Gevangene ontsnap uit polisieselle
Tanja Bause
Die 21-jarige mnr. Johannes Immanuel het tussen Vrydagnag en Saterdagoggend uit die polisieselle op Omaruru ontsnap.
Volgens adjunkkommissaris Erastus Iikuyu, van die Namibiese polisie in die Erongostreek, was Immanuel in polisieaanhouding op klagte van poging tot moord, gewapende roof en verskeie huisbrake.
Hy het ontsnap nadat hy glo die diefwering van sy sel afgesaag het. Daar word vermoed die voorval het omstreeks 05:30 Saterdag gebeur.
Immanuel is oorspronklik van Omaruru en het familie op Otjiwarongo en Okahandja, waar hy ook uitstaande hofsake het.
Die polisie versoek die gemeenskap om met inligting oor Immanuel na vore te kom.
Iikuyu waarsku ook dat niemand moet probeer om die voortvlugtende in hegtenis te neem sonder dat die polisie betrokke is nie.
Voorts berig Nampa dat die 27-jarige bestuurder van 'n bakkie ernstige kopbeserings opgedoen het toe hy 'n bees tussen Otjiwarongo en Kalkfeld gestamp het.
Die ongeluk het Maandag omstreeks 05:00 sowat 6 km buite Otjiwarongo gebeur. Die man was alleen in die voertuig.
“Die man is in 'n hospitaal op Otjiwarongo opgeneem maar hy is later na Windhoek gevlieg. Sy toestand is kritiek,” het adjunkkommissaris Naukalemo Andreas van die Otjozondjupastreek gesê.
Andreas het ook versoek dat beeste in kampe gehou moet word.
“Die beeste langs die pad stel mense se lewens in gevaar omdat dit baie moeilik is om hulle in die donker te sien.”
In die Ongozi-nedersetting naby Okahao in die Omusatistreek het mnr. Tomas Ndili Ipinge (57) Sondag in sy sinkhuis doodgebrand nadat dit om 11:00 aan die brand geslaan het terwyl hy geslaap het.
Die liggaam van die 44-jarige Zambiese burger, mnr. Kamwengo Simanje, is by die Makoma-nedersetting in die Zambezistreek in 'n stroompie gevind. Hy het sy nedersetting op Donderdag met 'n kano verlaat en sy liggaam is Sondag gevind.
Saterdagnag is 'n 18-jarige man by 'n sjebeen in die Kayeura-nedersetting in die Kavango-Oosstreek in 'n padwoedevoorval deur twee mans met 'n wielpomp oral oor sy lyf gemoker.
“Daar word beweer dat die slagoffer die een verdagte (die bestuurder) se bestuursvernuf bevraagteken het toe hy hom probeer stamp het. Die bestuurder en 'n vriend het hom toe aangerand. Die slagoffer is in 'n kritieke toestand in die Rundu-staatshospitaal opgeneem,” lui die Namibiese polisie se misdaadverslag.
Die twee verdagtes van onderskeidelik 29 en 39 jaar oud is in hegtenis geneem en die ondersoek duur voort.
Die 21-jarige mnr. Johannes Immanuel het tussen Vrydagnag en Saterdagoggend uit die polisieselle op Omaruru ontsnap.
Volgens adjunkkommissaris Erastus Iikuyu, van die Namibiese polisie in die Erongostreek, was Immanuel in polisieaanhouding op klagte van poging tot moord, gewapende roof en verskeie huisbrake.
Hy het ontsnap nadat hy glo die diefwering van sy sel afgesaag het. Daar word vermoed die voorval het omstreeks 05:30 Saterdag gebeur.
Immanuel is oorspronklik van Omaruru en het familie op Otjiwarongo en Okahandja, waar hy ook uitstaande hofsake het.
Die polisie versoek die gemeenskap om met inligting oor Immanuel na vore te kom.
Iikuyu waarsku ook dat niemand moet probeer om die voortvlugtende in hegtenis te neem sonder dat die polisie betrokke is nie.
Voorts berig Nampa dat die 27-jarige bestuurder van 'n bakkie ernstige kopbeserings opgedoen het toe hy 'n bees tussen Otjiwarongo en Kalkfeld gestamp het.
Die ongeluk het Maandag omstreeks 05:00 sowat 6 km buite Otjiwarongo gebeur. Die man was alleen in die voertuig.
“Die man is in 'n hospitaal op Otjiwarongo opgeneem maar hy is later na Windhoek gevlieg. Sy toestand is kritiek,” het adjunkkommissaris Naukalemo Andreas van die Otjozondjupastreek gesê.
Andreas het ook versoek dat beeste in kampe gehou moet word.
“Die beeste langs die pad stel mense se lewens in gevaar omdat dit baie moeilik is om hulle in die donker te sien.”
In die Ongozi-nedersetting naby Okahao in die Omusatistreek het mnr. Tomas Ndili Ipinge (57) Sondag in sy sinkhuis doodgebrand nadat dit om 11:00 aan die brand geslaan het terwyl hy geslaap het.
Die liggaam van die 44-jarige Zambiese burger, mnr. Kamwengo Simanje, is by die Makoma-nedersetting in die Zambezistreek in 'n stroompie gevind. Hy het sy nedersetting op Donderdag met 'n kano verlaat en sy liggaam is Sondag gevind.
Saterdagnag is 'n 18-jarige man by 'n sjebeen in die Kayeura-nedersetting in die Kavango-Oosstreek in 'n padwoedevoorval deur twee mans met 'n wielpomp oral oor sy lyf gemoker.
“Daar word beweer dat die slagoffer die een verdagte (die bestuurder) se bestuursvernuf bevraagteken het toe hy hom probeer stamp het. Die bestuurder en 'n vriend het hom toe aangerand. Die slagoffer is in 'n kritieke toestand in die Rundu-staatshospitaal opgeneem,” lui die Namibiese polisie se misdaadverslag.
Die twee verdagtes van onderskeidelik 29 en 39 jaar oud is in hegtenis geneem en die ondersoek duur voort.
Kommentaar
Republikein
Geen kommentaar is op hierdie artikel gelaat nie