Gesondheidsbelasting moet sektor finansier

Skenkersgeld droog op

13 October 2017 | Ministeries
Henriette Lamprecht



'n Verpligte gesondheidsversekeringstelsel, die verhoging van belastingkoerse, of die instel van 'n toegewyde gesondheidsbelas­ting is van die voorstelle om die volhoubare finansiering van Namibië se gesondheidstelsel te verseker.

Dié voorstel deur die Wêreldgesondheidsorganisasie (WHO) is in 'n verslag vervat oor die ministerie van gesondheid en maatskaplike dienste (MoHSS) se rekening vir 2014-'15. Volgens die verslag het skenkergeld in Namibië die afgelope paar jaar beduidend afgeneem. Die verwagting is dat dié neiging sal voortduur soos die land na 'n hoër middelklas oorskakel.

Bykomend tot die identifisering van alternatiewe bronne vir finansiering om dieselfde vlak en standaard van dienste te handhaaf terwyl skenkergeld opdroog, het Namibië hom ook tot Universele Gesondheidsdekking (UHC) verbind. Laasgenoemde gaan ook bykomende finansiële hulpbronne vereis.

Volgens die verslag moet die verskillende finansieringsopsies egter binne die huidige ekonomiese konteks ontleed word, terwyl terselfdertyd oorweging geskenk word aan die langtermyn-implikasies vir die volhoubaarheid van elk van dié opsies.

Die verslag sê die regering moet die omvang van onvervulde gesondheidsbehoeftes bepaal waar besteding nie dié met die grootste behoeftes bereik nie. Laasgenoemde verwys na groepe wat weens finansiële en ander struikelblokke geriewe en dienste nie ten volle kan benut nie.

Die verslag sê voorts volhoubare plaaslike finansiering moet geïdentifiseer word om programme vir MIV/vigs, tuberkulose (TB) en malaria te ondersteun.

MIV/vigs is die grootste oorsaak van sterftes in die land, gevolg deur TB en ander respiratoriese infeksies.

Ten spyte van dié siektes se topposisies vir sterftes in die land het Namibië se besteding aan MIV/vigs as 'n persentasie van die totale gesondheidsbesteding van 30% in 2008 tot 10% gedaal. Besteding aan TB was 2% en malaria 'n skrale 1%. Tans word 47% van die finansiering vir MIV/vigs deur skenkers gedoen, gevolg deur 23% vir TB en 18% vir malaria.

Volgens die verslag beteken dit dat sorg vir dié prioriteitsiektes wat 'n beduidende risiko vir die gesondheid van Namibië se bevolking inhou, grootliks op die skouers van skenkers rus - wat weer 'n risiko vir die volhoubaarheid van dié programme inhou.

Dit verwys voorts na die rol van die private sektor waarvan die bydrae tot die gesondheidsektor relatief laag is in vergelyking met dié van ander lande met soortgelyke bruto binnelandse produk per kapita.

Die verslag sê in Namibië se strewe na Universele Gesondheidsdekking moet die regering die private sektor betrek as 'n moontlike plaaslike bron vir bykomende finansiering en ook om druk op die openbare gesondheidsektor te verlig.

Dit maan voorts huishoudings se uit die sak-besteding (OOP-besteding) moet beheer word - onder meer omdat dit meestal informele werkers en werklose of kwesbare inwoners betrek.

Slegs 18% van Namibiërs word deur die staat se mediese fonds (Psemas) of private fondse gedek, met die oorblywende inwoners wat óf deur die openbare gesondheidstelsel óf met OOP-besteding geholpe moet raak.

OOP-besteding veroorsaak dat huishoudings die volle koste van gesondheidsdienste en –goedere moet dra wat 'n beduidende en potensieel katastrofiese finansiële las veral vir 'n kwesbare deel van die bevolking kan veroorsaak.

Slegs 18% van die totale gesondheidsbesteding is vir primêre gesondheidsorg.

Die verslag sê die toeganklikheid van kritieke dienste in afgeleë gebiede moet verbeter, terwyl oorweging ook geskenk moet word daaraan om 'n groter deel van die ministerie se hulpbronne aan die primêre sorgvlak asook voorkomingsprojekte toe te ken.

Groter finansiering is voorts nodig vir die voorkoming van nie-oordraagbare siektes (NCD).

Die meeste geld word nou aan die behandeling eerder as die voorkoming hiervan bestee.

Ook behoort die gesondheid van moeders 'n groter prioriteit te wees, met Namibië se moedersterftekoers wat op 265 sterftes per 100 000 lewendige geboortes staan.

In terme van neonatale sterftes is Namibië die land met die derde hoogste sterftekoers.

Soortgelyk

 

Keelvol studente soek hul geld

4 ure gelede | Onderwys

Augetto GraigStudenteleiers het gister op die Namibië Finansiële Hulpfonds vir Studente (NSFAF) se voorstoep betoog oor geld wat steeds nie aan hulle uitbetaal is nie....

Klagte van haatspraak

4 ure gelede | Howe

Henriette Lamprecht - ’n Klag van haatspraak is by die ombudsman ingedien teen leserskommentaar op 'n plaaslike dagblad se webtuiste. Die koerant moet volgens die...

Weer vir 19 Oktober 2017

4 ure gelede | Weer

WAARSKUWING: 'n Koue front word in die suidelike streke verwag. Binneland: Gedeeltelik bewolk en koud tot koel in die Suide, maar warm in die verre...

Routydperk vir Muharukua

4 ure gelede | Mense

'n Nasionale routydperk vanaf vandag tot Saterdag is afgekondig, met vlae wat halfstok sal hang. Die eer word betoon aan me. Angelika Muharukua wat op...

Minderheidsaandeelhouers teen sluiting van die SME Bank

4 ure gelede | Howe

Jacqueline Louw Senior advokaat Andrew Corbett het gister namens die Bank of Namibia (BoN) die motiewe van die twee Zimbabwiese minderheidsaandeelhouers wat die likwidasie van...

DTA eis skorsing van PS

4 ure gelede | Politiek

Die DTA vra vir die onmiddellike skorsing van die permanente sekretaris van nywerheidsontwikkeling, handel en SME-ontwikkeling en die hoofbestuurder van die Owerheid vir Sake- en...

Aanlyn geldskema oortree wet

4 ure gelede | Misdaad

Ronelle Rademeyer - ’n Nege maande oue geldmaakskema wat aanlyn beleggers se “drome” waar maak deur opbrengste van so hoog as 75% te beloof, oortree...

Kort nuus

4 ure gelede | Misdaad

Ondangwa ...

Selfs die jeug is bekommerd oor 'hubbly'-pype

4 ure gelede | Maatskaplik

Telwin !Owoseb - Namibië“Hoekom is dit in die eerste plek ingevoer en aanvaar? Dit moes nie ingebring gewees het nie. Dit vernietig die jeug en...