Dok op, sê amptenare
Werkers in diens van die staat is arbeidskommissaris toe oor salarisse, hoewel hul totale salarisrekening glo reeds kommerwekkend groot is.
Elvira Hattingh en Jo-Maré Duddy
Ten spyte van kommer oor Namibië se enorme vergoedingspakket vir staatsamptenare het twee vakbonde nou 'n dispuut oor salarisonderhandelinge met die regering by die kantoor van die arbeidskommissaris ingedien.
Die Namibiese Nasionale Onderwysersunie (Nantu) en die Namibiese Vakbond vir Staatsdienswerkers (Napwu) het gister tydens 'n nuuskonferensie gesê hulle hoop om teen 18 Julie meer te weet oor hoe salarisonderhandelinge met die regering verloop – 'n maand ná die dispuut ingedien is.
Dít volg nadat die regering se onderhandelspan oor salarisverhogings en byvoordele vir staatsamptenare sedert Januarie verlede jaar glo nog geen teenaanbod op die vakbonde se voorgestelde jaarlikse verhogings vir 2019 tot 2021 gemaak het nie.
“Die proses het geen resultate gelewer nie, ons het dus 'n dooiepunt bereik,” het Nantu se sekretaris-generaal, mnr. Basilius Haingura, gesê.
Die vakbonde het aanvanklik op 12 April vanjaar glo eers 'n interne dispuut met die kantoor van die eerste minister verklaar. Ná die saak nie binne 30 dae opgelos kon word nie, is daar toe by die arbeidskommissaris aangeklop.
EISE
Volgens Haingura het vakbonde aanvanklik vir 'n 8%-salarisverhoging in die 2018-'19-boekjaar vir alle amptenare gevra, maar met die regering ooreengekom daar sal geen verhogings wees nie weens die “swak ekonomie en die regering se situasie”.
Vir die 2019-'20-boekjaar is op 'n 9%-salarisverhoging aangedring asook 'n 10%-verhoging in behuisingsubsidies of -toelae.
Die vakbonde vra 'n 10%-salarisverhoging in die 2020-'21-boekjaar, asook 'n 12%-verhoging vir reistoelae vir personeel op bestuursvlak asook vir diegene direk onder hulle.
Boonop versoek die vakbonde dat uitbetalings vir vervoereise na N$6 per kilometer verhoog word.
FINANSIËLE IMPLIKASIES
'n Salarisverhoging van 9% beteken die salarisrol vir 2019-'20 sal tot sowat N$26,88 miljard styg.
Dit is minstens N$1 miljard meer as die bykans N$25,7 miljard waarvoor in die begroting voorsiening gemaak is.
Die totale begrote vergoedingspakket van staatsamptenare vir vanjaar beloop reeds bykans N$29,97 miljard – sowat 51% van die staat se totale verwagte inkomste vir 2019-'20.
Die minister van finansies, mnr. Calle Schlettwein, het in sy begrotingstoespraak in Maart gesê teen 51% van die nierente-bedryfsuitgawes, en 15,5% van die BBP het die sentrale regering se salarisrekening met 110% gestyg oor die vyf jaar vóór die 2018-'19-boekjaar.
Pres. Hage Geingob het in sy staatsrede gesê staatsamptenare se verhoogde salarisrekeninge het 'n saak van kommer geword en moet aangespreek word.
Die Internasionale Monetêre Fonds (IMF) het tydens hul besoek in Junie gesê Namibië se belangrikste uitdagings is om spesifieke beleide te identifiseer wat die owerheid se fiskale konsolideringsplanne sal laat realiseer om die staatskulddinamika te stabiliseer.
Dit volg nadat 'n vergadering wat vandeesweek tussen die vakbonde en Staatshuis geskeduleer was nie plaasgevind het nie.
Volgens Staatshuis was die rede dat lynministers nie beskikbaar was nie.
Die beplande vergadering gaan nou vir 'n latere datum geherskeduleer word.
Ten spyte van kommer oor Namibië se enorme vergoedingspakket vir staatsamptenare het twee vakbonde nou 'n dispuut oor salarisonderhandelinge met die regering by die kantoor van die arbeidskommissaris ingedien.
Die Namibiese Nasionale Onderwysersunie (Nantu) en die Namibiese Vakbond vir Staatsdienswerkers (Napwu) het gister tydens 'n nuuskonferensie gesê hulle hoop om teen 18 Julie meer te weet oor hoe salarisonderhandelinge met die regering verloop – 'n maand ná die dispuut ingedien is.
Dít volg nadat die regering se onderhandelspan oor salarisverhogings en byvoordele vir staatsamptenare sedert Januarie verlede jaar glo nog geen teenaanbod op die vakbonde se voorgestelde jaarlikse verhogings vir 2019 tot 2021 gemaak het nie.
“Die proses het geen resultate gelewer nie, ons het dus 'n dooiepunt bereik,” het Nantu se sekretaris-generaal, mnr. Basilius Haingura, gesê.
Die vakbonde het aanvanklik op 12 April vanjaar glo eers 'n interne dispuut met die kantoor van die eerste minister verklaar. Ná die saak nie binne 30 dae opgelos kon word nie, is daar toe by die arbeidskommissaris aangeklop.
EISE
Volgens Haingura het vakbonde aanvanklik vir 'n 8%-salarisverhoging in die 2018-'19-boekjaar vir alle amptenare gevra, maar met die regering ooreengekom daar sal geen verhogings wees nie weens die “swak ekonomie en die regering se situasie”.
Vir die 2019-'20-boekjaar is op 'n 9%-salarisverhoging aangedring asook 'n 10%-verhoging in behuisingsubsidies of -toelae.
Die vakbonde vra 'n 10%-salarisverhoging in die 2020-'21-boekjaar, asook 'n 12%-verhoging vir reistoelae vir personeel op bestuursvlak asook vir diegene direk onder hulle.
Boonop versoek die vakbonde dat uitbetalings vir vervoereise na N$6 per kilometer verhoog word.
FINANSIËLE IMPLIKASIES
'n Salarisverhoging van 9% beteken die salarisrol vir 2019-'20 sal tot sowat N$26,88 miljard styg.
Dit is minstens N$1 miljard meer as die bykans N$25,7 miljard waarvoor in die begroting voorsiening gemaak is.
Die totale begrote vergoedingspakket van staatsamptenare vir vanjaar beloop reeds bykans N$29,97 miljard – sowat 51% van die staat se totale verwagte inkomste vir 2019-'20.
Die minister van finansies, mnr. Calle Schlettwein, het in sy begrotingstoespraak in Maart gesê teen 51% van die nierente-bedryfsuitgawes, en 15,5% van die BBP het die sentrale regering se salarisrekening met 110% gestyg oor die vyf jaar vóór die 2018-'19-boekjaar.
Pres. Hage Geingob het in sy staatsrede gesê staatsamptenare se verhoogde salarisrekeninge het 'n saak van kommer geword en moet aangespreek word.
Die Internasionale Monetêre Fonds (IMF) het tydens hul besoek in Junie gesê Namibië se belangrikste uitdagings is om spesifieke beleide te identifiseer wat die owerheid se fiskale konsolideringsplanne sal laat realiseer om die staatskulddinamika te stabiliseer.
Dit volg nadat 'n vergadering wat vandeesweek tussen die vakbonde en Staatshuis geskeduleer was nie plaasgevind het nie.
Volgens Staatshuis was die rede dat lynministers nie beskikbaar was nie.
Die beplande vergadering gaan nou vir 'n latere datum geherskeduleer word.
Kommentaar
Republikein
Geen kommentaar is op hierdie artikel gelaat nie