Girovlieënier vlieg ‘sonder lisensie’

Voorlopige ongeluksverslag bekend

12 January 2021 | Ongelukke
Francoise Steynberg



Die vlieënier wat op 17 Desember met sy girokopter en een passasier op die pad na die Internasionale Lughawe Hosea Kutako neergestort het, het nie ’n geldige vlieglisensie gehad nie, omdat sy mediese sertifikaat nie hernu was nie.

Volgens die voorlopige ondersoekverslag van die direktoraat van vliegtuigongelukondersoeke (DAAII) in die ministerie van werke en vervoer, het mnr. Pierre Blaauw (40) nie ’n geldige mediese sertifikaat gehad nie, wat sy vlieglisensie ongeldig maak.

Sy laaste mediese ondersoek op 23 Junie 2020 het volgens die verslag vir Blaauw medies ongeskik verklaar.

Ander bevindinge in die ondersoek, wat steeds voortduur, is dat die girokopter met registrasiemerk V5-ULT se lugvaardigheidsertifikaat volgens burgerlugvaartregulasies tot 23 Junie vanjaar geldig sou wees.

“Die laaste jaarlikse inspeksie wat op die girokopter voor die ongeluk uitgevoer is, was op 6 Augustus 2020,” lui die verslag.

“Die girokopter het ’n verdere twee ure sedert die inspeksie gevlieg.”

Die enjin van die girokopter is op 18 Desember – ’n dag ná die ongeluk – uitmekaar gehaal en volgens die verslag is geen meganiese foute bevind nie.

Blaauw en sy passasier, mnr. Donbaldt Noa (26), het volgens die verslag omstreeks 14:02 by Eros-lughawe in die hoofstad opgestyg vir ’n private vlug oor Heja Lodge en terug na Eros.

“Lugverkeerbeheer by Eros-lughawe het toestemming vir die vlug op ’n hoogte van 7 000 voet gegee,” lui die verslag.

“Lugverkeerbeheer was in kontak met die girokopter, maar het geen noodoproep ontvang” toe dit om 14:12 kraglyne getref, op die lughawepad geval en in vlamme uitgebars het nie.

“Die girokopter het die kraglyn teen 20 tot 30 voet getref wat veel laer as die toegelate hoogte van 7 000 voet is,” lui die verslag.

Volgens die verslag het ’n lid van die publiek wat op die pad gery het, die direktoraat van die ongeluk ingelig.

“Die girokopter was uitgebrand toe brandweerpersoneel 30 minute later op die ongelukstoneel sowat 15 km oos van Widhoek opgedaag het,” lui die verslag.

Noa, die seun van die direkteur-generaal van die Teenkorrupsiekommisie (ACC), mnr. Paulus Noa, het in die ongeluk gesterf. Blaauw is in ’n kritieke toestand met ernstige brandwonde in die Lady Pohamba Private Hospitaal in die hoofstad opgeneem waar hy die volgende oggend gesterf het.

Mnr. Johannes Kambonde, wat by die ongelukstoneel aangekom het, het aan Republikein gesê hy het Blaauw uit die girokopter getrek en tot langs die pad gesleep, waarna die gras vlamgevat het.

Terwyl hy gespook het om die vlamme te blus, het ’n egpaar, mnr. Danie en me. Mella Opperman wat tussen Aranos en Leonardville boer, by Blaauw gesit, vir hom water gegee en gebid. Hy en die familie waardeer hul hulp, “terwyl ander net video’s en foto’s geneem het”.

Die wrak is deur DAAII na ’n veilige plek in Eros vir ’n indiepte-ondersoek vervoer.

Die volledige ondersoek duur voort en die finale ongeluksverslag sal ná deeglike ontleding uitgereik word.

Blaauw se gedenkdiens vind Saterdag om 09:30 op die plaas Freiheit Ost in die Witvlei-omgewing plaas.

[email protected]

Soortgelyk

 

Gesondheidswerkers, leerlinge en onderwysers deel van 343 nuwe gevalle

15 ure gelede | Gesondheid

Sewe Covid-19-verwante sterftes is vandag aangekondig en wel vier in Windhoek, twee in Swakopmund en een in Grootfontein. Die sterftes in Windhoek sluit 'n 63-jarige...

Moller, Hatuikulipi se belange onder vergrootglas

1 dag gelede | Misdaad

Hoofredaksie – Een van die transaksies wat deur die Teenkorrupsie-kommissie (ACC) as deel van die Fishrot-ondersoek gefynkam word, is 'n bedrag van N$8 miljoen wat...

Rekening van N$151 000 bly toe 'jakkals' gly

1 dag gelede | Misdaad

Francoise Steynberg – 'n Vermeende glyjakkals wat vir 'n maand saam met sy gesin in 'n gastehuis op Swakopmund gebly en glo nie betaal het...

Mans vas oor vervalsing van Covid-19-toetsuitslae

1 dag gelede | Misdaad

Kristien KrugerTwee Zimbabwiese mans is Saterdag omstreeks 12:00 op Katima Mulilo in hegtenis geneem vir die besit was vervalste Covid-19 laboratoriumtoetsverslae van PathCare Namibië.Die mans...

Reënweer bring groot skade

1 dag gelede | Weer

Kristien Kruger – Terwyl Namibië die derde week van swaar neerslae binnegaan, is groot skade reeds aan paaie, landerye en ander infrastruktuur aangerig. Windhoekers is...

Weer vir 11 Januarie 2021

1 dag gelede | Weer

BINNELAND: Gedeeltelik bewolk en baie warm in die Noordweste, verre Weste en dele van die //Kharasstreek. Elders sal dit bewolk en warm tot baie...

Regering slaan toe op klaringsagente

1 dag gelede | Regering

Phillepus Uusiku – Die regering is in die finale fase van die instelling van strenger maatreëls vir die lisensiëring van klaringsagente.Die instellings beoog om die...

Nafau wen in hof teen Shoprite

1 dag gelede | Arbeid

Kristien Kruger en Adolf Kaure – Stakende Shoprite-werknemers was Vrydagmiddag verjuig toe die hoërhof in Windhoek beslis het dat ’n interdik teen die Shoprite-winkelgroep uitgereik...

Op die spoor van Hardapdam se opvangsgebiede

1 dag gelede | Infrastruktuur

Kallie Pauw (gasskrywer)Die onlangse wonderlike reën in groot dele van Namibië en verslae daaroor en foto's van vol riviere en dansende boere het mense (soos...