Fishcor sonder topbestuur

Ruth Herunga hou tydelik ‘toesig’

07 April 2021 | Visserye
Ronelle Rademeyer – Die tydelike direksie van Fishcor het een van sy direksielede, me. Ruth Herunga, na Lüderitz gestuur as tydelike toesighouer van dié beleërde vismaatskappy nadat nog ’n senior bestuurder gister bedank het en die maatskappy in ’n ongeëwenaarde bestuurskrisis gedompel het.
Mnr. Paulus Ngalangi, finansiële hoofbeampte van Fishcor en die laaste oorblywende lid van die topbestuur, het kort voor middagtyd sy bedanking ingedien.
Mnr. Mihe Gaomab II, voorsitter van Fishcor, sê sy bedanking was met onmiddellike effek van krag.
Die maatskappysekretaris, me. Josefina Nekongo, het ook vroeër bedank en haar kennisgewingmaand het einde Maart verstryk. Die operasionele bestuurder, mnr. Inocencio Verde, het verlede jaar bedank.
Fishcor was die episentrum van die Fishrot-korrupsiebom wat in November 2019 gebars en tot die inhegtenisneming van die vorige direksievoorsitter, mnr. James Hatuikulipi, en die hoof uitvoerende beampte, mnr. Mike Nghipunya, gelei het.
Mnr. Leon Jooste, minister van staatsondernemings, het intussen gister by navraag gerugte in die wandelgange van die visbedryf dat Fishcor gelikwideer gaan word, ontken.
Gaomab het laat gister in ’n verklaring gesê die tydelike direksie is die afgelope maande met talle uitdagings gekonfronteer. Dit sluit in die bevriesing van Fishcor se bankrekenings deur die Bank of Namibia en die gepaardgaande finansiële beperkings wat dit gebring het, gevolg deur Nekongo en Ngalangi se bedankings.
Dit is benewens die regsgeding waarin Fishcor met sy filiaal op Walvisbaai, Seaflower Pelagic Processing (SPP), gewikkel is, sê hy.
“Die direksie is steeds daartoe verbind om die volhoubaarheid en stabiliteit van die maatskappy vorentoe te verseker. Daarom is besluit om ’n tussentydse pos vir me. Ruth Herunga te skep sodat sy daagliks kan aandag gee aan dringende sake by die Seaflower Whitefish Corporation op Lüderitz.”
Benewens sy aandele in SPP, besit Fishcor 100% van die aandele in Seaflower Lobster Corporation en 78% in Seaflower WhiteFish Corporation op Lüderitz.
Gaomab sê ’n nuwe bedryfsbestuurder is intussen aangestel en die pos van die sekretaris van die maatskappy is geadverteer.
“Verder het die direksie die psigometriese toetse van die kandidate vir die pos van hoof uitvoerende beampte afgehandel en ’n kortlys saamgestel. Ons beplan om teen volgende week onderhoude te voer en dan in ooreenstemming met die bestuursprosedure en die maatskappybeleid van Fishcor ’n uitvoerende hoof aan te beveel,” sê hy.
Volgens hom sal Herunga as tussentydse toesighouer die maatskappy bestuur tot dié aanstelling gemaak is. “As tydelike direksie gee ons ons volle samewerking aan die Sentrum vir Finansiële Intelligensie (FIC) en die Teenkorrupsiekommissie (ACC) en maak seker al die uitstaande en nodige inligting (vir hul ondersoeke) word verskaf – vandaar die dringende behoefte aan ’n toesighouer,” sê Gaomab.
[email protected]



FOTO
Me. Ruth Herunga. Foto Facebook

Soortgelyk

 

Meer as 50% van geteikende bejaarde bevolking ingeënt

1 uur gelede | Gesondheid

Namibië het 55% van sy geteikende bejaarde bevolking ingeënt, terwyl 49,8% van die teikenbevolking van mense met onderliggende toestande 'n entstof teen Covid-19 ontvang het....

Twee tuissterftes, 15 nuwe gevalle

2 ure gelede | Gesondheid

Twee tuissterftes in die Noorde van die land stoot die Covid-sterftesyfer op tot 3 571. Gister is 15 nuwe gevalle aangemeld, 'n positiewe koers van...

Kospryse deur die dak

17 ure gelede | Landbou

Ronelle Rademeyer Voedselpryse het wêreldwyd die hoogste vlak in tien jaar bereik en lande sal vanjaar meer as US$1,75 triljoen (sowat N$27 triljoen) aan voedselinvoere...

Toerisme: N$100...

17 ure gelede | Toerisme

Erwin Leuschner Swakopmund was gister die eerste om besonder­hede oor die regering se herlewingsplan vir toerisme te hoor.Die konsepplan strek van 2022 tot 2024 en...

Nog ’n Fishrotter doen aansoek om borgtog

17 ure gelede | Howe

Kristien KrugerNog ’n beskuldigde in die Fishrot-sage se formele aansoek om borgtog sal vandag in die hoërhof in Windhoek begin.Regter Johanna Salionga het gister die...

Namibiër deur Prins William vereer

17 ure gelede | Omgewing

Die uitvoerende hoof van Save the Rhino Trust (SRT) in Namibië, Simson Uri-Khob, is Maandagaand in Londen met die Prins William-toekenning vir Bewaring in Afrika...

Weer vir 23 November 2021

17 ure gelede | Weer

BINNELAND: Gedeeltelik bewolk en warm tot baie warm in die Suide en Ooste, maar bewolk en baie warm met enkele donderbuie in Zambezi. Elders sonnig...

La Niña vestig amptelik

17 ure gelede | Weer

Elvira HattinghDit is amptelik: La Niña het nou in die tropiese Stille Oseaan gevestig, het die Australiese Buro vir Meteorologie gister (23 Nov) gesê. “La...

Werwing van Fishcor-hoof in ACC se visier

17 ure gelede | Regering

Mathias Haufiku en Jemima BeukesDie ministerie van staatsondernemings (SOE’s) het die Teenkorrupsiekommissie (ACC) gevra om ondersoek in te stel na hoe mnr. Stanley Ndara, een...