Grünschloss wil Tsumeb Afrika se Dubai maak

Megaprojek van miljarde

13 August 2019 | Sakenuus
Francoise Steynberg – Die bekende suikerkoning en sakeman van die Noorde, mnr. Kallie Grünschloss, sê hy gaan Tsumeb Afrika se Dubai maak.

Hy sê die hoofrede vir die ambisieuse multimiljard- Smart City-ontwikkelingsprojek van Grünschloss Estates en MKP Suid-Afrika is dat hy iets vir Tsumeb, Namibië en Afrika wil doen.

“Ek gaan Tsumeb die Sandton van Namibië en die Dubai van Afrika maak. Ek wil ‘n Tsumeb sien met geen werkloosheid en armoede nie,” het Grünschloss aan Republikein gesê.

Tydens ‘n onderhoud in Maart op Tsumeb het Grünschloss gesê bouwerk aan die oostekant van die dorp sou einde Maart begin het – wat nie gebeur het nie.

Hierna het hy geen oproepe of boodskappe beantwoord oor waarom die projek van sowat N$20 miljard toe nie uit die blokke gekom het nie.

Tsumeb se burgemeester, mnr. Matheus Hangula, het egter nou namens die munisipaliteit uitnodigings na die amptelike afskop van bouwerk aan die Smart City Development-projek aan belanghebbendes gestuur.

Republikein is ook na die geleentheid op 15 Augustus genooi.

“Die raad bly aan die projek toegewy,” het Hangula in die uitnodigingsbrief gesê.

Raadslede was ook teenwoordig by die sooitspitseremonie in Desember verlede jaar.

MEDIES EN TEGNOLOGIE

Grünschloss sê Tsumeb gaan ’n woonplek van voorkeur wees om op te woon, te werk en te studeer.

Hy sê deur sy internasionale logistieke maatskappy het hy baie in Afrika, die Midde-Ooste en Europa gereis en wil hy iets in die mediese veld vir Afrika doen.

“Die twee dinge wat Afrika nodig het, is medies en tegnologie. As jy in Afrika siek word, is jy in die moeilikheid.”

Daarom is Grünschloss se drie hoofdoelwitte vir die mega-ontwikkelingsprojek ‘n mediese universiteit en hospitaal, ‘n internasionale lughawe, hotelle en ‘n kasino, gevolg deur ‘n kommersiële komponent wat die finansiële slagaar sal wees.



“Sowat 25 000 mediese studente uit ses Afrikalande gaan by die mediese universiteit kom studeer.”

Grünschloss sê hy werk sedert Junie 2016 aan hierdie projek en middel 2017 het dinge begin gebeur met beleggers van Maleisië, Katar, Switserland en die Verenigde Koninkryk wat Tsumeb besoek het en hul finansiering verseker het.

“Ek wil ‘n stad bou waar 100 000 mense op 10 000 hektaar bly. Ek wil die beste internasionale mediese professore werf en vir hulle dieselfde salaris en leefstyl as oorsee bied,” het Grünschloss vertel.

“Hierdie professore gaan in 300 villas bly en hul kinders gaan by ‘n internasionale skool skoolgaan.”

Grünschloss kon nie uitgepraat raak oor die ongelooflike kundige argitekspanne van Dubai, Edge en IDP, wat die geboue ontwerp het, wat “in 2040 nog steeds ultramodern gaan lyk” nie.

Hy sê met die ontwerp het hy iets ultramodern, maar steeds eg Namibies in gedagte gehad.

“Die geboue is ultramodern en Namibiese karakter word in die binnenshuise ontwerp weerspieël.”

Volgens Grünschloss is drie dinge noodsaaklik vir ‘n mega-ontwikkeling: “Jou gemeenskap, jou munisipaliteit en jou regering moet jou ondersteun.”

Die rede vir die steun van al drie, sê Grünschloss, is “omdat daar nog nie een sent uit Namibië vir die projek gevat is nie. Al die grond is my grond en al die geld is my beleggers se geld.”

Hy het gesê die drie grootste boumaatskappye in Afrika sal die projek binne twee jaar voltooi met 5 000 werkers op die bouperseel.

In 2121 wil Grünschloss sy droom bewaarheid en sy megastad oopmaak.

[email protected]

Soortgelyk

 

Ster-Kersversierings

12 ure gelede | Kuns en vermaak

Maak dié maklike houtversierings vir jou Kersboom.Wat jy nodig het:gelamineerde-dennehoutplankgoue vinielpatroneaanspuitgomWoodoc Water-Borne FLOORWoodoc COLOURS in Clifton GreyhandwerkmessieskêrfiguursaagG-klampeskuurpapierboor met 8 mm-houtboorpuntlintSo maak jy:Hou die ster-patroon eenkant...

Nuwe voorsitter vir Nasionale Raad verkies

1 dag gelede | Regering

Die Nasionale Raad het vanoggend vir mnr. Bernard Sibalatani van die Zambezistreek as nuwe voorsitter verkies.Me. Victoria Kauma van Kavango-Oos is tot visevoorsitter verkies.Die leierskapsverkiesing...

Nóg ’n rommelklap

1 dag gelede | Ministeries

Jo-Maré Duddy – Nes die voortslepende resessie is Namibië se jongste rommelkrisis die gevolg van die regering wat verkies om na die “meer polities verteerbare”...

Yslander sidder oor Fishrot-skade

1 dag gelede | Misdaad

Ronelle Rademeyer - ’n Bekende viswetenskaplike van Ysland wat met onafhanklikwording deur Swapo na Namibië genooi is om die visbedryf te help ontwikkel, sê hy...

Weer, Maandag 9 Desember 2019

1 dag gelede | Weer

BINNELAND: Gedeeltelik bewolk en warm tot baie warm met geïsoleerde donderbuie in die suidweste en noordooste.KUS: Gedeeltelik bewolk en koel tot warm met reënbuie...

Damme kry eerste invloei

1 dag gelede | Weer

Elvira Hatting - Vrydagoggend het NamWater laat weet die Von Bachdam het water gekry. Teen 09:00 Vrydagoggend het 3,4 m³ water die dam elke sekonde...

STEMFEITE: DIE SUIDE

1 dag gelede | Politiek

Die Landless People's Movement (LPM) het ses kiesafdelings in die Hardap- en //Kharasstreke gewen.

Meer as 125 000 verlaat skool in 2017

1 dag gelede | Ministeries

’n Totaal van 44 245 leerlinge het in 2017 die skool verlaat, terwyl 125 394 hul skooljaar moes herhaal. Die meeste van die leerlinge wat...

Ekonomiese nood vuur selfdood aan

1 dag gelede | Gesondheid

Jana-Mari Smith - Nagenoeg 400 mense het tussen Januarie en September 2019 weens selfdood gesterf en kenners waarsku Namibië se ekonomiese krisis, ’n gebrek aan...