Fishrot: Namibië wil weet

Augetto Graig - Die tiende sessie van Namibië se sesde parlement het Dinsdag afgeskop en verskeie vrae oor die internasionale Fishrot-korrupsieskandaal opgelewer.

Die land se sewende parlement sal op 20 Februarie ingehuldig word, en op 19 Maart sy eerste sitting hou.

Intussen behou Swapo sy tweederdemeerderheid en is me. Martha Namundjebo-Tilahun en mnre. Joel Kapanda, Festus Marenga en Ephraim Nekongo as parlementslede verwelkom.

Dié Swapo-lede vervang die oudminister van justisie, mnr. Sacky Shanghala, en die oudminister van visserye, mnr. Bernhard Esau, wat by die Fishrot-sage betrek word, asook mnre. Jerry Ekandjo en Sebastian Karupu, wat onlangs bedank het.

Verskeie opposisieleiers het amptelik aangedui vrae sal in die parlement oor dié grootskaalse korrupsieskandaal gevra word.

Volgens die parlement se skedule word antwoorde hierop op Donderdag 20 Februarie verwag.

Die Rally for Democracy and Progress (RDP) se leier, mnr. Mike Kavekotora, het gesê: “Ons is nou daar waar die publiek op meer aanspreeklikheid in reaksie op die misbruik van die land se hulpbronne aandring, en dat die nasie oor die mate van korrupsie in die land ingelig word.”

Hy dring daarop aan dat mnr. Albert Kawana, die prokureur-generaal en waarnemende minister van visserye en mariene hulpbronne, meer oor die staatsonderneming Fishcor se aandeel in die korrupsieskandaal onthul.

Kavekotora wil weet hoe die destydse Fishcor-raadslede aangestel is en wat hul aandeel in die beweerde omkopery was.

Hy het mnre. Mike Nghipunya, James Hatuikulipi, Bennet Kangumu en me. Ndaendomwenyo Sheya uitgesonder, asook goew. Usko Nghaamwa, goew. Sirkka Ausiku en mnr. Moses Maurihungirire, uitvoerende direkteur van mariene hulpbronne en visserye.

Van hulle wil hy weet of hulle bewus van meer as N$70 miljoen se Fishcor-transaksies was, en wat dié transaksies behels het.

Hy wou ook weet wie die ouditfirma was wat die maatskappy se boeke nagegaan het.

Kavekotora wil ook weet hoekom Kawana ’n 15 000 ton-kwota van maasbankers aan ’n stokvismaatskappy toegeken het.

“Wat het jy gedink? Hoe volhoubaar is dit? Hoekom nie ’n stokviskwota nie?” het hy gevra.

Die Popular Democratic Movement (PDM) se parlementêre verteenwoordiger, mnr. Nico Smit, se vrae aan Kawana het verband gehou met vordering in sy ondersoek na onreëlmatighede in Namibië se visbedryf.

Pres. Hage Geingob het Kawana verlede jaar opdrag gegee om die stand van sake by die ministerie te ondersoek.

“Ons het nog niks oor die ondersoek gehoor nie. Lig die huis asseblief in oor die vordering daarmee. Hoekom is die ander twee Samherji-skepe toegelaat om weg te kom? Het die minister eers op Facebook gehoor die skepe verlaat die hawe? Is daar enige poging om die skepe terug te kry?” het Smit gevra.

Intussen het mnr. Björgólfur Jóhannsson, Samherji se uitvoerende hoof, vandeesweek teen die beslaglegging op ’n derde skip, die Heinaste, Vrydag by Walvisbaai uitgevaar.

“Samherji is bekommerd daaroor dat die Namibiese polisie die hofbevel met opset geïgnoreer het, en geweier het om die skip se dokumente aan die eienaar te oorhandig, soos die hof beveel het,” het hy volgens Namibian Sun, Republikein se susterkoerant, gesê.

Dit nadat dié skip se kaptein ’n week tevore skuldig bevind is aan visvang in verbode waters, is berig.

Samherji wil nou regstappe doen ná ’n ooreenkoms om die Heinaste aan ’n Russiese firma te verkoop, glo weens dié gebeure misluk het.

– [email protected]