Geingob: 2018 die jaar van rekenskap
Pres. Hage Geingob het tydens die laaste kabinetsitting ‘n oorsig gegee van wat die afgelope jaar vermag is.
Estelle de Bruyn
Ondanks groot uitdagings bly die regering verbind tot die verwesenliking van sy oogmerke.
Pres. Hage Geingob het dié versekering Dinsdag by Staatshuis met die laaste sitting van die kabinet vanjaar gegee. Hy het kabinetslede daarop gewys dat 2018 die jaar van rekenskap sal wees, sonder om verder daaroor uit te wei.
Hy het ook op die belangrikheid van doeltreffende prosesse, stelsels en instansies gewys. “As mens op ‘n individu fokus, wat gebeur wanneer hulle weg is? Ons moet fokus op prosesse.”
Instansies soos die howe moet onafhanklik wees, want dit rugsteun die bestaande stelsels. Hy het die voorbeeld van die betwiste Amerikaanse presidentsverkiesing tussen mnre. Al Gore en George Bush gewys, waar ‘n stelsel ingestel is wat voorsiening gemaak het dat dit ordelik besleg word.
“Ons het howe en baie mense gaan howe toe. As ons prosesse nie ingestel is nie dan word ons na die howe geneem. Ek dink volgende jaar moet ons dit oorweeg om nie regsgeleerdes te betaal as hulle sake verloor nie,” het hy bygevoeg.
INKOMSTE-ONGELYKHEID
Wat armoede-uitwissing betref sê Geingob hy weet nie hoekom sommige mense teen inkomstegelykheid gekant is nie.
“Tot die koningin (Elizabeth II van Brittanje) het dit geopper toe ons ontmoet het. Wil ons hê mense moet maar net daar sit en arm bly? Ná 27 jaar het ons geleer hande vashou, ons almal word as Namibiërs erken, maar hoe kan ons die inkomste-ongelykheid die hoof bied?
“Ons sal spoedig oor NEEEF (die Nasionale Gelyke Ekonomiese Bemagtigingsraamwerk) praat, want sommige mense wil beskerm wat andere nie het nie. Ons het nie gesê ons sal dit op ‘n onverantwoordelike manier doen nie. Ons sal die vrede en eenheid behou, want ons leef almal in dieselfde Namibiese Huis,” het Geingob gesê.
‘n Aksieplan om strategieë te implementeer om salarisrekening in die staatsdiens in toom te hou en ‘n beleidsraamwerk op batebestuur is onder meer deur die kabinet aanvaar.
“Die salarisrekening in die staatsdiens word net groter en groter. As mense afgedank word of gedwonge uitdienstredings ingestel word, sal dit net tot werkloosheid bydra,” het Geingob gesê.
Hy sê oorweging word daaraan geskenk om 60 jaar die verpligte aftree-ouderdom te maak.
“Sommige permanente sekretarisse dink hulle is permanent permanent. Dit is nie die geval nie."
BINNEGEVEGTE BY GESONDHEID
Geingob het kommer oor binnegevegte in die ministerie van gesondheid en maatskaplike dienste, veral tussen die minister en die permanente sekretaris, uitgespreek. Hy het dr. Bernard Haufiku daarop gewys dat hy die politieke hoof van die ministerie is en wanneer kommunikasie in duie stort, moet die minister die skuld daarvoor kry, sê Geingob.“Volwassenheid moet seëvier,” het hy bygevoeg.
Geingob het op ‘n saak gewys waaroor hy oënskynlik gevoelig is. Hy het vanjaar sittings van die Afrika-unie (AU) en die Verenigde Nasies (VN) bygewoon. “Reis op my ouderdom is nie ‘n grap nie. As ek vir die plesier wil reis, kan ek vir my eie reise betaal. Ek sal nie vir die plesier op reise gaan nie. Ek gaan omdat ek moet. Ons bly in woonstelle eerder as hotelle. Die Waldorf Astonia Hotel kos US$10 000 per nag, maar ons bly in ‘n woonstel wat US$1 000 ‘n nag kos.
TRUMP EN 'NAMBIA'
“Ek het van vroeg tot laat gewerk en vergaderings bygewoon.
Toe (pres. Donald) Trump ‘Nambia’ gesê het toe ons ontmoet het, het hy vir ons baie publisiteit verseker. Tot CNN het daaroor berig. Hy het ons eintlik ‘n guns gedoen. Hy het baie blootstelling aan Namibië daardeur gegee,” het Geingob gesê.
Hy het ook sy skok oor die martelinge en slawerny in Libië uitgespreek. Hy sê die vraag moet gevra word hoekom soveel Afrikane probeer om deur Libië na Europa te reis.
“In Namibië kan mense vrylik beweeg en hoef nie weg te vlug na Libië om na Europa te gaan nie. “Toe ons in ballingskap in Amerika was, wou ons nie groenkaarte gehad het nie. As ‘n mens vir drie jaar met ‘n Amerikaner getroud is, is jy geregtig op Amerikaanse burgerskap. Ons het dit geweier,” het hy gesê.
Ondanks groot uitdagings bly die regering verbind tot die verwesenliking van sy oogmerke.
Pres. Hage Geingob het dié versekering Dinsdag by Staatshuis met die laaste sitting van die kabinet vanjaar gegee. Hy het kabinetslede daarop gewys dat 2018 die jaar van rekenskap sal wees, sonder om verder daaroor uit te wei.
Hy het ook op die belangrikheid van doeltreffende prosesse, stelsels en instansies gewys. “As mens op ‘n individu fokus, wat gebeur wanneer hulle weg is? Ons moet fokus op prosesse.”
Instansies soos die howe moet onafhanklik wees, want dit rugsteun die bestaande stelsels. Hy het die voorbeeld van die betwiste Amerikaanse presidentsverkiesing tussen mnre. Al Gore en George Bush gewys, waar ‘n stelsel ingestel is wat voorsiening gemaak het dat dit ordelik besleg word.
“Ons het howe en baie mense gaan howe toe. As ons prosesse nie ingestel is nie dan word ons na die howe geneem. Ek dink volgende jaar moet ons dit oorweeg om nie regsgeleerdes te betaal as hulle sake verloor nie,” het hy bygevoeg.
INKOMSTE-ONGELYKHEID
Wat armoede-uitwissing betref sê Geingob hy weet nie hoekom sommige mense teen inkomstegelykheid gekant is nie.
“Tot die koningin (Elizabeth II van Brittanje) het dit geopper toe ons ontmoet het. Wil ons hê mense moet maar net daar sit en arm bly? Ná 27 jaar het ons geleer hande vashou, ons almal word as Namibiërs erken, maar hoe kan ons die inkomste-ongelykheid die hoof bied?
“Ons sal spoedig oor NEEEF (die Nasionale Gelyke Ekonomiese Bemagtigingsraamwerk) praat, want sommige mense wil beskerm wat andere nie het nie. Ons het nie gesê ons sal dit op ‘n onverantwoordelike manier doen nie. Ons sal die vrede en eenheid behou, want ons leef almal in dieselfde Namibiese Huis,” het Geingob gesê.
‘n Aksieplan om strategieë te implementeer om salarisrekening in die staatsdiens in toom te hou en ‘n beleidsraamwerk op batebestuur is onder meer deur die kabinet aanvaar.
“Die salarisrekening in die staatsdiens word net groter en groter. As mense afgedank word of gedwonge uitdienstredings ingestel word, sal dit net tot werkloosheid bydra,” het Geingob gesê.
Hy sê oorweging word daaraan geskenk om 60 jaar die verpligte aftree-ouderdom te maak.
“Sommige permanente sekretarisse dink hulle is permanent permanent. Dit is nie die geval nie."
BINNEGEVEGTE BY GESONDHEID
Geingob het kommer oor binnegevegte in die ministerie van gesondheid en maatskaplike dienste, veral tussen die minister en die permanente sekretaris, uitgespreek. Hy het dr. Bernard Haufiku daarop gewys dat hy die politieke hoof van die ministerie is en wanneer kommunikasie in duie stort, moet die minister die skuld daarvoor kry, sê Geingob.“Volwassenheid moet seëvier,” het hy bygevoeg.
Geingob het op ‘n saak gewys waaroor hy oënskynlik gevoelig is. Hy het vanjaar sittings van die Afrika-unie (AU) en die Verenigde Nasies (VN) bygewoon. “Reis op my ouderdom is nie ‘n grap nie. As ek vir die plesier wil reis, kan ek vir my eie reise betaal. Ek sal nie vir die plesier op reise gaan nie. Ek gaan omdat ek moet. Ons bly in woonstelle eerder as hotelle. Die Waldorf Astonia Hotel kos US$10 000 per nag, maar ons bly in ‘n woonstel wat US$1 000 ‘n nag kos.
TRUMP EN 'NAMBIA'
“Ek het van vroeg tot laat gewerk en vergaderings bygewoon.
Toe (pres. Donald) Trump ‘Nambia’ gesê het toe ons ontmoet het, het hy vir ons baie publisiteit verseker. Tot CNN het daaroor berig. Hy het ons eintlik ‘n guns gedoen. Hy het baie blootstelling aan Namibië daardeur gegee,” het Geingob gesê.
Hy het ook sy skok oor die martelinge en slawerny in Libië uitgespreek. Hy sê die vraag moet gevra word hoekom soveel Afrikane probeer om deur Libië na Europa te reis.
“In Namibië kan mense vrylik beweeg en hoef nie weg te vlug na Libië om na Europa te gaan nie. “Toe ons in ballingskap in Amerika was, wou ons nie groenkaarte gehad het nie. As ‘n mens vir drie jaar met ‘n Amerikaner getroud is, is jy geregtig op Amerikaanse burgerskap. Ons het dit geweier,” het hy gesê.
Kommentaar
Republikein
Geen kommentaar is op hierdie artikel gelaat nie