'Fop-ongeluk’ op kamera verewig
Beeldmateriaal wys hoe twee motoriste oënskynlik ‘n voorafbeplande motorongeluk in Windhoek veroorsaak.
Yolanda Nel - Binne sowat 20 minute het twee Windhoekse motoriste oënskynlik daarin geslaag om ‘n fop-ongeluk te maak, wat ‘n versekeringsmaatskappy honderde duisende Namibiese dollar in eise kan kos.
Dié voorval is op 6 Januarie om 23:25 deur die Kleine Kuppe-buurtwag se kringtelevisiekameras vasgelê.
In die beeldmateriaal kan gesien word hoe twee voertuie by ‘n stopstraat in Robert Mugabeweg tot stilstand kom.
‘n Bakkie stop ’n paar sekondes daarná agter dié twee voertuie.
Die voorste voertuig, ’n rooi sedan, se insittendes klim uit en dit lyk of hulle plekke met die middelste voertuig se insittendes ruil.
Dan word die rooi sedan in die middel van die kruising geparkeer.
Die bestuurder klim uit en stap weg, waarná die bakkie en die middelste, wit sedan wegry.
Minute later ry die wit sedan teen die rooi sedan vas.
Die bestuurder, wat aanvanklik uitgeklim het, hardloop nader en dit lyk of die skade bestudeer word.
Teen 23:40 word die wit sedan in trurat gesit en ry hy wéér in die rooi sedan vas.
Indien die doel was om een van die voertuie af te skryf, sou die eerste stamp nie hard genoeg daarvoor wees nie.
Ses minute later daag verskeie insleepdienste by die “ongelukstoneel” op.
“Geld blyk die grootste motief te wees,” het ‘n anonieme bron aan Republikein gesê.
Volgens dié bron is hierdie soort voorval geen nuwe tendens nie.
“Daar’s ’n reusenetwerk van hierdie tipe bedrog; dit gebeur meer gereeld as wat mens sou dink,” het hy gesê.
Die versekeringsbedryf is dit eens – voorafopgestelde motorongelukke is besig om toe te neem.
“Die ekonomie speel ‘n groot rol en mense is in die knyp en vat kanse om hul finansies aan te vul,” het die bron gesê.
Omdat almal swaarkry, verkoop voertuie nie so flink soos in ekonomies gesonde tye nie, sê hy.
“En N$100 000 of N$300 000 in die bank is beter as ‘n voertuig, omdat jy ‘n motor kan huur as dit nodig is, maar jy kan nie vanaand vir jou kinders ‘n bord kos huur nie,” verduidelik hy.
Die bron waarsku dit is nie vir versekeringsmaatskappye onmoontlik om vas te stel of ‘n ongeluk beplan is nie.
“Jy kan strafregtelik vervolg word en jy sal nooit weer verseker word nie,” het hy gesê.
Dié wat hulself hieraan skuldig maak, lê dan ook ‘n valse verklarings by die polisie af.
“Jy kan in die tronk gaan sit.”
Beide voertuie se registrasienommers is aan die polisie gegee en alle versekeringsmaatskappye is gewaarsku om op die uitkyk te wees vir ‘n eis wat hierdie voertuie betrek.
Dié voorval is op 6 Januarie om 23:25 deur die Kleine Kuppe-buurtwag se kringtelevisiekameras vasgelê.
In die beeldmateriaal kan gesien word hoe twee voertuie by ‘n stopstraat in Robert Mugabeweg tot stilstand kom.
‘n Bakkie stop ’n paar sekondes daarná agter dié twee voertuie.
Die voorste voertuig, ’n rooi sedan, se insittendes klim uit en dit lyk of hulle plekke met die middelste voertuig se insittendes ruil.
Dan word die rooi sedan in die middel van die kruising geparkeer.
Die bestuurder klim uit en stap weg, waarná die bakkie en die middelste, wit sedan wegry.
Minute later ry die wit sedan teen die rooi sedan vas.
Die bestuurder, wat aanvanklik uitgeklim het, hardloop nader en dit lyk of die skade bestudeer word.
Teen 23:40 word die wit sedan in trurat gesit en ry hy wéér in die rooi sedan vas.
Indien die doel was om een van die voertuie af te skryf, sou die eerste stamp nie hard genoeg daarvoor wees nie.
Ses minute later daag verskeie insleepdienste by die “ongelukstoneel” op.
“Geld blyk die grootste motief te wees,” het ‘n anonieme bron aan Republikein gesê.
Volgens dié bron is hierdie soort voorval geen nuwe tendens nie.
“Daar’s ’n reusenetwerk van hierdie tipe bedrog; dit gebeur meer gereeld as wat mens sou dink,” het hy gesê.
Die versekeringsbedryf is dit eens – voorafopgestelde motorongelukke is besig om toe te neem.
“Die ekonomie speel ‘n groot rol en mense is in die knyp en vat kanse om hul finansies aan te vul,” het die bron gesê.
Omdat almal swaarkry, verkoop voertuie nie so flink soos in ekonomies gesonde tye nie, sê hy.
“En N$100 000 of N$300 000 in die bank is beter as ‘n voertuig, omdat jy ‘n motor kan huur as dit nodig is, maar jy kan nie vanaand vir jou kinders ‘n bord kos huur nie,” verduidelik hy.
Die bron waarsku dit is nie vir versekeringsmaatskappye onmoontlik om vas te stel of ‘n ongeluk beplan is nie.
“Jy kan strafregtelik vervolg word en jy sal nooit weer verseker word nie,” het hy gesê.
Dié wat hulself hieraan skuldig maak, lê dan ook ‘n valse verklarings by die polisie af.
“Jy kan in die tronk gaan sit.”
Beide voertuie se registrasienommers is aan die polisie gegee en alle versekeringsmaatskappye is gewaarsku om op die uitkyk te wees vir ‘n eis wat hierdie voertuie betrek.
Kommentaar
Republikein
Geen kommentaar is op hierdie artikel gelaat nie