Eerste bosvoergids uitgereik

Nuwe metode kan veevoerbedryf ­herskep

06 December 2018 | Landbou
Elvira Hattingh



'n Eerste handleiding in sy soort oor hoe om veevoer van Namibië se indringerbos te maak, is op 28 November tydens die 22ste Weidings­forum op Otjiwarongo vrygestel.

Die handleiding bied praktiese riglyne oor hoe om voer vir beide kleinvee en grootvee te vervaardig deur die gebruik van inheemse indringerbosspesies as 'n sleutelbestanddeel.

Volgens kenners kan dít Namibiese boere in droogtetye uit die verknorsing red en die land teen die peperduur invoer van veevoer beskerm.

Die handleiding volg nadat uitgebreide navorsing en proewe tussen April 2016 en Julie 2017 wetenskaplik bewys het die vervaardiging van bosvoer is ekonomies lewensvatbaar en hou ook nie ­gesondheidsrisiko's vir vee in solank dit reg gebruik word nie.

Die splinternuwe gids bied 'n oorsig van die produksieproses, wat insluit hoe om bos te oes, te maal, te meng, hoe om korrels daarvan te maak en hoe om dit te stoor. Verskillende diëte vir skape, beeste, asook 'n metode om koste te bereken, word ingesluit.

Die gids benadruk die groot potensiaal vir 'n bosgebaseerde veevoer-waarde­ketting in Namibië vir kommersiële ­entiteite én gemeenskappe.

Boonop is dit nog 'n geleentheid om bosindringing te bestry – veral saam met die produksie van houtskool en vuurmaakhout.



TUISGEMAAKTE STRATEGIE

“Ná suksesvolle skaap- en beesvoerproewe in drie verskillende omgewings, naamlik die bewaringsgebied van die Afrika-wildehond by Okondjatu, die ­regeringsplaas Omatjenne en 'n kommersiële plaas naby Dordabis, is gevind dié benadering kan op 'n ­verskeidenheid boere van toepassing wees,” het die ­bosboudirekteur, mnr. Joseph Hailwa, op die forum gesê.

Hy het verder gesê hy is in sy skik met die navorsing omdat dit 'n groot bydrae tot byvoorbeeld die tuisgemaakte strategie, die droogtebeleid asook die nasio­nale weidingsbestuurbeleid en –strategie en die bosindringingprobleem lewer.

Hailwa het deelnemers by die forum aangemoedig om strategieë te identifiseer om die lewendehawebedryf te kommersialiseer, eerstens deur verbeterde grasproduksie en tweedens deur bosvoer.

“Dit kan boerderye meer winsgewend maak, plaaslike insette vir Namibiese markte teen 'n kompeterende koers bied en ons sterk afhanklikheid van invoere verminder.”

BELOWENDE UITSLAE

Die proewe het bewys dit is moontlik om veevoer plaaslik uit die blare en takke van indringerbosspesies te maak en dat dit saam met aanvullings vir vee gevoer kan word.

Tydens die proewe het vee hul gewig gehandhaaf en selfs noemenswaardige groei getoon.

Verskillende diëte is ook getoets en daar is bevind bosvoer kan suksesvol as noodvoer in droogtes gebruik word, maar kan ook as aanvullende voedsel ingespan word. Volgens die navorsers het bosvoer die potensiaal om Namibië te transformeer, gegewe die land se beperkte ­beskikbaarheid van voer, asook ons hoë afhanklikheid van invoere.

“'n Wen-wen situasie word geskep as bos vir die produksie van veevoer gebruik word, want nie net bied dit 'n onmiddellike oplossing in tye van voertekorte nie, maar dit dra ook by tot die verbetering van weiding op die lange duur,” lui 'n nuus­verklaring wat deur GIZ uitgereik is.

“Dit beteken plase kan meer droogtebestand wees en produktiewe weiding kan weer herstel word deur bosuitdunning. Só word miljarde bespaar wat gebruik sou word om veevoer in te voer.”

Die eerste opleidingsessies in die ­vervaardiging van bosvoer is reeds in September vanjaar aangebied en nóg volg in die komende jaar.

Navorsing is gelei deur die ­ministerie van landbou, water en bosbou en die Duitse vereniging vir ­internasionale ­samewerking (GIZ) se gesamentlike bosbeheer- en biomassaverbruik-projek.

Ander lede van die projek sluit in die ministerie se direktoraat vir landbounavorsing en -ontwikkeling, die projek vir die volhoubare bestuur van Namibië se beboste gebiede (Nafola), wat deur die Verenigde Nasies se Ontwikkelingsfonds (UNDP) gefinansier word, die Afrika-wildehondbewaringsgebied, asook die plaas Langbeen.

Ander borge het Feedmaster, asook Beefcor Meat Suppliers ingesluit.

Meer inligting is by die Ontbossings­adviesdiens of www.dasnamibia.org ­beskikbaar.

Soortgelyk

 

Mense uit 33 lande onder 157 rampslagoffers

6 ure gelede | Ongelukke

Ronelle Rademeyer - Sover bekend was daar nie enige Namibiërs op rampvlug ET302 van Ethiopian Airlines nie.Familielede wat passasiers van die Ethiopiese lugdiens se vlug...

Ethiopiese vliegtuig met 157 aan boord stort neer

9 ure gelede | Ongelukke

‘n Boeing 737 van Ethiopian Airlines het vanoggend onderwegvanaf Addis Ababa na Nairobi in Kenia neergestort.Die Ethiopiese eerste minister, Abiy Ahmed, het in ‘n verklaring...

braai en wen groot met . . .

1 dag gelede | In beeld

Die Namibiese weerkantoor voorspel sonnige en baie warm weer vir vandag in die verre weste en suidweste van die land, terwyl dit elders gedeeltelik bewolk...

Geingob: Gelukkig Vrouedag, vroue

2 dae gelede | Regering

President Hage Geingob sê hy erken die dapper pogings van vroue om beter gemeenskappe te skep en tot die voorspoed van die mensdom by te...

Verkrygingsraad presteer

2 dae gelede | Regering

Die Sentrale Verkrygingsraad van Namibië (CPBN) se raadsvoorsitter, mnr. Patrick Swartz, en administratiewe hoof, me. Lischen Ramakhutla, het vanoggend lig gewerp op uitdagings wat die...

Namibië topbestemming by ITB

2 dae gelede | Toerisme

Namibië is gisteraand as beste safari en wildbestemming by die Internasionale Toerismeskou in Berlyn (ITB) in Duitsland aangewys.Die minister van die omgewing en toerisme, mnr....

Wet slaan toe op wapenlisensies

2 dae gelede | Ministeries

Denver Kisting – Op die oomblik hoef iemand wat om ’n wapenlisensie aansoek doen, nie bewys te lewer dat hulle in staat is om ’n...

Water: Verligting ná hemelhoë rekeninge

2 dae gelede | Regering

Elvira Hattingh - Windhoekers wat vandeesmaand uitsonderlike hoë waterrekeninge ontvang het, kan ‘n sug van verligting slaak omdat die droogtetarief vir huishoudings net tot Januarie...

Kalender 8 Maart

2 dae gelede | Kuns en vermaak

Nou aan die gang» Tapz is 'n meester van die bira en die Wes-Afrikaanse djembe. Dit kan op sy debuutalbum, Awaited Wait, wat in Desember...