Geweld word erger, sê Geingob
Die wortel van die kwaad van geslagsgegronde geweld is volgens die president gebroke families.
Denver Kisting
Pres. Hage Geingob sê Namibiese families is stukkend.
Dít is volgens hom die olie op die vuur van die vlaag geslagsgegronde geweld waaronder die land tans gebuk gaan. “Daar is geen pa om die kinders te lei en te dissiplineer nie. Dis die wortel van die kwaad – ons families is gebroke.”
Geingob het gister by Staatshuis gesê dié euwel neem toe. “Dit raak erger in dié land. Dis ongelooflik.”
Hy sê die onlangse daelange betogings oraloor die land “maak die oë oop van diegene wat nie bewus was (van die probleem) nie”.
TWEEDE GOLF
Geingob het voorts gesê hy is bekommerd dat ’n tweede golf van Covid-19-infeksies die land kan tref.
Die afgelope ruk se afname in besmettings is syns insiens “te goed om waar te wees”.
Maar, sê hy, die land het tot dusver goed gevaar in die stryd teen die pandemie. “Ons moet aanhou veg. Ons moet deurdruk.”
Tydens ’n welwillendheidsbesoek van dr. George Fedha, die plaaslike verteenwoordiger van die Wêreldvoedselprogram, het Geingob gesê Namibië was besig om tot verhaal te kom ná ’n verlengde droogte toe “Covid: die grootste moordenaar” toeslaan.
Fedha was vol lof vir Namibië se hantering van die pandemie. “Die manier waarop julle Covid-19 gepak het, was merkwaardig.”
Maar, het hy gemaan, honderde duisende Namibiërs ly weens die impak van die virus en die droogte.
Fedha het gesê hulle werk saam met veral die ministerie van onderwys, kuns en kultuur om skoolvoedingsprogramme te ondersteun.
As Namibië selfonderhoudend kan word wat voedselsekuriteit betref, sal dit nie net vir dié skoleprogram goed wees nie, maar selfs vir die land se ekonomie, meen hy. “Wanneer jy jou eie kos kweek, het jy voedselsekuriteit selfs tydens ’n tweede golf en indien die grense weer gesluit word.”
Hongersnood kan nie geduld word nie, het Geingob gesê. Veral nie dié wat deur armoede teweeg gebring word nie, sê hy.
Die skoolvoedingsprogram is “baie, baie belangrik”, omdat sommige kinders volgens sy waarneming in ’n beter situasie in die klaskamers is as tuis.
– [email protected]
Pres. Hage Geingob sê Namibiese families is stukkend.
Dít is volgens hom die olie op die vuur van die vlaag geslagsgegronde geweld waaronder die land tans gebuk gaan. “Daar is geen pa om die kinders te lei en te dissiplineer nie. Dis die wortel van die kwaad – ons families is gebroke.”
Geingob het gister by Staatshuis gesê dié euwel neem toe. “Dit raak erger in dié land. Dis ongelooflik.”
Hy sê die onlangse daelange betogings oraloor die land “maak die oë oop van diegene wat nie bewus was (van die probleem) nie”.
TWEEDE GOLF
Geingob het voorts gesê hy is bekommerd dat ’n tweede golf van Covid-19-infeksies die land kan tref.
Die afgelope ruk se afname in besmettings is syns insiens “te goed om waar te wees”.
Maar, sê hy, die land het tot dusver goed gevaar in die stryd teen die pandemie. “Ons moet aanhou veg. Ons moet deurdruk.”
Tydens ’n welwillendheidsbesoek van dr. George Fedha, die plaaslike verteenwoordiger van die Wêreldvoedselprogram, het Geingob gesê Namibië was besig om tot verhaal te kom ná ’n verlengde droogte toe “Covid: die grootste moordenaar” toeslaan.
Fedha was vol lof vir Namibië se hantering van die pandemie. “Die manier waarop julle Covid-19 gepak het, was merkwaardig.”
Maar, het hy gemaan, honderde duisende Namibiërs ly weens die impak van die virus en die droogte.
Fedha het gesê hulle werk saam met veral die ministerie van onderwys, kuns en kultuur om skoolvoedingsprogramme te ondersteun.
As Namibië selfonderhoudend kan word wat voedselsekuriteit betref, sal dit nie net vir dié skoleprogram goed wees nie, maar selfs vir die land se ekonomie, meen hy. “Wanneer jy jou eie kos kweek, het jy voedselsekuriteit selfs tydens ’n tweede golf en indien die grense weer gesluit word.”
Hongersnood kan nie geduld word nie, het Geingob gesê. Veral nie dié wat deur armoede teweeg gebring word nie, sê hy.
Die skoolvoedingsprogram is “baie, baie belangrik”, omdat sommige kinders volgens sy waarneming in ’n beter situasie in die klaskamers is as tuis.
– [email protected]
Kommentaar
Republikein
Geen kommentaar is op hierdie artikel gelaat nie