Eksamenbedrog: 32 vraestelle kry voete

Onsekerheid oor bekendmaking van graad 11-,12-uitslae

02 December 2021 | Ministeries
Henriette Lamprecht



'n Reuse-terugslag vir die on­skuldige kandidate wat 'n kans gestaan het om die eksamen met vlieënde vaandels te slaag.

Dit was die algemene gevoel onder graad 11- en graad ­12-kandidate wat nou eers volgende jaar 'n groot deel van hul eksamen sal kan skryf, nadat ­eksamenvrae­stelle op Ondangwa en Ongwediva uit­gelek het.

Meer as 30 vraestelle in onder meer Engels, biologie, wiskunde en landbou moet aanstaande jaar oorgeskryf word, nadat vraestelle vir die Oktober/November-eksamen uitgelek het.

Leerlinge wat geraak word, sluit graad 12's vir die Namibië Senior Sekondêre Sertifikaat (NSSCO - legacy) en graad 11's vir die nuwe Namibië Senior Sekondêre Sertifikaat (NSSCO - nuut) in.

Met die geraakte vraestelle wat nou eers in Januarie of Februarie volgende jaar geskryf gaan word, is dit onbekend wanneer die nasionale uitslae vir graad 11 en -12 bekend gemaak sal word. Laasgenoemde het 'n uitwerking op die aanvang van klasse vir leerlinge vir gevorderde vlak (AS), sowel as die graad 11-leerlinge vir aanstaande jaar (huidige graad 10-leerlinge).

'n Geraakte leerling is van mening leerlinge moet eerder nou hul finale vraestelle skryf en hul Desembervakansie opoffer sodat die laat uitslae nie dié raak wat verder wil gaan studeer nie.

Die ministerie van onderwys, kuns en kultuur het Dinsdag inderhaas die Desembervakansie vervroeg om streke genoeg tyd te gun om vir die skryf van die vraestelle in die nuwe jaar voor te berei. Preprimêr tot graad 3 sluit môre, terwyl graad 4 tot graad 10 op 9 Desember vir die vakansie sluit. Die hersiende sluitingsdatums is net van toepassing op skole en/of grade waar die toetsreeks en ­nasionale eksamens voltooi is.

Drie strafregtelike sake is reeds by die Namibiese polisie op Ongwediwa en Ondangwa ­aanhangig gemaak waar die vraestelle uit­gelek het.

Tot op hede is 10 verdagtes in verband met die gesteelde vraestelle in hegtenis geneem, waarvan agt op borgtog vrygelaat is en twee buitelanders wat steeds in aanhouding is.

Die adjunkminister van onderwys, kuns en kultuur, me. Faustina Clay, wou weens die voortgesette polisieondersoeke nie meer inligting in dié verband bekend maak nie, omdat dit moontlik die ondersoeke in die wiele kan ry.

Sy het wel gesê die ondersoeke het gewys meer eksamenvrae­stelle vir verskillende vakke vir graad 12 gewone vlak (NSSC), sowel as die hersiende leerplan graad 11-leerlinge op gewone vlak, kan ook deur die diefstal geraak word.

“Die ondersoeke toon die bron waarvan die vraestelle uitgelek het, kan teruggespoor word na die ­eksamenvraestelle wat vir kandidate bedoel was wat ­gesiggestrem is,” het sy gesê.

Clay sê die uitlek van die vrae­stelle is “'n ernstige kwessie en hoogs betreurenswaardig” en geniet die aandag wat dit verdien.

“Voorvalle van dié aard is ­afskuwelik en is gelykstaande aan akademiese roof en bedrog. Die ministerie veroordeel dit in die sterkste moontlike terme.”

In 'n poging om die integriteit van die land se kwalifasies te beskerm, sal die geraakte ­eksamens dus “­ongelukkig” weer geskryf moet word, het Clay gesê.



GERAAKTE VRAESTELLE

Alle geraakte vakke waarin eksamen nog afgelê moes word, is gevolglik vir dié jaar afgestel. Die presiese datums vir die skryf van die vraestelle sal volgens haar later bekend gemaak word.

Die vakke wat geraak word, is vir graad 12 gewone vlak Engels tweede taal (vraestel 1 & 2), geskiedenis (1 & 2), landbou (1 & 2), ontwikkelingstudies (1, 2 & 3) en biologie (1, 2 & 3).

Vir graad 11 gewone vlak (nuwe leerplan) is dit Engels tweede taal (1), Afrikaans tweede taal (1), biologie (1, 2 & 3), wiskunde (1 & 2), fisika (1, 2 & 3), chemie (1, 2 & 3), entrepreneurskap (1), besigheidstudies (1 & 2), landbou (1) en Oshikwanyama & Oshidongo (1, 2 & 3).

Clay het namens haar ministerie 'n beroep op onderwysers, ouers, voogde en ook die publiek gedoen om enige voorvalle van vermoedelike oortredings aan te meld.

“Intussen is alle administratiewe prosesse onderweg om die voorval te ondersoek en die verdere versterking van bestaande beheermaatreëls te verseker,” het sy beklemtoon.

[email protected]

Soortgelyk

 

Trusted Travel System geld vanaf Saterdag

1 uur gelede | Toerisme

Die Trusted Travel System vir die koördinering en verifiëring van Covid-19-uitslae in lande deel van die Afrika Unie (AU) geld vanaf Saterdag (15 Januarie) in...

Huidige Covid-19-regulasies bly in plek

2 ure gelede | Gesondheid

President Hage Geingob sê die huidige Covid-19-regulasies wat die afgelope maand in plek was, geld steeds tot 15 Februarie. Dit is die volgende: 'n maksimum...

Byna 20 000 nuwe gevalle die afgelope maand

2 ure gelede | Gesondheid

Die minister van gesondheid en maatskaplike dienste, dr. Kalumbi Shangula, sê 19 846 nuwe Covid-19-gevalle is die afgelope maand in die land aangeteken. Hiervan was...

Inentingskoers bly laag

2 ure gelede | Gesondheid

President Hage Geingob sê huiwering om teen Covid-19 ingeënt te word, duur voort. Volgens die staatshoof het Zambezi die laagste koers en wel 6%, terwyl...

‘Reëngolwe wink’

12 ure gelede | Weer

Henriette Lamprecht – Baie swaar reën, met etlike reëngolwe wat in die tweede helfte van vandeesweek en tot volgende week uitgebreid na Namibië op pad...

Lisensie of nie, staatsvoertuie ry

12 ure gelede | Polisie

Adam Hartman op Swakopmund – Verkeersbeamptes in alle streke voer steeds ’n vroeër opdrag vanuit hul hoogste gesag uit om nie verkeerskaartjies aan regeringsvoertuie met...

FNB deel van geding om Fishrot-geld

12 ure gelede | Howe

Ogone Tlhage – First National Bank Namibia het bykomende dokumente by die hoërhof in Windhoek ingedien en hom daardeur by die grootste korrupsiesaak in die...

Weer vir 13 Januarie

12 ure gelede | Weer

BINNELAND: Gedeeltelik bewolk en baie tot bloedig warm oor die westelike helfte van die binneland, andersins gedeeltelik bewolk en warm tot baie warm met 'n...

Lande omseil Interpol as Namibië uitlewerings soek

12 ure gelede | Polisie

Kenya Kambowe op Rundu – Terwyl die Namibiese polisiehoof, lt.genl. Sebastian Ndeitunga, die Internasionale Kriminele Polisie-organisasie (Interpol) as behulpsaam beskou, vertel ’n plaaslike polisieondersoekbeampte ’n...