GBV-getalle vertel ware verhaal

Geslagsgeweld onder die loep

22 February 2021 | Howe
Jana-Mari Smith

Namibiese landdroshowe het die afgelope drie jaar meer as 6 300 aansoeke van gesinsgeweld geregistreer, benewens meer as 5 000 tussentydse beskermingsbevele en meer as 2 600 finale beskermingsbevele.

In 2018 het 1 938 slagoffers die landdroshowe om hulp genader teenoor 2000 in 2019. Verlede jaar is altesaam 2 370 huishoudelike aansoeke geregistreer.

Dit is onduidelik hoe dié getalle op Namibië se epidemie van geslagsgebaseerde geweld (GBV) en gesinsgeweld weerspieël.

“Ons het nie genoeg inligting om die tendense akkuraat te ontleed nie. Neem huishoudelike geweld toe of is slagoffers meer bereid om hulp te soek? Dit is moeilik om te bepaal watter van hierdie scenario's tot hoë getalle lei,” het me. Dianne Hubbard van die Legal Assistance Centre (LAC) gesê.

Volgens mnr. James Itana van die Regain-trust is hierdie getalle 'n teken meer slagoffers vra om hulp, maar het gewaarsku hierdie getalle is “nog net die punt van die ysberg”.

“Toegang tot dienste vir slagoffers is steeds 'n groot hindernis en iets waarmee ons in Namibië sukkel, veral onder ons gemarginaliseerde en landelike gemeenskappe,” het hy benadruk.

GEWELD IN SAMELEWING

Terwyl Namibië se probleem met geslagsgeweld algemeen erken word en die regering gereeld nuwe bewusmakingsveldtogte van stapel stuur, wys Hubbard daarop daar is ’n gebrek aan ontleding van tendense in Namibië.

"Baie ander lande doen slagofferopnames om uit te vind hoeveel misdade gedurende 'n spesifieke tydperk gepleeg is, om dit te vergelyk met die aantal verslae wat aan die polisie vir dieselfde misdaad gedurende dieselfde tydperk voorgelê is,” het Hubbard gesê.



Sy waarsku Namibië moet nog 'n lang pad stap om nie net geslagsgeweld hok te slaan nie, maar ook die hoë voorkoms van geweld, insluitend geweld tussen mans en roekelose optrede wat tot beserings lei soos roekelose bestuur.

Sy het daarop gewys dat houdings teenoor geweld in enige vorm bydra tot die probleem in Namibië.

“Soveel mense kla oor die vlakke van geslagsgeweld, maar glo steeds om kinders te slaan is 'n nuttige manier om dissipline toe te pas. Ons moet ons kinders niegewelddadige maniere leer om probleme op te los, hulle moet altyd respek vir ander mense toon en alle persone van enige geslag of ouderdom het ewe veel reg om met waardigheid behandel te word.”

Vroeër hierdie maand het die regbank aangekondig landdroshowe het 1 520 tussentydse beskermingsbevele in 2018 toegestaan, 1 693 in 2019 en 1 835 in 2020.

Daarenteen is altesaam 2 601 finale beskermingsbevele oor dieselfde tydperk toegestaan.

Hubbard merk op dit is 'n “baie belangrike” verskil wat ondersoek moet word.

"Het die tussentydse bevele die probleem opgelos, of is die slagoffer geïntimideer om nie terug na die hof te keer nie?"

DIENSTE

Itana en Hubbard beklemtoon die noodsaaklikheid van meer ondersteuningsdienste aan slagoffers.

“Ons het as 'n land groot vordering gemaak om die verskaffing van dié dienste te versterk, maar baie moet nog gedoen word. Dienste is steeds nie maklik beskikbaar en toeganklik nie en in sommige gevalle of in sommige dele van die land bestaan hierdie dienste glad nie,” het Itana gesê.

Hy waarsku dat dienste nie net daar is om slagoffers te beskerm nie, maar om oortreders tot verantwoording te bring en om slagoffers te help om gesond te word en met hul lewens aan te gaan.

“In gevalle waar die slagoffer moontlik afhanklik van die oortreder was, moet daar gepoog word om slagoffers ekonomies te bemagtig. As jy nie slagoffers bemagtig nie, kan dit hul voortgesette risiko en kwesbaarheid teenoor geslagsgeweld in die toekoms verhoog.”

Praktiese hulp, toegang tot skuiling en toelae wat finansiële sekuriteit verhoog, is belangrike instrumente om vroue te help om verhoudings te verlaat waar hulle mishandel word, het Hubbard gesê.

Daarbenewens het sy die noodsaaklikheid van egskeidingshervorming beklemtoon om dit makliker te maak om huwelike te verlaat. - [email protected]

Soortgelyk

 

Knopvelsiekte breek in Omaheke uit

11 minute gelede | Landbou

Knopvelsiekte het by Eiseb in die Omahekestreek uitgebreek en die beweging van beeste in dié gebied is tot verdere kennisgewing opgeskort.Volgens dr. Albertina Shilongo, hoof-veeartsenybeampte...

Metro spoils its customers

1 uur gelede | Plaaslik

Metro Namibia celebrated its birthday in style once again by spoiling five lucky customers each to a trailer of their own, stocked with N$5,000-00 worth...

Vrou woon in haar motor by hospitaal

10 ure gelede | Mense

Henriette Lamprecht – 'n Bejaarde vrou van die kus woon die afgelope week in haar motor in die parkeerterrein van 'n staatshospitaal in Windhoek om...

Toekoms van 77 Air Nam-vlieëniers onseker

10 ure gelede | Vervoer

Francoise Steynberg – Altesaam 77 vlieëniers van Air Namibia se toekoms is onseker. Boonop het bykans 75% van die redery se vlieëniers se lisensies verval...

Ses damme voller as 100%

10 ure gelede | Weer

Elvira Hattingh – Terwyl altesaam sowat ses Namibiese damme tans 100% of meer water bevat, oorstroom die Zambezirivier sy walle, met water wat in die...

Weer vir 24 Februarie

10 ure gelede | Weer

WEERWAAK: Wydverspreide donderbuie word in Ohangwena, Oshikoto, Otjozondjupa en Omaheke verwag. BINNELAND: Sonnig en warm in die Suide en Weste, andersins gedeeltelik bewolk en baie...

'Swak bestuur rede vir Meatco se krisis'

10 ure gelede | Byvoegsels

Ellanie Smit - Volgens ’n verslag wat aan die ministerie van staatsondernemings (SOE's) voorgelê is, staar Meatco likwidasie in die gesig indien hy nie kostes...

Hof kry Heritage Health voor stok

10 ure gelede | Gesondheid

Henriette Lamprecht – Die mediese fonds Heritage Health het 'n bloutjie in die hoërhof geloop nadat hy sy jaarlikse premies wou verhoog, maar dié stap...

'IEB in nuwe formaat is hier om te bly'

10 ure gelede | Onderwys

Henriette Lamprecht – Die nuwe leerplan vir skole in Namibië wat die Onafhanklike Eksamenraad (IEB)-stelsel volg, is vergelykbaar met die Namibiese Senior Sekondêre Sertifikaat (SSS)...