Gewone Zimbabwiërs krepeer
’n Joernalis meen die buurland is midde-in “’n subtiele noodtoestand”.
Denver Kisting – Die hernieude politieke en ekonomiese ellende in Zimbabwe laat die deursneeburger opnuut aan die agterspeen suig.
’n Zimbabwiese vrou, wat in Windhoek as masseur werk, sê dit is verskriklik hoe haar geliefdes in die buurland ly.
Die meeste van haar familie, insluitend haar minderjarige dogter, woon steeds in die buurland.
Dié vrou het Namibië toe getrek juis om vir haar kind te sorg.
“Dit is nie maklik om ver van my familie te wees nie, veral van my dogter, en om haar een of twee keer per jaar te sien nie. Die pynlike gedeelte is dat ek nie my kind ken nie.”
Sy het die afgelope Kersfees met haar tienerdogter deurgebring, maar het intussen weens werk teruggekeer Windhoek toe. Die kind woon saam met haar oom en tannie in Harare.
Sy sê voorts: “Die gewone Zimbabwiër is kwaad en gefrustreerd met die situasie. Hy kan nie sy gesin voed nie.”
Sy sê haar gemiddelde landgenoot is vuisvoos.
“Baie leef op minder as N$20 per dag, wat pynlik is.”
Ondanks dié swaarkry is daar ander burgers wat hul landgenote se lyding uitbuit, sê sy. “Sommige word ryker, omdat hulle die armes melk en voordeel uit die situasie trek.”
Dié vrou sê haar vaderland het in ’n militêre staat ontaard.
“Die weermag en die polisie is daar om hul land en sy mense te beskerm, maar op die oomblik beskerm hulle net sommige mense en nie gewone Zimbabwiërs nie. As hulle ons skiet om ons dood te maak en ons slaan en seermaak, tot wie kan ons ons wend?”
’n Zimbabwiese radiojoernalis het by navraag nie doekies omgedraai oor die omstandighede waaronder hulle gebuk gaan nie.
“Dis moeilik. Ons is in ’n subtiele noodtoestand.”
Volgens hom maak die regerende party, Zanu-PF, deurlopend jag op menseregteaktiviste en die opposisie.
Hoewel internetdienste onlangs afgeskakel is, is ’n hofbevel Maandag daarteen bekom.
In daardie verband het die joernalis laat verlede week laat weet: “Die internet word aan- en afgeskakel en ons het slegs via VPN toegang tot sosiale media.”
’n Ander joernalis, verbonde aan die staatsbeheerde The Herald, het gister gesê onderbroke geweld is steeds aan die orde van die dag.
Volgens haar doen hardnekkige beweringe ook die ronde dat beseerdes van geweld in die nánag deur die weermag en die polisie uit hospitale ontvoer word.
Hulle word na bewering by ’n onbekende plek deur die owerhede aangehou.
“Dit is nie duidelik of hulle voor die hof gedaag sal word nie, en of hulle selfs nog hul medikasie ontvang nie.”
Maar, sê sy, die hoop beskaam nie.
“(Dinge) normaliseer stadig.
“Onder meer het sommige leerlinge intussen teruggekeer skool toe,” sê sy.
“Inwoners is egter steeds angstig oor wat aangaan.”
Pres. Emmerson Mnangagwa het verlede week talle Zimbabwiërs die harnas ingejaag toe hy te midde van die jongste onluste in sy land in Rusland gaan kuier het.
Dr. Alfredo Hengari, pres. Hage Geingob se woordvoerder, het navrae na sy kollega by die sekretariaat van die Suider-Afrikaanse Ontwikkelingsgemeenskap (SADC), me. Barbari Lopi, verwys.
Geingob is tans die voorsitter van SADC.
Republikein het twee e-posse aan Lopi gestuur en haar twee keer onsuskesvol via WhatsApp probeer bereik.
’n Zimbabwiese vrou, wat in Windhoek as masseur werk, sê dit is verskriklik hoe haar geliefdes in die buurland ly.
Die meeste van haar familie, insluitend haar minderjarige dogter, woon steeds in die buurland.
Dié vrou het Namibië toe getrek juis om vir haar kind te sorg.
“Dit is nie maklik om ver van my familie te wees nie, veral van my dogter, en om haar een of twee keer per jaar te sien nie. Die pynlike gedeelte is dat ek nie my kind ken nie.”
Sy het die afgelope Kersfees met haar tienerdogter deurgebring, maar het intussen weens werk teruggekeer Windhoek toe. Die kind woon saam met haar oom en tannie in Harare.
Sy sê voorts: “Die gewone Zimbabwiër is kwaad en gefrustreerd met die situasie. Hy kan nie sy gesin voed nie.”
Sy sê haar gemiddelde landgenoot is vuisvoos.
“Baie leef op minder as N$20 per dag, wat pynlik is.”
Ondanks dié swaarkry is daar ander burgers wat hul landgenote se lyding uitbuit, sê sy. “Sommige word ryker, omdat hulle die armes melk en voordeel uit die situasie trek.”
Dié vrou sê haar vaderland het in ’n militêre staat ontaard.
“Die weermag en die polisie is daar om hul land en sy mense te beskerm, maar op die oomblik beskerm hulle net sommige mense en nie gewone Zimbabwiërs nie. As hulle ons skiet om ons dood te maak en ons slaan en seermaak, tot wie kan ons ons wend?”
’n Zimbabwiese radiojoernalis het by navraag nie doekies omgedraai oor die omstandighede waaronder hulle gebuk gaan nie.
“Dis moeilik. Ons is in ’n subtiele noodtoestand.”
Volgens hom maak die regerende party, Zanu-PF, deurlopend jag op menseregteaktiviste en die opposisie.
Hoewel internetdienste onlangs afgeskakel is, is ’n hofbevel Maandag daarteen bekom.
In daardie verband het die joernalis laat verlede week laat weet: “Die internet word aan- en afgeskakel en ons het slegs via VPN toegang tot sosiale media.”
’n Ander joernalis, verbonde aan die staatsbeheerde The Herald, het gister gesê onderbroke geweld is steeds aan die orde van die dag.
Volgens haar doen hardnekkige beweringe ook die ronde dat beseerdes van geweld in die nánag deur die weermag en die polisie uit hospitale ontvoer word.
Hulle word na bewering by ’n onbekende plek deur die owerhede aangehou.
“Dit is nie duidelik of hulle voor die hof gedaag sal word nie, en of hulle selfs nog hul medikasie ontvang nie.”
Maar, sê sy, die hoop beskaam nie.
“(Dinge) normaliseer stadig.
“Onder meer het sommige leerlinge intussen teruggekeer skool toe,” sê sy.
“Inwoners is egter steeds angstig oor wat aangaan.”
Pres. Emmerson Mnangagwa het verlede week talle Zimbabwiërs die harnas ingejaag toe hy te midde van die jongste onluste in sy land in Rusland gaan kuier het.
Dr. Alfredo Hengari, pres. Hage Geingob se woordvoerder, het navrae na sy kollega by die sekretariaat van die Suider-Afrikaanse Ontwikkelingsgemeenskap (SADC), me. Barbari Lopi, verwys.
Geingob is tans die voorsitter van SADC.
Republikein het twee e-posse aan Lopi gestuur en haar twee keer onsuskesvol via WhatsApp probeer bereik.
Kommentaar
Republikein
Geen kommentaar is op hierdie artikel gelaat nie