Ervare drietal vir T20-missie vervang

15 May 2019 | Sport
Andrew Poolman - Krieket Namibia het sy 14-tal spelers aangekondig wat van komende naweek af in Kampala, Uganda, aan die Internasionale Krieketraad (ICC) se kontinentale uitduntoernooi vir die T20 Wêreldbeker deelneem.

Gerhard Erasmus en sy Eagles-span het verlede maand ’n geskiedkundige deurbraak gemaak wat vir die land sy eerste ICC internasionale eendagstatus sedert 2003 verwerf het.

Afrigter Pierre de Bruyn het dieselfde groep staatmakers behoue laat bly met die uitsondering van drie gesoute spelers wat vanweë werk- of persoonlike verpligtinge nie vir die toer beskikbaar is nie.

Die drietal wat tuis bly – Jean Bredenkamp, Craig Williams en JP Kotze – is almal topordekolwers, met Williams wat ook ’n handige naatbouler is en Kotze wat as paaltjiewagter bedrewe is.

In hul plek is Niko Davin, regterhandse topordekolwer; die regterarm naatbouler Jan-Izak de Villiers en Danie van Schoor, veelsydige draaibalbouler.

“In verlede maand se eendagkriekettoernooi het ons tot op nommer 9 of 10 bekwame kolwers ingespan. Ons het dus steeds genoeg permutasies tot ons beskikking, want manne soos Karl Birkenstock en Jan Frylinck, byvoorbeeld, kan enige rol speel,” sê De Bruyn.

Daar is ses Afrika-spanne in die toernooi, waarvan die toptwee deurdring om in Oktober in Dubai aan die finale globale uitduntoernooi vir die T20 Wêreldbeker deel te neem.

Die Namibiërs, wat Vrydag uit Windhoek vertrek, open hul toernooi twee dae later met ’n oggendwedstryd teen Botswana. Maandag kom hulle teen Ghana te staan en die volgende dag teen die gasheerland Uganda. Ná ’n rusdag kom hulle op Donderdag 23 Mei teen Nigerië te staan en sluit die Vrydag teen Kenia af.

Geen finaal word gespeel nie, met ligapunte en netto kolftempo die bepalende faktore om die twee kwalifiseerders te bepaal.

Sy span lyk dalk op papier na ’n gunsteling om suksesvol te wees, maar De Bruyn waag nie onnodige kanse nie.

“Ons het definitief ’n goeie kans om een van die twee beskikbare posisies te beklink. Ons het weer hard en deeglik voorberei en ons neem geen toernooi ligtelik op nie.

“Tegnies gesproke is Namibië net twee stappe weg om weer sy verskyning by ’n Wêreldbekertoernooi te maak, maar die toestande van die kolfblaaie in Uganda is ’n onbekende faktor en ons sal dus ten volle op ons hoede moet wees.”

Die volgende T20-wêreldtoernooi is volgende jaar in Engeland.

Die Namibiese spelersgroep is:

Stephen Baard (CCD Tigers)

Danie van Schoor (Trustco United)

Jan-Izak de Villiers (Wanderers)

Gerhard Erasmus (kaptein, WHS Old Boys)

Jan Frylinck (onderkaptein, Wanderers)

Zane Green (WHS Old Boys, paaltjiewagter)

Zhivago Groenewald (WHS Old Boys)

Niko Davin (Wanderers)

Tangeni Lungameni (WHS Old Boys)

Bernard Scholtz (Wanderers)

JJ Smit (Wanderers)

Christi Viljoen (Otago, Nieu-Seeland)

Karl Birkenstock (Wanderers)

Helao (Picky) Ya France (WHS Old Boys)

Die span word vergesel deur Pierre de Bruyn, Albie Morkel (hulpafrigter) en Dee Thakur (spanbestuurder).

VROUE VORDER

Namibië se nasionale vrouespan het met een plek hoër op die T20-wêreldranglys geklim (25ste) te danke aan sy oorwinnings teen die hoër gerekende Uganda en Kenia verlede week.

Die Namibiërs het die finaal van die toernooi in Harare gehaal en kon net nie by Zimbabwe verby kom nie, wat met 50 lopies gewen het om die enigste Afrika-plek by die globale uitduntoernooi vir die T20 Wêreldbeker op te eis.

Me. Hester Khan, Krieket Namibië se raadslid vir die vrouespel, sê dit was ’n baie aangename ondervinding om op die Harare-sportklub se wêreldklas venue te speel.

“Namibië kon die afgelope tien jaar nie daarin slaag om ’n eindstryd in sulke toernooie te haal nie. Zimbabwe het miskien gedink hulle gaan oor ons hardloop (veral ná hul reeksoorwinning van 5-0 op Walvisbaai vroeër vanjaar), maar ons het baie goed gedoen om hulle tot net 114 lopies in twintig boulbeurte te beperk.

“Ongelukkig het die vinnige verlies van ons eerste drie paaltjies ons onder groot druk geplaas. Die kolfwerk is ’n aspek waaraan ons baie aandag sal gee wanneer ons weer by die huis is.

“Ons veldwerk en boulwerk was van die beste in die hele toernooi en ons het baie komplimente daarvoor gekry.

“Die huidige span is ook nog jonk en het nie dieselfde ondervinding as ’n land soos Zimbabwe nie; ons kon ook baie leer uit die geestelike gehardheid van die sterker opposisie.

“Krieket Namibië gaan alles in die stryd werp om meer jong meisies in die sport te betrek en hul spel te ontwikkel. Binnekort lê ’n kwalifiserende toernooi vir die o.19-meisies voor en ons sien baie uit om die voorbereidende werk te doen.”

Soortgelyk

 

Padgebruik al duurder

58 minute gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Padgebruik al duurder

58 minute gelede | Vervoer

Die Padfondsadministrasie (RFA) het ’n 4,3%-verhoging op padgebruik aangekondig, wat van 1 Mei af geld. Dit beteken tariewe by grensposte verhoog, asook tariewe op voertuie...

Gesondheid: Advertensie vals

2 ure gelede | Gesondheid

Die ministerie van gesondheid en maatskaplike dienste (MoHSS) sê 'n inligting wat op sosiale media sirkuleer oor opleidingsgeleenthede by die ministerie is vals. Die vals...

'n Seder val in Swapo

11 ure gelede | Mense

Ronelle Rademeyer - Huldeblyke stroom sedert vroeg gisteroggend in die sosiale media in nadat dit bekend geword het Namibië se voormalige vise­president (2015 – 2018)...

Duitsland gee ou kruis terug

11 ure gelede | Plaaslik

Ronelle Rademeyer - Een van die belangrikste artefakte uit die glorieryke ontdekkersera van die Portugese seevaarders sal in Augustus deur die Duitse museum vir geskiedenis...

Weer vir 20 Mei 2019

11 ure gelede | Weer

WEERWAAK: Koue en winderige toestande word in die Suide verwag. Die nodige voor­sorgmaatreëls moet getref word. BINNELAND: Gedeeltelik bewolk en warm tot baie warm in...

Namport dank 86 werkers af

11 ure gelede | Plaaslik

Die Namibiese haweowerheid, Namport, het Vrydag aangekondig 86 werkers by die vraghouerterminaal by die Walvisbaaise hawe wat in Augustus aan 'n onwettige staking deelgeneem het,...

Speaker dring aan jeug moet by kiesproses betrek word

11 ure gelede | Politiek

Denver Kisting - Die speaker van die Nasio­nale Vergadering (NV), prof. Peter Katjavivi, sê die jeug moet by die verkiesings­proses betrek word.Die uitvoerende hoof van...

'Sam Nujoma is 'n ikoon'

11 ure gelede | Regering

Stigterspresident Sam Nujoma se 90ste verjaardagvieringe is Saterdag op Etunda in die Omusatistreek gevier en deur verskeie hooggeplaastes bygewoon. President Hage Geingob het Nujoma as...