige toedrag van sake dienslewering by die vlagskipmunisipaliteit, maan dié drie raadslede.
Hulle sê persoonlike verskille gaan nie dié munisipaliteit help om uit die as op te staan nie. “CoW is die hoofstad van Namibië; ons uitdagings is onoorkombaar en dit verg moeite van al 15 raadslede en hul wysheid en energie om dit te pak.”
Hulle is ook van mening dat raadslede opgelei moet word in die skeiding van pligte sodat hulle hul rolle kan verstaan.
“Raadslede as beleidmakers kan nie en moenie by administratiewe sake inmeng nie,” lui die brief op 'n CoW-briefhoof.
Hulle vermoed die beweerde heksejag is die gevolg van stamgebondenheid, voer hulle ook aan.
Kahimise het gister gesê hy dra kennis van die brief.
Omdat die brief aan die minister gerig is, moet Mushelenga die weg vorentoe bepaal, sê Kahimise.
“Dit is nogal 'n lang brief; daar word kwessies geopper en ek dink daardie kwessies moet aangespreek word.”
Politici moet die kwessie besleg, sê Kahimise. “Ek is geen politikus nie,” het hy benadruk.
Oor van die aantygings in die brief dat bestuurslede hom boelie, sê Kahimise: “Daar is waarheid in van die kwessies wat geopper is, veral (sedert) onlangs.”
Teen gister het hy nog geen brief oor sy beweerde skorsing ontvang nie, sê hy. “Ek is in die tuig.”
'n Ander doring in die vlees van die ontstoke raadslede is die skorsing van die hoof van die stadspolisie, mnr. Abraham Kanime, vroeër vanjaar.
Die drietal sê hoewel dit 'n gesamentlike raadsbesluit was om Kanime met vergoeding in die pad te steek, kry Kahimise al die skuld daarvoor.
Kanime het gister gesê hy sal sy skorsing oor beweerde ongerymdhede met 'n regsrekening tot die bitter einde beveg.
“Ek is onskuldig. Ek sal dit tot aan die einde aanvoer. Ek wag net dat hulle met hul drama klaarmaak. Op die oomblik is dit (die weg vorentoe) in my prokureur se hande.”
Sy prokureur, mnr. Sisa Namandje, het gesê daar is nog geen nuwe verwikkelinge in sy kliënt se saak nie.
Die uitvoerende hoof van die Windhoekse stadsraad, mnr. Robert Kahimise, is ongewild omdat hy mense keer om hulle verder aan tenders dik te vreet.
“Mnr. Kahimise is 'n godvresende man, 'n wedergebore Christen, gee nie voor nie en 'n ware seun van die lewende God,” lui 'n brief aan die minister van stedelike en landelike beplanning, dr. Peya Mushelenga, oor die beweerde teistering waaronder Kahimise gebuk gaan.
“Hy het hulle van tenders ontneem. Hulle eet nie meer soos vantevore nie,” lui die skrywe voorts.
Mushelenga het gister gesê albei partye móét gehoor word voor hy kan reageer op die jongste relletjie by Windhoek se munisipaliteit (CoW).
Die minister het by navraag aan Republikein gesê: “Mense teen wie bewerings gemaak word, moet 'n geleentheid kry om hul kant te stel. Dít is wat natuurlike geregtigheid vereis.”
Die tafel is sedert verlede Woensdag opnuut vir drama gedek nadat dit aan die lig gekom het sommige raadslede beplan glo om van die uitvoerende hoof, mnr. Robert Kahimise, ontslae te raak.
Mushelenga het bevestig hy het 'n sterk bewoorde brief ontvang waarin drie CoW-raadslede allerlei bewerings maak oor hoe Kahimise deur bestuurslede gekasty word.
Al drie dié raadslede behoort aan opposisiepartye.
In dié brief, wat agt bladsye beslaan, sê die drie mense hulle is keelvol dat ál die skuld vir CoW se probleme voor Kahimise se deur gegooi word.
Dít terwyl Kahimise die gemors waarin CoW gedompel is, by sy voorgangers geërf het.
As Mushelenga nie die bestuurslede vasvat nie, sal hulle geen ander keuse hê as om 'n mosie van wantroue teen hul kollegas in te stel nie, sê die gegriefde lede.
Om seker te maak dié plan verloop sonder intimidasie, stel die drietal voor dit geskied deur geheime stembriewe.
'Bedenklike toestand'
Volgens hulle het Kahimise met sy aanstelling sowat 'n jaar gelede CoW in 'n bedenklike toestand aangetref.
Hulle beweer voorts hy het in sy kort ampstermyn reeds daarin geslaag om van die chaos om te keer.
Die drie raadslede, wat verlede week aan Mushelenga geskryf het, is die Popular Democratic Movement (PDM) se mnr. Ignatius Semba, mnr. Josef Kauandenge van die National Unity Democratic Organisation (Nudo) en me. Brunhilde Cornelius van die Rally for Democracy and Progress (RDP).
Afgesien van ander negatiewe gevolge belemmer die huidige toedrag van sake dienslewering by die vlagskipmunisipaliteit, maan dié drie raadslede.
Hulle sê persoonlike verskille gaan nie dié munisipaliteit help om uit die as op te staan nie. “CoW is die hoofstad van Namibië; ons uitdagings is onoorkombaar en dit verg moeite van al 15 raadslede en hul wysheid en energie om dit te pak.”
Hulle is ook van mening dat raadslede opgelei moet word in die skeiding van pligte sodat hulle hul rolle kan verstaan.
“Raadslede as beleidmakers kan nie en moenie by administratiewe sake inmeng nie,” lui die brief op 'n CoW-briefhoof.
Hulle vermoed die beweerde heksejag is die gevolg van stamgebondenheid, voer hulle ook aan.
Kahimise het gister gesê hy dra kennis van die brief.
Omdat die brief aan die minister gerig is, moet Mushelenga die weg vorentoe bepaal, sê Kahimise.
“Dit is nogal 'n lang brief; daar word kwessies geopper en ek dink daardie kwessies moet aangespreek word.”
Politici moet die kwessie besleg, sê Kahimise. “Ek is geen politikus nie,” het hy benadruk.
Oor van die aantygings in die brief dat bestuurslede hom boelie, sê Kahimise: “Daar is waarheid in van die kwessies wat geopper is, veral (sedert) onlangs.”
Teen gister het hy nog geen brief oor sy beweerde skorsing ontvang nie, sê hy. “Ek is in die tuig.”
'n Ander doring in die vlees van die ontstoke raadslede is die skorsing van die hoof van die stadspolisie, mnr. Abraham Kanime, vroeër vanjaar.
Die drietal sê hoewel dit 'n gesamentlike raadsbesluit was om Kanime met vergoeding in die pad te steek, kry Kahimise al die skuld daarvoor.
Kanime het gister gesê hy sal sy skorsing oor beweerde ongerymdhede met 'n regsrekening tot die bitter einde beveg.
“Ek is onskuldig. Ek sal dit tot aan die einde aanvoer. Ek wag net dat hulle met hul drama klaarmaak. Op die oomblik is dit (die weg vorentoe) in my prokureur se hande.”
Sy prokureur, mnr. Sisa Namandje, het gesê daar is nog geen nuwe verwikkelinge in sy kliënt se saak nie.
Kommentaar
Republikein
Geen kommentaar is op hierdie artikel gelaat nie