Geen borg vir aanklaer in bedrogsaak

Staat getuig oor ‘goed beplande operasie’

16 December 2016 | Howe
Jacqueline Louw – Landdros Eduard Kesslau het in die Windhoekse landdroshof beveel dat mnr. Ivan Victor Tjizu wat van korrupsie en swendelary beskuldig word, in aanhouding moet bly.

Tjizu is op 1 Desember deur die Teenkorrupsie Kommissie (ACC) in hegtenis geneem. Die klagte teen Tjizu is gebaseer op aantygings dat hy ’n skema georkestreer het waarin hy betaling aan getuies wat veronderstel was om te getuig in sake wat hy hanteer het, te magtig. Na bewering het hy vals verklaar dat hulle van plekke buite Windhoek gereis het en geregtig op vergoeding vir hul reisuitgawes was.

Na bewering het Tjizu ’n gedeelte van die getuiegeld ontvang nadat dit aan die persone wat hul as getuies voorgedoen het, uitbetaal is.

Tjizu ontken skuld op al die klagte teen hom en het gesê dat hy die basis van sy verweer tydens sy verhoor bekend sal maak. Hy het verder getuig dat sy handskrif op die bewyse vir getuiegeld vervals is. Hy het die hof verder meegedeel dat daar nie enige voorneme of vrye wil aan sy kant was toe die oortredings waarvan hy na bewering beskuldig word, gepleeg is nie en dat wanvoorstellings aan hom gemaak is. Hy het ook bevestig dat hy homself as ’n slagoffer in die saak sien.

Tjizu het aan die hof vertel dat hy en sy meisie ’n negejarige seun het wat aan outisme lei en spesiale sorg nodig het. As aanklaer is hy die hoofbroodwinner vir sy familie en naasbestaandes wat by hulle bly en dat hy ook sy studieskuld afbetaal en dus onder groot finansiële druk is.

Die staat het Tjizu se borgtogaansoek teëgestaan omdat die ondersoeke nog in ’n vroeë stadium was en daar gevrees word dat hy met getuies sal inmeng en die ondersoek in die wiele sou ry. Hierdie vrese is gestaaf deur getuienis in die hof dat hy wel ’n getuie geskakel het. “Is dit verkeerd om ’n getuie te kontak?” het hy tydens kruisverhoor gereageer.

Staatsaanklaer Seredine Jacobs het aangevoer dat die staat ’n sterk saak teen Tjizu het en verwys na WhatsApp-boodskappe wat hom met vals getuies verbind. Sy het verder uitgewys dat Tjizu tydens die aansoek gesê het “jy weet nie of ek gedwing was om dit te doen nie”, en hy dus onder eed erken het dat hy wel die oortredings begaan het.

Jacobs het betoog dat hy as aanklaer in ’n vertrouensposisie was en hy daardie vertroue misbruik het.

Tjizu het sy benarde finansiële posisie en sy rol as broodwinner in ’n uitgebreide familie asook sy grondwetlike regte op vryheid en ’n regverdige verhoor as gronde vir die toekenning van borgtog aan die hof genoem. Hy het aangevoer dat hy geruime tyd al bewus was van die ondersoek in die saak teen hom en dat hy nietemin nie op vlug geslaan het nie en die ondersoekbeamptes bygestaan het.

In sy uitspraak het Kesslau daarop gewys dat daar verswarende getuienis teen Tjizu in die aansoek om borgtog gelewer is, onder andere dat saakdossiere wat hy uitgeteken het en wat op sy saak betrekking het, vermis geraak het. Hy het ook na Tjizu se laatnag oproepe na prokureurs wat in sy sake betrokke was, verwys as “oneties”. Die doel van hierdie oproepe was glo om lenings by die prokureurs te maak.

Die bedrag van die bedrog wat tot dusver aan die lig gekom het, is ongeveer N$280 000. Kesslau het in sy uitspraak gesê dit is ’n moontlikheid dat die bedrag sal verhoog soos die ondersoek vorder en daar moontlik verdere klagte teen Tjizu kan ontstaan. Hy het tot die slotsom gekom dat Tjizu nie ’n geskikte kandidaat vir borgtog is nie.

Die saak is tot 28 Februarie 2017 uitgestel.

Soortgelyk

 

Bejaarde erg getraumati­seer

4 ure gelede | Gesondheid

Henriette Lamprecht'n Bejaarde inwoner van Windhoek wat van 'n rolstoel gebruik maak, het vandeesweek vir ure in haar ontlasting in 'n hospitaalgang vir 'n prosedure...

Rooies Mostert in eiendomsgeskil

4 ure gelede | Misdaad

Denver Kisting – Mnr. Walter (Rooies) Mostert, ’n oudlanddros, staar strafregtelike klagte in die gesig weens ’n eiendomstransaksie wat skeefgeloop het.Luidens dokumente in Republikein se...

Weer vir 19 April

4 ure gelede | Weer

BINNELAND: Gedeeltelik bewolk en matig tot warm in die //Kharasstreek, maar baie warm in die Noorde. Elders sal dit mooiweer en baie warm wees. KUS:...

Inbrekers steel derduisende by SKW

4 ure gelede | Misdaad

Denver Kisting – Teen gistermiddag was daar nog geen sent teruggevind van die N$220 000 kontant wat die naweek by die Sport Klub Windhoek (SKW)...

Piramideskema: Trio skuldig op 512 klagte

4 ure gelede | Howe

Ronelle RademeyerDie bedrog-trio van Oranjemund wat van 2004 tot 2006 'n piramideskema bedryf het waarin beleggers sowat N$11,5 miljoen verloor het, se doppie is geklink.Regter...

Oranjemund maak spiere vir toerisme

4 ure gelede | Gebeure

Môre (Vrydag) bied Namibië se nuutste dorp, Oranjemund, ‘n toerismemark aan.Die geleentheid vier ook die dorp se nominering as ‘n finalis in Namibia Media Holdings...

Skole, koshuise in 'toestand van verval'

4 ure gelede | Ministeries

Henriette LamprechtSowat 85% van openbare onderwysgeriewe in Namibië is in 'n toestand van verval, terwyl die ontwikkeling en rehabilitasie daarvan teen 'n slakkepas beweeg. Die...

PDM lê Sona-eier

4 ure gelede | Regering

Denver Kisting Mnr. McHenry Venaani, leier van die amptelike ­opposisie, beweer president Hage Geingob en sy binnekring woon in 'n ander land as die...

Spensdeure klap oop oor kaas en kontreikos

4 ure gelede | Gebeure

Des Erasmus - Die bystand van deskundiges uit Suid-Afrika is ingeroep in die eerste stappe wat gedoen word om Namibië se kaasmakersbedryf te standaardiseer en...