Geen geld vir Kalahariwoestyn-slagoffer

20 June 2019 | Polisie
Denver Kisting – ’n Vriend van wyle mnr. Fambauone Black (22), die Kalahariwoestyn-slagoffer, sê daar’s geen geld om sy oorskot na Zimbabwe terug te neem nie.

Dié man het gister erken hy – nes Black ten tyde van sy dood – is onwettig in Namibië. Sy identiteit word derhalwe weerhou.

Volgens hom wil Black se ouers, wat tussen die buurland se hoofstad, Harare, en Chitungwiza woon, hê sy lyk moet huis toe gebring word.

Hulle het Black liefderik Charlie genoem, vertel die vriend. “Soos in Charlie Chaplin.”

Al die papierwerk is gereed vir die reis wat vandag sou plaasvind, maar daar is geen geld daarvoor nie, sê Republikein se bron.

Black was ongetroud en het nog nie kinders gehad nie, sê sy bewoë vriend.

Die jong taxibestuurder het verlede Donderdag omstreeks 01:00 in Monicastraat in Katutura gesterf – glo aan die hand van kpl. Gerson Nakale, ’n soldaat wat deel was van die teenmisdaadveldtog Operasie Kalahariwoestyn.

“Om vir jou die waarheid te vertel: Ons is almal swaar getref,” sê Black se vriend.

Hy sê hulle besef Nakale het moontlik nie geweet dit is ’n Zimbabwiër toe hy hom glo geskiet het nie, maar dit neem nie hul hartseer weg nie.

“Ons is glad nie gelukkig nie. Ek is nog baie emosioneel.”

’n Broer van Black kan hom kwalik help met die reëlings omdat dié man sy broer se dood moet verwerk en weer sy voete moet vind ná hy glo twee weke gelede uit aanhouding vrygelaat is.

Die bron sê die broer is aangekeer omdat ook hy onwettig in Namibië is.

“Ons wil nie teruggaan huis toe nie, want om soontoe (Zimbabwe toe) te gaan, is ’n ander storie,” sê hy.

Hy sê Black het verlede Donderdag van die owerhede weggejaag omdat hy waarskynlik bang was weens sy status in die land.

“En selfs al het ’n mens dokumente word Zimbabwiërs nie toegelaat om in Namibië taxi te ry nie.”

Adj.komm. Abner Agas, koördineerder van misdaadondersoeke in die Khomasstreek, sê by navraag Nakale was deel van ’n groot span weermag- en polisielede by die padblokkade in Katutura.

Hy wou nie bespiegel of dit ’n waarskuwingskoot was wat skeefgeloop het nie.

Agas het bevestig Black het in Oktober 2017 in Namibië aangekom en die land nie weer verlaat nie.

Die senior beampte het ook bevestig Black was as taxibestuurder in diens van ’n ander Zimbabwiese burger.

Hulle het na wat verneem word ’n taxipermit gebruik wat aan ’n Namibiër behoort.

Soortgelyk

 

Etosha Sondagmiddag deur aardbewing geskud

2 ure gelede | Omgewing

Ronelle Rademeyer - ’n Aardbewing van 4,7 op die Richterskaal het Sondag om 16:42 in die Etosha nasionale park voorgekom.Me. Gloria Simubali, adjunk uitvoerende direkteur...

Is groot Beethoven-feesjaar van die baan?

2 ure gelede | Kuns en vermaak

Groot feesvierings is wêreldwyd en veral in Duitsland en Oostenryk beplan ter herdenking van die komponis Ludwig van Beethoven se 250ste geboortejaar. Elretha Britz van...

Naam bekend van Namibiër wat in Engeland aan Covid-19...

3 ure gelede | Gesondheid

Ronelle Rademeyer - Die Namibiër wat Saterdag in Nottingham, Engeland, aan die coronavirussiekte (Covid-19) dood is, se naam is bekend gemaak.Hy is die 56-jarige mnr....

Paspoorte: Lorriedrywers kry voorkeur

3 ure gelede | Regering

Denver Kisting – Die ministerie van binnelandse sake, immigrasie, veiligheid en sekuriteit het by monde van sy woordvoerder, mnr. Sakeus Kadhikwa, ontken hulle reik tans...

Meer as 3 000 vir Covid-19 getoets

4 ure gelede | Gesondheid

Die adjunkminister van gesondheid en maatskaplike dienste me. Esther Muinjangue sê 3 186 weefselmonsters is tot op hede vir Covid-19 getoets. Namibië het tans 21...

Moody's-klap voor begroting

14 ure gelede | Regering

Jo-Maré Duddy – Op die vooraand van finansminister Iipumbu Shiimi se debuutbegroting sit die regering nie net kniediep in die rommel nie, maar verskraal sy...

Kwarantyn-drama ry lorriedrywers

14 ure gelede | Gesondheid

Leandrea Louw op Walvisbaai – Die vragmotorbestuurder wat die afgelope naweek positief vir Covid-19 getoets het, sê sy voormalige werkgewer het hom en sy kollega...

Man voor hof ná 'hardhandigheid'

14 ure gelede | Misdaad

Denver Kisting – 'n Inwoner van Groot Aub, mnr. Richard Davids, wat aanvoer 'n beampte van die stadspolisie het hom verlede week aangerand, is Vrydag...

Weer, Dinsdag 26 Mei 2020

14 ure gelede | Weer

WEERWAAK: Koue tot baie koue toestande word in die Suide, die Weste en oor die Khomas- en Omahekestreek verwag. Tref voorsorg.BINNELAND: Gedeeltelik bewolk en koud...