Federer help leerders voed
Kwesbare gesinne met jong kinders het kospakkies ontvang in ’n gesamentlike poging van verskeie organisasies om die proses van tuisonderrig te vergemaklik.
Mariselle Stofberg
Die Church Alliance for Orphans (CAFO), Lifeline Childline (LL/CL) en Women’s Action for Development (WAD) is bedrywig om met finansiële steun van die Roger Federer-stigting kos aan kwesbare gesinne met kinders te voorsien.
Dit sal oor ’n tydperk van twee maande gedoen word.
Die voedingsprojek is gemik op skoolkinders en kinders by sentrums vir vroeë kinderontwikkeling (ECD) wat tans die impak van die Covid-19-pandemie voel. Dit is deel van die Federer-stigting se inisiatief wat fokus op skoolgereedheid en ongeveer 12 000 kinders in ses streke oor die land bereik.
“Hierdie is ’n ongelooflike belangrike inisiatief van die organisasie om die ouers in hierdie gemeenskap te ondersteun. Baie van hierdie ouers het op die oomblik nie werk nie en dit is vir hulle baie moeilik om na hul kinders se basiese behoeftes om te sien. Hierdie kospakkies beteken ongelooflik baie vir die gemeenskap en die skool,” sê mnr. Andreas Katangolo, die skoolhoof van Laerskool Havana.
Op Vrydag, 8 Mei, het die organisasies kospakkies aan Laerskool Olof Palme, Laerskool Havana en sewe ECD-sentrums in Windhoek oorhandig. Die inhoud van die kospakkies sluit in meel, olie, wortels, aartappels, boontjies, soppakkies en appels vir die kinders en die waarde beloop altesaam ongeveer N$100 000.
Weens die nasionale inperking en die sluiting van skole en ECD-sentrums, ontvang leerlinge nie die vereiste voedingswaarde van maaltye nie, wat fisieke en emosionele ontwikkeling negatief kan beïnvloed.
Ouers van Laerskool Havana het ook, saam met die kospakkies, die eerste reeks opvoedkundige boekies ontvang wat deur Namibia Media Holdings (NMH) gedruk is.
Met hierdie boekies poog NMH om voorskoolse en laerskoolleerlinge landswyd toegang tot leermateriaal te bied. Meer as 300 000 skoliere sal by die projek baat, waarmee NMH die ministerie van onderwys, kuns en kultuur bystaan om onderwys te verbeter en tuisonderrig vir almal moontlik te maak.
“Vir my kind om elke oggend vroeg op te staan en ten volle sy skoolwerk te kan doen, is dit belangrik dat hy elke dag iets het om te eet. Met hierdie donasie en die boekies wat ek kon ontvang, kan ek seker maak my kind se opvoeding bly altyd ’n prioriteit, veral in hierdie deurmekaar tyd,” sê me. Celia Sakaria, die ma van ’n sesjarige kind.
Die Federer-stigting het US$1 miljoen in die Suider-Afrikalande waar sy skoolgereedheidsprogramme bedryf word, beskikbaar gestel vir voedingskemas in skole en ECD-sentrums.
CAFO, in samewerking met die Luxemburg-stigting, ondersteun verder 10 ECD-sentrums om 600 kinders in die Kavangostreek rondom Rundu te voed. Met ondersteuning van verskeie borge voorsien CAFO ook kospakkies aan 100 laerskoolkinders wat gewoonlik die Bernard Nordkamp Afternoon Care-sentrum in Katutura bywoon.
- [email protected]
Die Church Alliance for Orphans (CAFO), Lifeline Childline (LL/CL) en Women’s Action for Development (WAD) is bedrywig om met finansiële steun van die Roger Federer-stigting kos aan kwesbare gesinne met kinders te voorsien.
Dit sal oor ’n tydperk van twee maande gedoen word.
Die voedingsprojek is gemik op skoolkinders en kinders by sentrums vir vroeë kinderontwikkeling (ECD) wat tans die impak van die Covid-19-pandemie voel. Dit is deel van die Federer-stigting se inisiatief wat fokus op skoolgereedheid en ongeveer 12 000 kinders in ses streke oor die land bereik.
“Hierdie is ’n ongelooflike belangrike inisiatief van die organisasie om die ouers in hierdie gemeenskap te ondersteun. Baie van hierdie ouers het op die oomblik nie werk nie en dit is vir hulle baie moeilik om na hul kinders se basiese behoeftes om te sien. Hierdie kospakkies beteken ongelooflik baie vir die gemeenskap en die skool,” sê mnr. Andreas Katangolo, die skoolhoof van Laerskool Havana.
Op Vrydag, 8 Mei, het die organisasies kospakkies aan Laerskool Olof Palme, Laerskool Havana en sewe ECD-sentrums in Windhoek oorhandig. Die inhoud van die kospakkies sluit in meel, olie, wortels, aartappels, boontjies, soppakkies en appels vir die kinders en die waarde beloop altesaam ongeveer N$100 000.
Weens die nasionale inperking en die sluiting van skole en ECD-sentrums, ontvang leerlinge nie die vereiste voedingswaarde van maaltye nie, wat fisieke en emosionele ontwikkeling negatief kan beïnvloed.
Ouers van Laerskool Havana het ook, saam met die kospakkies, die eerste reeks opvoedkundige boekies ontvang wat deur Namibia Media Holdings (NMH) gedruk is.
Met hierdie boekies poog NMH om voorskoolse en laerskoolleerlinge landswyd toegang tot leermateriaal te bied. Meer as 300 000 skoliere sal by die projek baat, waarmee NMH die ministerie van onderwys, kuns en kultuur bystaan om onderwys te verbeter en tuisonderrig vir almal moontlik te maak.
“Vir my kind om elke oggend vroeg op te staan en ten volle sy skoolwerk te kan doen, is dit belangrik dat hy elke dag iets het om te eet. Met hierdie donasie en die boekies wat ek kon ontvang, kan ek seker maak my kind se opvoeding bly altyd ’n prioriteit, veral in hierdie deurmekaar tyd,” sê me. Celia Sakaria, die ma van ’n sesjarige kind.
Die Federer-stigting het US$1 miljoen in die Suider-Afrikalande waar sy skoolgereedheidsprogramme bedryf word, beskikbaar gestel vir voedingskemas in skole en ECD-sentrums.
CAFO, in samewerking met die Luxemburg-stigting, ondersteun verder 10 ECD-sentrums om 600 kinders in die Kavangostreek rondom Rundu te voed. Met ondersteuning van verskeie borge voorsien CAFO ook kospakkies aan 100 laerskoolkinders wat gewoonlik die Bernard Nordkamp Afternoon Care-sentrum in Katutura bywoon.
- [email protected]
Kommentaar
Republikein
Geen kommentaar is op hierdie artikel gelaat nie