Esau vat Ehika vas

Aantygings van niebetaling

27 February 2018 | Ministeries
Ottis Finck - Die minister van visserye en mariene hulpbronne, mnr. Bernard Esau, het die besturende direkteur van Ehika Fishing, mnr. Rojo van Wyk, opdrag gegee om die trustfonds vir vissermanne se weduwees (FWT) ten volle in werking te stel, met verteenwoordigers wat deur die weduwees self verkies is, asook met die opening van ’n bankrekening wat uitsluitlik deur die weduwees bestuur sal word.

Esau het ook beveel dat FWT op die maatskappy se raad verteenwoordig word proporsioneel tot die hoeveelheid aandele in hul besit.

Die minister het ook gevra vir finansiële rekords en bankstate wat toon hoe wins sedert 2012 deur die maatskappy verdeel is.

“Indien die trustfonds nie in die verlede die proporsionele dividende ontvang het nie, moet dit wat uitstaande is, onmiddellik in die weduwees se rekening betaal word,” het die minister gesê.

“Ek wil ook regverdiging op skrif sien vir beleggings wat die maatskappy gemaak het. Beide die maatskappy en die trustfonds moet hiermee tevrede wees,” het Esau ook in sy brief van 23 Februarie aan Van Wyk geskryf.

Die minister beskou die tekort aan regulering van die fonds as ’n skending van die bepalinge van die wet op mariene hulpbronne.

“Jul regte is nie opgeskort nie, maar geen visvangkwotas sal aan die maatskappy toegestaan word tot die bestaande kwessies aangespreek word en die huidige bestuur asook die FWT daarmee tevrede is nie,” skryf die minister.

Esau het vir Van Wyk 21 dae gegee om oplossings vir elk van die kwessies in die brief aan hom voor te lê.

Dié verwikkelinge volg ná die minister op 15 Februarie met Van Wyk en verteenwoordigers van die FWT op Walvisbaai vergader het.

Tydens die vergadering is vasgestel niemand van die FWT word op Ehika Fishing se raad verteenwoordig nie.

Dít ten spyte daarvan dat die fonds met 40% se aandele die maatskappy se meerderheidaandeelhouer is.

Dit beteken die weduwees is by besluite uitgesluit en kan nie hul regte binne die maatskappy uitoefen nie.

Lede van die fonds het op 17 November verlede jaar reeds ’n verskeidenheid klagte in hierdie verband onder die minister se aandag gebring.

As gevolg hiervan het Esau met 34 lede van die trust vergader ná hy die opening van Ehika se kouestooraanleg op Narraville bygewoon het.

Hiertydens het hy vasgestel kommunikasie tussen Ehika en die FWT is gebrekkig.

“Ons is nie behoorlik ingelig van die trustakte nie en daar was geen aanspreeklikheid in terme van operasies en geld wat ons danksy ons 40%-aandeelhouding moes ontvang nie.

“Ons wil weet waar die aandeelsertifikate is. Die betaling wat ons ontvang het, is eers gehalveer, en toe heeltemal gestaak. Ehika neem ook besluite sonder ons en ons het geen verteenwoordiging op die raad nie. Die verkiesing van trustees is ook problematies,” sê die weduwees.

Die minister het toe onderneem om ’n vergadering met ander aandeelhouers te belê en het Van Wyk na die vergadering op 15 Februarie genooi.

Daar het Esau die weduwees ingelig dat die ministerie se rekords toon die trustfonds besit 40% van die maatskappy, Rojo van Wyk 30%, Eddie van Wyk 15% en Clive Johannes 15%.

“Ek het jul kwessies met amptenare van die ministerie bepreek en hulle opdrag gegee om ’n volledige verslag met aanbevelings op te stel. Hulle kon bevestig dat die trust aandele het en dat die aandeelhouding bygedra het tot die toekenning van die maatskappy se visvangregte,” sê die minister.

“Mense word ontneem van regte en aandeelhouding en dit is kommerwekkend. Dis ’n ernstige saak en het tot klagtes gelei. Die wet bemagtig my om aksie te neem en dit sal ek doen. Die weduwees moet erken word as die maatskappy se ruggraat. Ek wil hê julle moet ’n demokratiese trust vorm en almal by toekomsplanne betrek. Die raadgewende komitee moet heringestel word en elke kwartaal moet ’n verslag aan my voorgelê word,” het die minister gesê.

Van Wyk het gesê die weduwees se geld is gebruik om die kouestooraanleg op Narraville te bou en hulle is mede-eienaars van die aanleg.

“Ehika het by die ontwikkelingsbank van Namibië (DBN) aansoek gedoen om ’n lening van N$27 miljoen, maar het slegs N$17 miljoen gekry. Uitbetalings aan begunstigdes is nie gestaak nie, en sal voortgaan. Dit was slegs herlei om ’n bykomende N$22 miljoen in te samel, wat gebruik is vir infrastruktuur wat waarde tot die masbankerbedryf sal voeg,” sê hy.

Volgens die minister is Ehika nie die enigste skuldige in terme van visvangmaatskappye wat onregverdig by voorheen benadeelde aandeelhouers baat nie.

“Ek is bewus van ander wat dit ook doen. Dit gebeur op Walvisbaai en dwarsoor die land. Dit is ’n baie hartseer situasie.”

Die kabinet oorweeg tans ’n puntestelsel wat in die toekoms gebruik sal word om soortgelyke maatskappye te identifiseer en om vas te stel wie visvangregte moet kry en wie nie, volgens die minister.

Soortgelyk

 

Theo Mujoro is nuwe hoof van verkiesings

8 ure gelede | Politiek

Mnr. Theophilus (Theo) Mujoro is vanaf 1 September vanjaar vir ‘n tydperk van vyf jaar aangestel as die nuwe hoof verkiesingsbeampte van die Verkiesingskommissie van...

Nuwe spoedkameras getoets

9 ure gelede | Infrastruktuur

Die Namibiese polisie se verkeersbeamptes toets van gister af die werking van nuwe spoedkameras op Namibië se hoofpaaie. Veral in die Erongo- en Otjozondjupastreek word...

Onderwys: ‘Gebruik wat julle het om fondse in te...

10 ure gelede | Onderwys

Die minister van onderwys, kuns en kultuur, me. Katrina Hanse-Himarwa het ’n beroep op skole gedoen om beskikbare middele te gebruik om fondse vir hul...

Otjomuru-kliniek aan regering oorhandig

10 ure gelede | Gesondheid

Die Otjomuru-kliniek naby die Otjomuru-nedersetting sowat 27 km oos van Okangwati in die Kunenestreek, is aan die regering oorhandig. Die konstruksie van die kliniek was...

Nuwe visekanselier vir Unam

11 ure gelede | Onderwys

Die Universiteit van Namibië (Unam) sal voorleggings deur die vier kandidate vir die universiteit se visekanselierspos regstreeks op YouTube, Twitter, Facebook en hul webwerf uitsaai.Die...

Windhoek se krane dalk oor twee seisoene leeg ...

22 ure gelede | Omgewing

Elvira Hattingh - Windhoek het genoeg water om twee reënseisoene te dek, indien dit bykomende waterbronne in die Noorde, asook die Windhoek-akwifer onvolhoubaar gebruik én...

Wag die Skedelkus op Harry en sy bruid?

22 ure gelede | Toerisme

Des Erasmus - Prins Harry-koors teister die gebied tussen Hentiesbaai en die monding van die Kunenerivier op die noordgrens en die ooreenstemmende leeu- en renosterwêreld...

Weer vir 22 Junie 2018

22 ure gelede | Weer

BINNELAND: Koud aanvanklik in die binneland. Dit sal gedeeltelik bewolk en warm tot baie warm oor die verre Noordooste en die Khomasstreek wees. Elders sal...

Fosfaat-debat begin oor

22 ure gelede | Omgewing

Augetto Graig - Die ontginning van fosfaat op Namibiese seebodem is vir eers van die baan af. Die minister van die omgewing en toerisme,...